Nhiar mak ha ra'uli-rawedi Uplerlawna
92
Hadi de nhiar ya'uli-yawedi maka ha rwahniara la Sabat lerni:
2 Plola!
Lol talanni pa mpahniara pa ma'uli-mawedia O'a Matroma.
O' di de,
Makdenreri O'a,
Uplerlawna-Mempulwatnu Makdella Tutullu-Lolo'oni!
3 Hota lol talanni pa amakot nohora O tniulanmu-sniayanmu mak kodi liarni,
la' yawyawar ralamni,
me la' melmel ralamni ampahaur nohora
la' emkameni la hya'-hya' honona maka Omukottaru re Omhi' nan momuoga.
4 La'pa amakot nohora O kalwiedmu-paitiotmu de,
amala hitara-fiola tiwla-prai ma mamuki-mahepur nohoru.
5 Yoma tulanmu-kniarmu ed maka khi' a pua umuki-uhepru.
Awuahniara yoma uhepur nohora hihi'mu-yapyapmu re.
6 Matroma,
O'a de Makdenreri O'a!
La'a hya' maka ha Mhi' nana re,
ramehi-rayona e!
Wniarormu-wnialaimu,
rimormiori ta'enniana rwaror nana re.
7 Hota la riy mak kpodku,
de raplin niohora,
me la'pa riy mak kaplinu-kaplo'a de hota raplin niohora loini-talanni.
8 Raplin niohora de,
la' emkameni ho'mana riy yatyata re emeknekama wewnihi maka kpoti-kadwu pa yeher to'a pa rler la pripanni-fa'anni,
de hota rwaldioin la de rler la wnieyata-wnianiawu matmiati-molmuolu.
9 Mere O'a de Orgahi-Orha'a mak kodi plolli pa nodi liarni.
O' de Makdenreri O'a.
10 Amatga Matroma hota O arwalmu re rakniuhi-rahnio'or la genni.
Riy yatyata re hota knunu-knera.
11 Omhi' a' die a ru'ru-la'yu emeknekama orpau puora,
me Omhuri wu'ru la a o'tu pa Mtiera-mdiem a lia pripna-fa'ana.
12 Alina-muat memna a' arwa'lu,
mak khi'inde kaprir pia kmer-kmer temn a'u re
rawlar diodioinia genni-tienni yoma Uplerlawna Nal ir la yawa.
13 La'pa he' ed maka kden la ploini-ple'erni de hota emeknekama korma maka ka'uhwu plele'era,
ne mormiorni emeknekama agari on lalawan mak kden la Libanon.
14 Tamkek la de emekwalima ora-au mak ha rtamin la roma krei onni
pa npoti-nkaduw la Uplerlawna romni herni-gaini.
15 Hota ir emolmolan nekama orwo'a-awuo' mak kawo'ol la'a tuwnu mahnek oleka la' annia ululu memna,
mere e npoti-nkaduw nohor ma'ta uhwanu-tawnu pa nodi liarni.
16 Hota riwra:
“Itmatromlawanni de Makdenreri E'a,
Nden nek la plol wawannu.
Edon Nhi' hya' mak edon kaplola.
Ne E' ed maka kruwun reri-ka'ahla reri a'u”.