Itmatromlawanni Makdenrer die tulla-sniayanni la makden Israel
136
Ta'uli-tawedia Itmatromlawanni Makdenrer die yoma Endella kalwiedni-paitiotni wawannu.
Tulla-sniayanni nodi liarni pa hadom edon nler etia.
2 Ta'uli-tawedi tsu'ru-tselam la Uplerlawna-Mempulwatnu mak kareh dioini meman la makodi plolli honona maka rimormiori nohkeran di rhoi-rtania.
Ta'uli-tawedi E'a yoma tulla-sniayanni nodi pa nodi liarni.
3 Ta'uli-tawedi tlilili-tmamuau Orgahi-Orha'a.
E' ed makodi plolli la'a mak karuri-kalai honona mak ha riwra la noha utnu-liannu.
Ta'uli-tawedi E'a onnila tulla-sniayanni mak kodi liarni.
4 Ta'uli-tawedi E'a yoma E' ed maka khi' nana hihi'a-yapyapi mak kamehi-kayona maka riy edon ramkek taru pede ema rtaplelleltarga,
onnila E tulla-sniayanni mak kodi liarni.
5 Ta'uli-tawedi E'a yoma E' ed maka kakoki-kayapi lyanti Nnairia E kirkirni-ralma-rior samomuounu,
onnila E tulla-sniayanni mak kodi liarni.
6 La' E yat wamueheni pa Nweran targa nohmarna la gera-tah'i ulatni wawannu,
onnila E tulla-sniayanni mak kodi liarni.
7 E' ed mak khi' nana mak kodia hititni-repreparni mak kdella lyanti,
onnila E tulla-sniayanni mak kodi liarni.
8 De Nhi'a lera pa nodi plolli la leler gahani,
onnila E tulla-sniayanni mak kodi liarni.
9 Me Nhi' wtiona-wolla pa nodi plolli la melmela,
onnila E tulla-sniayanni mak kodi liarni.
10 Nhopna hopopanni-lili'irnu nwenna upa-a'na yanulu la' Mesir
yoma tulla-sniayanni mak kodi liarni la' Israel re rimormiorni.
11 Nodigota Israel la' Mesir,
onnila E tulla-sniayanni mak kodi liarni.
12 Nnairi limni mak karuri-ka'orta,
onnila E tulla-sniayanni mak kodi liarni.
13 La' Laut Gelagah de Nhi'a pa nahniarit la woru,
onnila E tulla-sniayanni mak kodi liarni.
14 Nodia E rimormiorni riy Israel re pa rleret lia walli,
onnila E tulla-sniayanni mak kodi liarni.
15 Mere ray Mesir nora maka'arni honona re rler pa ratpupul wenwenna,
yoma Nsaynia rimormiorni pa nodi liarni.
16 Nodia E rimormiorni pa rala' lola wo'ora-kawur letletna-mdurdurna,
onnila E tulla-sniayanni mak kodi liarni.
17 La'pa Nala ray-ray mak karuri-ka'orta re la yawa,
yoma la'a tniulanni-sniayanni mak kodi liarni la E rimormiorni.
18 Nwunu-nwenna ray-ray orkota-ornanana,
onnila E tulla-sniayanni mak kodi liarni la rimormiorni.
19 De Sihon makden Amori rayni de,
Nwenan nana,
onnila E tulla-sniayanni mak kodi liarni la E rimormiorni.
20 Og makden Basan rayni ho'mana,
Nte'la wenan nan walia,
onnila E tulla-sniayanni mak kodi liarni la E rimormiorni.
21 Ray-ray mak kmati re letni-ruhunni honona de Orgahi-Orha'a Nala la E' rimormiorni,
onnila E tulla-sniayanni mak kodi liarni.
22 Totpena Nhi' gen die la riy Israel,
mak khima-kre' E' de gahani,
onnila E tulla-sniayanni mak kodi liarni.
23 La' pa riy ral it la yawa de,
E' edon Nhoratdoin ita,
onnila E tulla-sniayanni mak kodi liarni.
24 Nwe'er doin it la it arwalli limni ralamni,
onnila E tulla-sniayanni mak kodi liarni.
25 Hare honona makdella nohkeran di wawannu de,
Nalla ra'ana-remnu,
onnila E tulla-sniayanni mak kodi liarni.
26 Mmiai pia ta'uli-tawedi tlilili-tmamuau Uplerlawna-Mempulwatnu makdella tutullu-lolo'oni.
La E' nanpena tniulanni-sniayanni nkokar la lyanti tutullu me nwahipin la nohmarna ga'arni de.
La hadom mana edonna nodi' et lia kalwiedni de ha lolola!!