La'pa rler la kropna-krieutu noma rsumbain la Itmatromlawanni.
69
Nhiar maka ha rala la mak khi' o'ta la mak kwatunu-kwahniara.
Hota riy rwahniara de rtotnohora nhiara nialoini maka ha rweta la:
“Bunga bakung”.
Daud nhiarni hadi:
2 Uplerlawnu ne!
Mumori-mulewn a'u
yoma gera nlol oleka a tie'ru wa.
3 A la'ku e nwatro' tar lia loka-da'la kpapuau ralamni.
A'g edonna ghapar nana tertehrani,
pa upupul tar lia gera letgarni.
Wawuau nodi a lia'a meti rieini-rie'wani.
4 A'g e ghaun nande uple'er tar lia a ge'nu,
ne a tier riokro'ku nkerna nhaug' olekwa.
A yamke'ku la a ma'tu de emeknekama hayai oleka wa
yoma mowen nianpena a Uplerlawnu Nma Namori-nalewn a'g o?
5 Riy harahu sukni tia'ala mai a'u,
mere rakleha nhiapargen wia.
Ir de de,
rira liawanni memna de takeni rrekan nana liawanni.
Liawanni rareh dioinia morat no'a a o'tu.
Rodi rurni-laini pa riwra rwehwa doin a lia.
Rler pa rmai die rwohor weyata-rtatar weyat a'u rnairia lir mak edon kaplola.
Rteran nihini pa agala a hyo'nu-hya'nu la' ira
kennama a'g edonna kamna'a re.
6 Uplerlawnu ne!
O' nanpena ed mak klina-kmata a wniehwa-liaktu mak edon kaplola.
A do'u-ha'lu id mana edonna nayade'et lia O'a.
7 Yana Muolin doin a do'u-ha'lu re pa rhi'nande riy maka kha'ara mormiorni la O'a re rler la molmola-mama'a,
Matromlawnu ne!
O' de Orgahi-Orha'a Makodi Plolli la Haneknek Wawannu!a
Yan Mual a' pua ghi'a riy maka khu'ru-khelam la O'a re rakleh oleka hormata-kanala.
Yoma O' de rwet la Israel Uplerlawanni.
8 Riy rapolu-raliell a'u onnila aliernohora O'a.
Me la O' pede riy rwohor weyata-rtatar weyat nan a'u.
9 Agora a i'nu na'ru-a'mu hya'lu de,
a'g emeknekama do'ona-dakna dom to' a'u.
Agora a ka'ku me a ga'ru de emeknekama dom a'nani to'a.
10 Mak a ralmu ha nko'i reria de totpena O rommu ed mak rimormiori rnairia pa rkola tieru-rawur nehla nek tiy O'a Uplerlawnu ne!
Ne maka a ralmu nko'i reria de hota nod a lia yatyatni-halalli yatlorni-yatra'ani.
Yapolu-yaliella maka ha rakota tiy O' de
ha ntuin mai a'u.
11 A'g e utahan la'a ya'ana-yemnu la'pa a lu'yu nernu,
mere ha nareiniande rhi' a lia yatot niha-yawedi ltieri.
12 Aniairi rain yaluli-yahona la a' ino'nu
mere rahe'i-ramali a'u.
13 La'pa rawoka-rale'u die rkeni a lia nurnu tutnu.
Riy mak kemun arka pa rma'wu rwatunu-rwahniara,
de rhi' a lia'a nhiara.
14 Mere asiumbain la O'a,
Matroma.
O' ed Makdenreri O'a!
Uplerlawnu ne!
Mtiulan pa Mpuahla nana a polpuo'lu-wakwa'ku la' ler maka Ompualir niana.
Mtiulan la mai a'u emekto'ama Mukot targa oleka,
Matroma,
Yoma la' O' nanpena rlernana sniayni onni ga'arni.
15 Yana Mual a' pua tiepar la loka-da'la letgarni.
Mulewna a lia'a riy mak sukni tia'ala mai a'u.
Mumori-mulewn a lia gera mak klol oleka a tie'ru wa.
16 Yana Mual a' pua wawuau meti nhia' lawna nado'i a'u,
pa nhi'nande utniepar la gera wikwikni.
Yanpa amuati pia alier la hu'ula-liena kdieldelma.
17 Mpuahla la mai a'u,
Matroma!
Yoma la' emkameni ho'mana sniayni onni-ga'arni de O'a.
Mtiulan pa Mpual lia matmu mai a'u Matroma,
yoma O sniayanmu de.
18 Yana Mude'a gaimu mai a'u,
O hopopanmu di,
yoma alier la klieratni pa a ralmu nsus doin la,
pa Muplet pa ma Mtiulan mai a'u.
19 Muai pia Mulewn a lia'a
a arwa'lu re honona.
20 Matroma!
O' orgahamu Muat niohor oleka wa la a mormio'ru di
de lir yata-tun yata mai a' di de lawan rehia yoma la' a' arwa'lu re.
Mumkek oleka ira nhiolli.
21 Lir yamola-yama'ani rhi' nan a' di de muadwie'er memna.
Awuakwak pa rtutga tniulla-sniayni mai a'u ho'mana edonna liernana.
A'uhaka rira pa rhi' a ralmu pa namtiernu
mere riy id mana edon nhe'du nana a wakwa'ku.
22 Mak kareh wial die de rtot a' pua rala tapra ernu (racun) pa a'una,
me la'pa a tie'ru kerna noma rala sidu pa agemnia.
23 Miollia pa irora talanwalli re mukni-heparnu ya'anlawna-yemunlawna
plinu-plinnianama rwal lia klierat lawna.
24 Muollia totpena yamkekni re rmela-rka'ara,
me totpena nehlani rora onni re de emeka ra'it nana.
25 Matroma,
Mukmua re la yawenan lawanmu.
26 Muolin doinia re yeheni mana rdi'na,
lia'arni mana rlo'wa.
Ahu edonna ntowru.
Hiwi edonna nkukule'a (Genni nahgali ne riy edonna rdella).
27 Yoma ir edon rtutga sniayanni la riy mak kler la sniusa ralamni
mere rwaldioin targho'ola pa rnahora-rnala'a riy maka Mukmu olekwa
me rapupu-raheria riy maka ha Muolin doinia pa rler la kropna-krieutu.
28 Pena Mumkeka do'oni-halli maka ka'ititar rer lia
pa yana Mhuoratdoinia la.
Yana Mumou-muwitna do'oni-halli re.
29 Hota Mhuap doinia ir nanni la puk maka e rhorat targa mak hota mormiori aplahwa re kotni nanni.
Yana rtapal nanni rella' riy mak kdella plol wawannu re kotni-nanni temanni.
30 Mere la'pa a' di Matroma,
ir rutni-rdahl a' pua a' ino'nu ramehra-ramau muemna.
Mrian a'u Matroma!
Mumori-mulewn' a'u.
31 La' hade pede hota u'uli-uwedia Uplerlawna de aniairia wniatunu-wniahniara.
De wuahniar de,
a'ukot nohora E plolli-mneheni me kalwiedni-paitiotni.
32 Hade ed mak Itmatromlawanni Makdenrer die,
ralamni ha nala.
Ematia'ama rala hayori-orpau,
mak ha rwalir niana pa rhi'a nhioi-tniani,
pa ra rwaka tarima kasi lalawan la Uplerlawna.
33 La'pa ramkek Uplerlawna hihi'ini-yapyapni de hota mak ha rutni-rdahla taru re kaniha-kamalia la yahepru.
La'a riy maka khu'ru-khelam la Uplerlawna de ralamni raruri owa'an la Uplerlawna.
34 Yoma Itmatromlawanni Makdenrer die,
Natlin la mak kler la sniusa ralamni.
E' edonna Nhortaplinga rimormiorni maka ha rtoran nana.
35 Lyanti nora nohkerna rai miarna lor gahani-ra' gahani
hononmi mi'uli-miwedia Orgahi-Orha'a Uplerlawna Mempulwatnu.
36 Yoma hota E' ed maka kamori-kalewna makden la Yerusalem la'a arwalli re
me E' ed maka Nariria owa'ana leta-ruhun mak kdella Yehuda nohoni.
Hota Itmatromlawanni rimormiorni mak kholi-klet la hande
totpena nohanna-taniarat de ir gahani wa.
37 Ir upni-a'nani duratni-waitni rden walia hande pa nodi liarni.
Riy mak ralamni rapal niana Uplerlawna er maka kholi-klet la geni-tien de wa.