Rala wniahniara ya'uli-yawedi la Uplerlawna onnila tniulanni-sniayanni
66
Nhiar ya'uli-yawedi maka ha rala la'a mak khi' o'tani la mak kwatunu-kwahniara:
Riy makdella noheri woru-lyanti nayanni de,
mmiai pia trarin la wniatunu-wniahniara
pa ta'uli-tawedi Uplerlawna-Mempulwatnu!
2 Twahniar pa ta'uli-tawedi tlilili-tmamuau E nanni la'a gen tutullu-lolo'oni.
3 Takot la it Uplerlawanni de tiwra:
“Ama'uli-mawedia O la' genmu-tienmu,
yoma la'a O hihi'imu-yapyapmu mak kamehi-kayona.
Arwalmu re ramta'at wenna la O gaimu ralamni pa ra raro'wa nan memna,
yoma hota he' ed maka katowar nan O'a?!
4 Mai nohkeran di wawannu de honona rhu'ru-rhelam la O nayanmu,
pa rwatunu-rwahniar nohora O kotmu-nanmu.”
5 Mmiai pia mimkek la Uplerlawna hihi'ini-yapyapni.
Plola!
Tulanni-kniarni re de namehi-nayon meman la rimormiori it wawannu.
6 Tamkek to'ola!
Tah'i lawna nwal lia noh kerkerna
pa nhi'nande a' up mamni-tgar mamni rala' lol wawannu de lakni edonna rpe'era.
La' hade pede am mamuki-mahepur nohoru.
7 La'pa Ntorna-nraut de Nodia plolli-mneheni nora rurni-laini pa nodi liarni.
E Namkek rer niek la riy mak kwatiawua noha-rai re honona,
totpena mak kmalawna re yana rpo'on inonni la E gaini ralamni.
8 Riy mak kwatiawua hairi-hairi nor wutga noha-rai piatatra miy re!
Miai ee!
Mmiai pia mior wiutga am pia trarin pa ta'uli-tawedia tsu'ru-tselam la' Uplerlawan mamni.
9 Hade ed mak katiak oleka am pia totpena yana ammati.
Edonna Nolin limni la mai am pia amtuini-mdai.
10 Uplerlawnu ne!
O' e Mtiag' olek am
pia emolmola mak khuri-kwewal maha e nker doinia mah wawahra kdeheni.
11 Omuolin doin am pia mler tar lia tniokla,
me Mual am pia makwar nana wutwutu-kokgohu werwerta.
12 Ne Mual am pia arwal mamni re rwatei-rwahapr' ami,
ne am mahler lola ger wawuau nora ai mormiori ralamni.
Mere la'pa dodo'on di de Omuodi olek am pia mai owa'an la geni miaka kpehera-ktar lia'a hya'a-hya' to'a.
13 Hota alia O roma kreimu nayanni pa agodia hoihoi-tantiani maka ha rtunu-rharna la katri'ana wawannu pa u'uli-uwedi O'a.
Yoma a'uno'targa la O'a la' ler ululu de la'pa Omumori-mulewn a'u de hota aghi' emkade.
14 Nnio' de de a'ukottarg' hade la' O'a,
la' lerni la adien la kropna-krieutu ralamni.
15 La' hade pede la ler di de agala pipi-duma mak molmola nanpena atiorna pa alie'era la ai kwiari taranni,
me wuakloli sapi nor pipi-duma la katri'ana wawannu,
totpena huwnu-odawni la iranmu,
me rarni ntur lia gaimu ralamni.
16 La'a riy mak kola tieru-kawur nehla rer lia Uplerlawna
de mia mitlin pa ukot nohora
hya' maka Uplerlawna Nhi' nan olek la mai a'u.
17 De a ghaunu-ghaun olek pa wuaka tniulan la E'a,
ne u'uli-uwedia la genni-tienni.
18 La'pa riwra a' di de nhi'inde a su'ku la wuarora-wualaiya yatyatni-halalli mana
takenniana Itmatromlawanni Ntailla a polpuo'lu-wakwa'ku la E'a.
19 Mere la'pa a li'ru nhar wia dewade la'a hya' maka awuaka re de,
id mana edona Nwayotlia.
20 La' hade pede,
u'uli-uwedi rer Uplerlawna,
yoma E' edonna Nwayotlia a wakwa'ku la E'a.
Mere Ntut rer nieka tulanni-sniayanni mai a'u.