Nhiar ya'uli-yawedi nhiu'ru-nhielma
95
Mmiai pia twahniar nohora Itmatromlawanni Makdenreri.
E' ed mak kruwun reri-ka'ahla reri ita.
Trarni-trarin nohora it yamukni-yaheparnu la E'a mak kod it la yamori-yalewna.
2 Mmiai pia tala kieha-nhiara ta twatroma-tahneiya,
pa ta'uli-tawedi E'a yoma hya' maka Nhi' nan oleka la mai ita.
3 Yoma Itmatromlawanni Makdenrer die,
Uplerlawna-Mempulwatnu inhatta.
E' de de Ray miaka karehi-kalawna,
Nareh niana marna ornoha-orrai honona re.
4 E' mana Nod plolli la noha uwarnu-rai ga'arni
pa nodia la wo'ora wuranni.
5 Plolli-mneheni ndawar la lor gahani,
yoma E' nanpena ed maka khi' nana,
nor wutga ra' gahani re honona de E limni enni.
6 Mmiai pia it hononita tsu'ru-tselam la Itmatromlawanni nayanni
yoma E' ed maka kakoki-kayap nian ita.
7 E' de Uplerlawna maka itkola tieru-tawur nehla.
E' ed maka ktera-kdem reria ita,
emeknekama dum maka Enheri-nlaiya.
La'pa mitlin nana Uplerlawna lirni la' lera-mela ri,
8-9 de yan mememna miy o'ta tehra
pa emekneka upmi-tgarmi la Mariba me Masa,
la' ler maka rta'aga me rtot ma't A'u,
yoma rmalawan pa rtut o'ta kpaunu la A lia wo'orletna-kawurloini
kennama ramkek nan oleka A hihi'u-yapya'pu mak kamehi-kayona.
10 La anni terampwogat memna,
A'uwenan la ira
pa A'ukota giwra ir ralamni rod rer mia'ta la dodo'a-halala
pede irakleh oleka tlina-tail la'a A li'ru-tu'nu.
11 Pede A'uwenan pa Aliokra re giwra:
“Hoi!
Hota miy edonna mliernana gen miaka A'ukottarg oleka la riy totpa hota ror A' pua mren ami la geni kalwie'du.”