Rsumbain pa rwaka tniulan la Itmatromlawanni Makdenrer die
35
Daud wniatunnu-wniahniarni:
Matroma!
Mlier temna riy mak kler temn a'u re.
Muora riy mak kiwra kor a' pua ka'ara re!
2 Muala keki-rawatmu
pa ma Mtiulan nan a'u.
3 Mrian la tera-ra'pa wehla-ta'wa
pa Muora ir pa miwunu-mi'ara,
yoma e rhokra-rlai a' di le!
Matrome!
Awuak pa orgahamu Mukot la mai a'u Miwra
hota O' ed mak ktulan mai a'u totpena yana umta'ata.
4 Muollia!
Totpena mak kiwra kwenn a'u re rmadwie'er la genni,
totpena rler la yapolu-yaliella me molmola-mama'a,
de mak kawok pa kiwra kler temn a'u re
hota hakomu-hakamua pa rmola-rma' nande rod wikni de rmeh'a rahihi'a pa dudunti-wetwetria.
5 Muolin doinia la,
pen neka Matroma hopopanni-lili'irnu de mak khokra-klaiya re
totpena rawlar niande emeknekama hakowu mak anni ha nteni arauria.
6 Rolin doinia re pa Matroma hopopanni nhokar madwie'er targa re
pa rler tar lia melmelli-kalkalamni pede rwasyoru-rwasye'er pa rtuini-rdai.
7 A'g edon ghi' hadomdoma mere rwerat taru tniokla pa ra rwei a lia'a talla pniahakarni.
A'ukleha do'a-hal la ira,
emkade ho'mana rahia hu'ula totpena alier tar lia ralamni.
8 Ndella pa plin-plinnianamde ir orgahi rler targ' owa'an la hu'ula-kriaw maka ha rah' niana re.
Muollia pa orgahi re raprehen la rwe'ela tniokla-rhedga rapra'pa pa ir orgahi ed mak klernan owa'ana,
totpena orgahi rtamni' owa'ana orgahi.
9 A ralmu niniha-malmiali yoma Matroma ed mak kamori-kalewn a'u.
10 A ralmu naplele'er pa agiwra:
“Matroma!
La' O' de riy id mana edonna nlola O lokarmu.
Yoma O' ed mak kanawar doinia riy maka kakleh ruri la' riy mak karuri-kalai,
me la'a riy mak kakleha-kaplara rora mak ksus la'a riy mak kwarui-kwate'la ira hyonni-hyanni.”
11 Mak ktutrier niohor a'u,
de rodia lira tukla-wahla pa ra rtot a lia klieratni.
Rwaghal a lia'a hya' maka a'uplin niohora.
12 A kalwie'du re de rala te'a ra rwahla,
pa nhi'nande a'g ed emeknekama mak khudgaur tar lia'a ralma-rior maka kawlari olek la' temni wa.
13 La' lerni la ir rsaki de a'g e niaria naniairi yaluli-yahona me utahan lara
totpa ariu'ga o'tu pa asiumbain rer lia Matro'mu.
14 De emeknekama a'g e siumbain nohora a i'nu-na'ru
onde a yahe'wia'lu doma.
A lului-nurnuhru nohora,
de emolmolla alului-nurnuhru nohora a i'nu mak kayor nian a'u.
15 Mere la'pa asius wa noma niniha-malmialia re,
me rawok pa rler temna a'u.
Do'ona-dakna mak a'uplin mua't ira,
rma rapolu-raliella rahe'i-ramali nek a wua.
16 Mak edon klernohora Uplerlawna re rahe'i-ramali rapolu-raliell reri a'u,
me ramkek la mai a' die gaini re rpetan wenna.a
17 Noma apuol lia O'a,
Matroma.
Hota mowen niana Matroma,
mowen niana?
Hota O matmu de nwer rer tio' pa nkeran tar lia genni?
Mulewn a'u totpena ir mana rollia a'u,
Matroma!
Muollia a lia'a ohpora-ahdiawra re.
18 Totpena a' muana asiumbain la O'a,
Matroma la'a O mutmu-rahamu re honona gaini ralamni
pa a'u'uli-uwedia O la'a mutmu-rahamu mak kawok taru-kale'u taru pa ra'uli-rawedi rhu'ru-rhelam la O'a.
19 Mere a' arwa'lu re rahankeran rer miai a' die,
mere a'g edonna ghal nohor hadomdoma.
Matroma!
Yana Muolli a lia pa ir rahe'i a'u.
Yana Mumkek reri a' pua ir riarni-riarin nohor a'u.
Irahankeran la mai a' die rakleha wniatikilgeni.
20 La'a ltierni re nek de rtutga hankerna-ralmha'ara ne rwaror mamainia kdiori-kdieha
la riy maka mormiorni kalwieda-paitiota (samoga) pa edon nor targa rimormior wialli rawenan wutu.
21 Polpuolu-hawaunia re pa rakot mai a' pua
riwra ir ramkek oleka a hihi'u-yapya'pu.
22 Mere O'a Matroma,
orgahamu Mumkek memna.
Yana Mherer niek wa Matroma!
Yana olie'tu mai a'u Matroma.
23 Mumat pa Muodnian a'u Matroma!
O' de a Matro'mu O'a,
a Uplerlawnu O'a pa Mtiulan la mai a'u.
24 Uplerlawnu ne!
O' de Matro'mu Makdenreri O'a!
Muodnian a'u pa Mukota de a'g ukleha do'a-hal la,
yoma O' nanpena plolli ed meman la O'a.
Yana Muolin doinia arwa'lu re riarni-riarin nohor a'u.
25 Yana Mumkek rer niek pa rakot la ralamni riwra:
“Trima kasi lalawna,
ital oleka e la' yawa,
pede it ralamni ramtemna.”
26 Muollia pa riy mak kahepur nohora a su'su
hota rwal lia'a riy mak khakomu-khakamu pa rler la molmola-mama'a ralamni.
Ndella pa riy maka kpo'ona-krak nohora inonni mai a'u re
hota rlernana yapolu-yaliella me molmola-mama'a.
27 Awuakwak de la'a hameni mak ralamni nahepru yoma Itmatromlawanni Netlia de adien la plol wawannu,
de hota riarin la haleluya-haleluya!
La'pa rakot reria:
“Plola Itmatromlawanni et la'a tutullu-lolo'oni!
E' ed mak kahakhak reria mak khima-kre'a E' de nler la kalwiedni-paitiotni.”
28 Pede hota a'g ed mak kakot nohora O plolmu-mnehemu,
me a'g ed maka ka'uli-kawed reria O' pa nodi liarni.