Orgahi-Orha'a hota Nhudi-npara nohkerna-rai miaran di
96
Itwahniara nhiar warwuaru la Itmatromlawanni Makdenreri.
Nohkerna-rai miarna heri-woru lyanti nayanni twahniara la E' mak kden la tutullu-lolo'oni.
2 Twahniar la Itmatromlawanni de tala nhiar ya'uli-yawedi,
ne la' lera-ler nekpa takot nohora lir yamuki-yahepru,
yoma Enamori-nalewn olek it wa.
3 Takot nohora E tullu-petanni la'a noha-rai re honona mai noha wawannu,
me takot nohor walia E tulanni-kniarni mak karuri-kalai,
la'a rimormiori nohkerna wawannu.
4 Yoma Itmatromlawanni inponni,
me ya'uli-yawedi nden rer lia E'a.
Ne la E' nanpena rimormiori ra'unni-ramta'ata de nareh dioinia marna ornoha-orrai.
5 La' noha-rai dom to'a la noha wawannu,
de rhi'a ir marna ornoha-orraini de rakoki-rayap niana la watu onde au.
Mere Orgahi-Orha'a de ed mak khi' nana darta-lyanti nohkeran di.
6 La E'a,
de hitita-reprepra nor wutga preheni-mkaini.
La' E romni nayanni de tamkek nan memna E plolli-mneheni rurni-laini.
7 Miy hononmi mak kwatiawua noha-rai honona,
mi'uli-miwedia Orgahi-Orha'a onnila rurni-laini mak kamehi-kayona.
8 Mi'uli-miwedia kotni-nanni la genni-tienni,
me todia nhiurliwtu-wnialodaw la romni nayanni.
9 Mmiai pia ita'uli-tawedia Itmatromlawanni Makdenreri.
E' de Uplerlawna mak oliet memna la do'a-hala.
Ha inponni Narehi-nalawna eee!
Nohkerna-rai miarna honona mi'unni-mimta'ata E'a.
10 Mikot nohora la noha-rai nor wut nieka leta-leta re de Itmatromni Nla' oleka Ray pa Nodi plolli.
Nhi'a pa nohkerna-rai miaran di naruri-na'orta pa hadom edon nawo'la.
Hota E' ed mak ktorreria watghudi lokarni de Nhudi-npar la plol wawannu.
11 Nohkerna nora lyanti mihepur pa mniehu-mtiera yoma mimuki-mihepru.
Hletan lawna-yoir lawna mior wutga mniotmi mliekur-mgiaur la genmi mi'uli-miwedia Itmatromni.
12 La'pa wo'ora-kawru,
mior wutga mniotmi,
de yawulli-yatniamni orun lawna-au liawna mmiai pia mpio'la-mpiaini,
mkiahyoi-mkiahyai pia mpiakieh nohora nhiarmi la Uplerlawna.
13 Yoma hota Orgahi-Orha'a Nwatiaga Ilyamou-Watyatoha pa Nma Nodi plolli la'a nohkerna wawannu.
Hota E' ed maka ktoran reria watghudi la noha-rai honona la nohkerna wawannu de edonna npa'ei-npahal eti.