Ya'uli-yawedi onnila Itmatromlawanni Makdenrer die, kalwiedni-paitiotni
34
Daud nhiarni la' ler maka ntotpa nga'u la'a Abimeleka gaini ralamni noma rhokar doinia pa nla'awa:
2 La'a lelera-melmela de a'u'uli-uwed reri O'a Matroma!
A'g edon rien a lia ya'uli-yawe'du!
3 A'ukotkot rer nieka Itmatromlawanni Makdenrer die,
hihi'ini-yapyapni totpena la'a riy rterna la yawa mana
la'pa ratlin nana hya' maka a'ukotkota ri,
de rler la yamuki-yahepru.
4 Mmiai pia it trewre'wa pa tran tutulga Itmatromlawanni la heyanna
totpena nanni nden rer lia ya'uli-yawedi.
5 A siumbain la Itmatromlawanni,
de Nwahla a li'ru.
Me Namori-nalewan a lia hare honona mak khi' a' pua umta'ata.
6 Mak kha'ar aranni la Itmatromlawanni rden rer lia yamuki-yahepru.
Hota ralamni edon rmawlaa yoma plol toto'a pa Itmatromlawanni Nhi' nan hya' maka Enakottarga.
7 La'pa a' die mak ha rteran reria la' yaw de puolga Itmatromlawanni Makdenrer die,
de Itmatromlawanni Nwahla nan a'u,
ne Nanawar doinia a lia' wutwutnu-kokohonu re honona.
8 Itmatromlawanni hopopanni de natiak reria riy mak katlina-kataili ka'unni-kamta'at E'a.
Ne Nolin doin ir la'a yatyatni-halalli.
9 Pen neka orgahami mi'eram rer nieka Itmatromlawanni de kalwiedni la miy orgahami.
Yoma he' ed mak kakruwun reria la E nayanni,
de hade ed mak klernana unut lawna.
10 Riy mak kla' oleka E mutnu-rahanu de miatu mi'unni-mimta'ata mhiu'ru-mhielam rer lia E'a.
Yoma he' ed mak khu'ru-khelma de,
hota Nhuri-ntowria ra'ani-pallu la' ira totpena yana rakleha-raplara.
11 La'pa ohpora-ahdiawra mak karuri ho'mana rakleha yamananni.
Mere la'a riy mak katu kha'ar aranni la Itmatromlawanni de hota Enala ha samomuounu la ira.
12 La'pa upa-a'na miy hononmi de mmiai pia mitlina a wniatu'tu-wniaye'u la miy
totpena miatu mitlina-mitail la'a hya' maka Itmatromlawanni ha Ne'er targ' olekwa.
13 Riy maka kiwra uhwanu nwalapi me ga'arni nwahipni
totpena ndunit nana-nwetur nan pripanni-fa'anni,
14 de natiak nurnu-tiernu totpena yana nhi'a nur ghala-tier ghala
onde ohpa-lahara,
klili-kdiori.
15 Nhopliala yatyatni-halalli,
ne nwehwa-nlakat la kalwiedni-paitiotni.
Nwahakhak toto' memna totpena yan nora riy dom to' pa rawunu-rawenna.
16 Yoma Itmatromlawanni Nlin reri-nmat reria riy mak khi' mak kaplol la E yamkekni.
Ne Itmatromlawanni Nta'wa taru tlinni la ira sniumbainni.
17 Mere Itmatromlawanni Nora mak khi'a yatyatni-halalli rwahapra lia'ara-rwadawar wehla.
La'pa rler la matmiati ho'mana riy honona rhortaplinga re.
18 Mere la'a he' maka kden rer lia plol wawannu de E' nanpena Natlin la ir polpuollu,
ne Ntulan la ira la ir kropanni-krieutnu luini-nuhranu honona.
19 La'a riy mak ralamni nmolu-nhelam doin la de,
E Nmai pia Nrehgor reria re,
ne Ntulla-nsaynia riy mak kakleha ruri-lai.
20 Riy plollola nhi'inde rler la kropanni-krieutnu lui-nuhru polpuol inni-wakwak amni.
Mere Itmatromlawanni Makdenrer die,
Nolin doinia la'a hare honona.
21 Inonni re de,
Itmatromlawanni Natiak apitga re
pa rurni-kliakallu id mana edonna ha riukit watia la' temni.
22 La'pa rlernana riy yatyata-halala de meman neka la nmat die,
yoma la'a yatyata-halal maka ha nhi' oleka yawahlani inhatte.
La'pa rlernan ho'a riy maka nhi'inde ralamni kakdehela Itmatromlawanni mutnu-rahanu
ho'mana hota rka'ma nana niukum lawna la' Itmatromlawanni.
23 Itmatromlawanni Nalewna rimormior miaka khima-kre'a E'a.
Mak kakruwun rer lia E nayanni de hota edonna rukmua.