Rsumbain pa rwaka ruri-lai la Orgahi-Orha'a
70
Nhiar maka ha rala la mak khi' o'ta la mak kwatunu-kwahniara.
Daud polpuollu-wakwakni la'a ler mak e rala hoihoi-tantiani la Uplerlawna totpena rhoratreria:
2 Orgahi-Orha'a Uplerlawnu ne!
Mumori-mulewn a'g ee!
Makdenreri O'a!
Pleta-plet pa Mua Mtiulan mai a'u.
3 Muolin doinia totpena riy meni mak kiwra kwarora-kwalaiya a matmia'tu hota ratowra re,
ne komu-kamua pa emeknekama dudunti-wetwetria la genni-tienni.
Muolin doinia la totpena la' riy mak krarin nohora a su'su re de,
rleran doinia re pa rwaliahokra totpena ramola-rama' targho'a re.
4 Muolin doinia pa riy maka kahe'i-kamali a'u re,
gaini rwahra onnila ral olek ir la yawa nhi'nande rmola-rma' meman wa.
5 Twak de riy honona mak kola tieru-kawur nehla la O'a
rahepur nande neniehu-tertera,
onnila O hihi'imu-yapyapmu re.
Twak de mak ka'uli-kawed reri O'a,
onnila Mumori-mulewn ira,
hota rarin-rarin reria pa riwra:
“Plola,
plola,
Uplerlawna nanni ed mak kden la tutullu-lolo'oni!”
6 Uplerlawnu ne!
Alier olek la sniusa ralamni pa ukleh olek ruri-lai wia.
Pleta-plet pa Mua Mtiulan mai a'g e!
Matroma Makdenreri O'a!
O' nanpena ed mak kodia a lia gera tlinni-ai aratni.
Matrome!
Yan Muolin limmu mai a'u.