Sniumbain totpena Yerusalem nler la kalwiedni
122
Nhiar maka rwatunu-rwahniar la'pa rha'at la wo'or wawannu pa rla rkola tieru-rawur nehla la Itmatromlawanni la'a letlawna Yerusalem (Nhiara Ziarah Daud):
A ralmu nahepur doin la yoma riy rakot la mai a'u,
riwra:
“Mmuai pia it tla'a Itmatromlawanni roma kreini!”
2 Pede dodo'ondi de ammai
pia mpakrian olek la Yerusalem puohra lawanni onni wa.
3 Rariria let lawna Yerusalema de rwahipni-rwalapar watu
pa ra rwed lutru totpena naruri-nalai.
4 Hota Israel luwnu-a'nani honona rmai handi,
de luwu-a'na mak Itmatromlawanni Nwaliri-nwatoha.
Rma ra'uli-rawedi Itmatromlawanni
rlernohora hya' ed maka Itmatromlawanni Nakot targ' oleka la Israel duratni-waitni pa rhi' nana.
5 Hota la' handi ed maka Daud duratni-waitni ray-ray re
rtorna watghudi la'a limni-rorni re honona.
6 Mmiai pia tsumbain la Yerusalem totpena hota nler la kalwiedni-paitiotni.
Twak de riy honona mak sukni la Yerusalem rler la mtiertierannu.
7 Twak de riy mak kdella letlawna Yerusalem weranni-plahwani rler la kalwiedni-paitiotni.
La'pa la'a riy mak kodi plolli genni-tienni la hande wali hota emkade wal lia.
8 Yoma asiayni a mutwua'lu-lawa'lu ror wutga mu'tu-rah'u honona mak kden hande,
pede awuak la Itmatromlawanni giwra:
“Matrome! Mual rimormiori mak kdella Yerusalem ralamni totpa rler la kalwiedni-paitiotni!”
9 Yoma la'a Orgahi-Orha'a Uplerlawna-Mempulwatnu maka itkola tieru-tawur nehla de romni nayarir olek la Yerusalem
pede asiumbaini totpena Uplerlawna Nal Yerusalem pa nler la pripanni-fa'anni.