Kaina amwini mamakɨ bɛyɔ ka Abheli
4
1 Mʉlʉkʉ nɨnɔ Kunzi agya ndɨ, alʉka ndɨ bɛ Adhamʉ. Bikogo kʉwa ndɨ pa imoti aka ɨbʉ na mukakɨ bɛyɔ ka Ɛva. Kumbuso wa masyɛ, Ɛva ava ndɨ mʉma na abʉkʉta Kainaa. Kʉwa wa, abɨkya bɛ « Ko ngu ka Yawe, nabukutini miki mʉlʉkʉ yi. » 2 Abukutoku ndɨ bata mamakɨ Kaina, balʉka bɛ Abheli.Nɨyɔ bopingo, Abheli ɨɨta ndɨ mububulyo ka banyama na Kaina mʉkʉkʉna. 3 Lɨsyɛ limoti, Kaina apá ndɨ Yawe apɛpɛ wa malɨlɨ mo tiko kakɨ. 4 Abheli apá ndɨ gɔnɨ ɨyɨ Yawe apɛpɛ kakɨ wa bomikya bakɔndɔlɔ nɨbɔ bʉbʉkʉtaga ndɨ ba mambwa. Apága ndɨ bodhongbu bi nɨbayɔ ba yakpʉkpʉ na ba yanvʉdʉ-nvʉdʉ. Yawe azananɨlya ndɨ Abheli na apɛpɛ kakɨ. 5 Luki limoti, kazananɨlyagʉ ndɨ Kaina na apɛpɛ kakɨ. Kʉwa wa, Kaina alya kumbu kʉgbɛ na miso andindikono. 6 Yawe amuuso Kaina bɛ : « Ko bhulyo ɨkɨ yɔ wo mino kalya kumbu na miso undindikoni ? 7 Wakakpakyana ka bungbingbili, ɨmɨ nubhaɨlyatʉ. Luki limoti, wokogyi bɛyɔ, bʉnyɛ a mʉdɔngɔnɨ abhɛ nyama mʉdɨya a wakanga ko miso ma mupumi kakʉ. A na mʉsasa kaʉmwɔ, luki limoti, wiko no ngu kakɨtaga. »
8 Kumbuso yi, Kaina abɨkya mamakɨ bɛyɔ ka Abheli bɛ : « Taga ko tiko. » Nɨyɔ ba kʉwa ndɨ kʉ bɛyɔ, Kaina abhumbukyo ndɨ mamakɨ, amwɔ.
9 Kʉwa wa, Yawe amuuso ndɨ Kaina bɛ : « Mamakʉ Abheli a yanɨ ? Kaina asikisyo bɛ : « Nakibhigʉ ɨmɨ. Webhisi bi ɨmɨ bɛ niki kabuulyogo ? » 10 Yawe ɨgɨlya bɛ : « Ko bhulyo ɨkɨ yɔ wogyi bi mino bɛyɔ ? Kotukyoku ka lɨtɔmbʉ, nakaʉkana bangʉ ka mamakʉ kakʉgwaga na kɛkʉnga bɛ nigisyi likosi. 11 Mbɨya wanʉ, nugbongini na nukpumyo ka lɨtɔmbʉ nɨlɔ wodukisogo ndɨ mino bangʉ ka mamakʉ. 12 Ngbingo yi nɨnɔ wiko ndɛkɛ mino kayɨdhɨdhɨmya, malɨlɨ kʉkʉndɨgʉ ndɛkɛ bata. Wiko ndɛkɛ masyɛ masɨ kaamama bɨgbagbagba ka ɔbɨlɨ. »
13 Kʉwa wa, Kaina abɨkya Yawe bɛ : « Bha !Yigyogyiso kamɨ a yiti kʉgbɛ, nakakwananɨgʉ kokibhyo. 14 Heeebe ! Na lɨsyɛ li nɨlɨ, wekpumyini ka lɨtɔmbʉ la dhɔbɔ na okwononi bɛ nɨsʉmɨ byɨ na ɨwɛ. Niko ndɛkɛ gɔnɨ kaamama bɨgbagbagba ka ɔbɨlɨ nɨ nakɛgʉ na lɨdhɔdhɔ. Na mʉtʉ wasɨ nɨnɔ abhangana ndɛkɛ na ɨmɨ akwanana kɛmwɔ. 15 Yawe asikisyo bɛ : « Kaina ! Kalɨ, mʉmbanzʉ kʉmwɔ, nakwanana ndɛkɛ kaulumwisogo bambanzʉ madɨya na ɨka kaigiso likosi li. » Kʉwa wa, Kunzi abhiso ndɨ Kaina ɨda bɨngbanganya, kowoniso bɛ bakabhangana na mʉmbanzʉ wasɨ kamwonitɔgʉ. 16 Ka mulibo, Kaina atʉkya ndɨ buwobhi na Yawe, ɨnda kaiko ka mugi ma Nodhib nɨmɔ a ndɨ miso ya ɨngɛngɛ yo tiko ya Edheni.
Lɨvananza ka Kaina
17 Muko Kaina ava ndɨ mʉma, abʉkʉta Enoki. Kaina opiko ndɨ mugi na alʉka no lino ko mikakɨ bɛyɔ ka Enoki. 18 Kʉwa wa, Enoki abʉkʉta ndɨ miki mʉlʉkʉ yi, alʉka bɛ Iladhi. Iladhi abʉkʉta ndɨ Mehuyaeli. Mehuyaeli abʉkʉta ndɨ Metusaeli, na Metusaeli abʉkʉta ndɨ Lameki.
19 Lameki ʉva ndɨ boko baba. Bemoti ina ndɨ bɛ Adha na wagɔgɔ bɛ Sila. 20 Adha abʉkʉta mbɛyɨ ndɨ Yabhali. Yabhali nɔ a tɨtakɨ batʉ bi nɨbɔ bubuulyogo banyama na nɨbɔ basyɛgɛ ka bangbangba. 21 Kumbuso yi, abʉkʉta ndɨ mamakɨ bɛyɔ ka Yubhali. Yubhali nɔ a tɨtakɨ batʉ basɨ nɨbɔ baipogo dhʉma na bofyogo mbala. 22 Sila ʉbʉkʉta ndɨ ɨyɨ bomiki baba. Nɨnɔ mʉlʉkʉ yi ina ndɨ bɛ Tubhali-Kaina na mamakɨ mukoyi bɛyɔ ka Nama. Ɨyɨ Tubhali-Kaina nɔ otwogo ndɨ makpʉmʉka masɨ ma ligubho ma bangwɛyɨ.
23 Lameki ʉbɨkya bokakɨ bɛ :
« Adha, Sila, imukononi !
Boko kamɨ, pongoni motili :
Namwi bi mʉmbanzʉ kyɛ beyipi bi,
Namwi bi mʉwanza kyɛ begbiti bi.
24 Kaigiso likosi ko bhulyo ka Kaina,
okwononi kaʉmwɔ bambanzʉ madɨya na ɨka.
Bɛ bigisi likosi ko bhulyo kamɨ,
okwononi kaʉmwɔ batɛkɛbɛ madɨya na ɨka na madɨya na ɨka. »
25 Kumbuso wa masyɛ, Adhamʉ apá ndɨ bata mukakɨ bɛyɔ ka Ɛva mʉma, abʉkʉta miki mʉlʉkʉ yi, alʉka bɛ Seti. c Ɛva abɨkya bɛ : « Iyo bɛyɔ ! Kunzi epini miki nagɔgɔ ka pa ka Abheli nɨnɔ Kaina amwɔ ndɨ. » 26 Seti abʉkʉta ndɨ miki mʉlʉkʉ yi, alʉka bɛ Enosi. Ko ngingo yi nɨnɔ aka nɔ, bambanzʉ bapʉnga ndɨ kakʉnga Kunzi, banamaka bɛ Yawe.