Nhiar maka rwak pa rimormiori nohkeran di honona ra'uli-rawedia Uplerlawna
67
Hadi de nhiar ya'uli-yawedi maka ha rala la mak khi' o'ta la mak kwatunu-kwahniara.
Rwatunu-rwahniar de rnairia hitara-fiola:
2 Uplerlawnu ne!
Awuak de pena O' ed maka ksayn am pia Mura'a-mupalg' ami.
Awuak pa Mhuria ralam kalwiedmu mai ami.
3 Demade Matromlawnu ne!
Yala'amu de,
rimormioria mak kden la noh di wawannu de rat niohora.
Ne mormu-lewanmu rayamkek meman la'a rimormiori nohkeran di honona.
4 Matromlawnu ne!
Awuak pa riy mak kwatiawu hairi-hairi me noh pa'etu-rai piatatra rora leta-leta honona rlilili-rmamuau,
ra'uli-rawedi O'a.
De la'a riy honona la' nohkeran di wawannu ra'uli-rawedia O kotmu-nanmu la genmu-tienmu.
5 Mpak de rimormiori noha wawannu honona ramuki-rahepur nohora ya'uli-yawedmu.
Yoma kniukmu-tnio'mamu ndella plola wawannu la riy honona la' nohkeran-rai miaran di,
me la' hairi-hairi re honona de Omtiutga talan mak kaplola la' ira.
6 Matromlawnu ne!
Awuak pa riy mak kwatiawu hairi-hairi me noh pa'etu-rai piatatra rora leta-leta honona rlilili-rmamuau,
ra'uli-rawedi O'a.
De la'a riy honona la' nohkeran di wawannu ra'uli-rawedia O kotmu-nanmu la genmu-tienmu.
7 Nohkeran di nal oleka wullu-we'elli mai ita.
Ita Orgahi-Orha'ani Uplerlawna Mempulwatnu Nal oleka himni-re'eni mai it wa.
8 La' hade pede awuak la' noha wawannu-lyanti ha nkadkaduw di mniotni,
rimormiori honona rtuk pua rru'u-rtowar momuou lia E nayanni.