Nhiar ya'uli-yawedi la Itmatromlawanni Makdenrer die, haleluya!
135
Haleluya!
Ya'uli-yawedi la Itmatromlawanni Makdenrer die!
Mmiai pia tran atulga Orgahi-Orha'a nanni la lyanti!
Miy hononmi mak khima-kre' E'a de mi'uli-miwedia E'a!
2-3 Mak kar lia Uplerlawna roma kreini ralamni de
miy hononmi mi'uli-miwedi,
mhiu'ru-mhielma,
mlilili-mmiamuawua Itmatromlawanni!
Yoma la' Itmatromlawanni Makdenrer die tlernana kalwiedwedni.
Mmiai pia twatunu-twahniar pa ta'uli-tawedia E kotni-nanni yoma sniayni onni E'a.
4 Yoma Itmatromlawanni Nwalir niana Yakop duratni-waitni pa Nhi'a la gah wamueheni.
De riy Israel re er maka Uplerlawna Nhi'a la E rimormiorni.
5 Agat niohora Itmatromlawanni inponni pa Nareh dioin momuoga uplera-upmati re honona.
6 Nhi'a hadom la'a nohkerna-rai miaran di nora darta-lyanti Nlernohor neka E ralma-rior wamueheni.
La' lor la tah'i lawna la'pa tah'i wikni nekane Nhi' emkade wal lia.
7 Nhopna anin lawna pa nlergot la gen miaka Nwahi' tar olekwa,
na'nama wowta-kakma de anin lawna nod lia'a-nod miai.
Nala otna de nodia ihini-turnu na'itar wut nieka hita-tlena kukru-gauru
pa nhi'nande layera ndawar la noha wawannu.
8 Nwunu-nwenna a'na yanulu re honona la' Mesir.
De nwaga la rimormiori pa ntuin la nhiuri-wnia'ana.
9 La' makden Mesir gaini ralamni de,
Nhi'a-nyap nieka hihi'a-yapyapi mak kamehi-kayona mak ktutga Uplerlawna rurni-laini pede ema rtaplelleltarga,
totpa Nwahla ray Mesir nor wutga tniutnu-nhianni nhielli-liarni hihi'ini-yapyapni.
10 Noha-rai liawanni mak kaplin niohora E',
de Nal la yawa
me Nwenan nan momuoga ray-ray lialawna re honona.
11 Emeknekama Sihon makden la Amori rayni,
me Og makden la Basan rayni,
me la' walia ray-ray nio'a Kana'ana re honona.
12 Totpena nohoni-raini re honona Nala la E rimormiorni,
de rla' Israel gahani momuoga.
13 Matromlawnu ne!
Makdenreri O'a!
O nanmu de riy rwahaur nohora la meni-meni maiya noh maran di wawannu,
me hota edonna rhoratdoin etia O nanmu della pa nodia la tuwu-tuwu.
14 Yoma Omuodniana rimormiormu mak kakleh hala,
me la' walia Mtiulla-msiaynia riy maka khima-kre' O'a.
15 Mak kden la noha-rai re rhi'a-ryapia leli-maha pa rwal lia uplera-upmati totpena rwaltiora-rwaltieman la nayanni.
Uplera-upmati re,
rira rakoki-rayap nian to'a re.
16 Rhi' uplera-upmati re de rodia nurnu,
mere edon raltieri,
rodia matni mere edon ramkek nana hadoma.
17 Rod wialia tlinni mere edon ratlin eti.
E rakleh memna aranni!
18 Eee!
Hota mak khi' nana uplera-upmati re pa rha'ar aranni la
hota rwal lia hamamuamua emeknekama ir uplerni-upmatni!
19 Israel miy re!
Mmiai pia mi'uli-miwedia Itmatromlawanni oo!
Harun duratni-waitni mak kla krei o'tani-matni (imam-imam),
mmiai pia mi'uli-miwedia E' Makdenreri E'a.
20 Riy Lewi hononmi mak khima-kre'a imam-imam la Uplerlawna roma kreini nayanni mia mi'uli-miwedia Itmatromlawanni Makdenreri de.
Miy hononmi mak ka'unni-kamta'ata Itmatromlawanni,
mi'uli-miwedia mlilili-mmiamuau Orgahi-Orha'a Uplerlawna-Mempulwatnu la' genni-tienni.
21 Mi'uli-miwedia Itmatromni la' Sion,
de la' Yerusalem,
maka Ha Ndella de!
Haleluya!
Ya'uli-yawedi la Itmatromlawanni Makdenrer die!