Itmatromlawanni Makdenrer die, Nala yamuki-yahepru na Nhernia yatipu-yatiani
30
Hadi de Daud ya'ulli-yawedni la'a wniatunnu-wniahniarni maka ha rwahniar la'a rwatia roma krei kniarni:
2 A'u'uli-uwedia O'a Matroma!
Yoma O' mak kamori-kalewn a'u.
O' edonna Muolin limmu mai a' pua a arwa'lu re riarin taru la yamalli pa rhi'a mola-ma' targ' a'u.
3 Uplerlawnu ne!
A puol lia O'a!
Matro'mu ed mak ktulan oleka mai a' pua a kalwied la'a a nie'nu-nhie'nu.
4 O' ed mak kahal doin a lia'a matmiati-molmuolu ralamni,
me Mkenia a lia'a mormiori-lewlewna ralamni.
O' edon Muolin doin a pua rie' wut lia mak kerun la noh mati-rai miolu.
5 Miy miak klernohor reri Itmatromlawanni Makdenrer die,
miy mpiahniara nhiara ya'uli-yawedi la Itmatromlawanni.
Mi'uli-miwedia Itmatromlawanni mak kden la mounu-witanni ralamni.
6 Itmatromlawanni hankeranni-ralmha'arni de edon nodi pa nodi liarni,
mere pleta-plet pa namdiarua pa nawali owa'an la ralam kalwiedni.
La' a mormio'ru tetema,
de aliernan E ralam kalwiedni de.
La' emkameni ho'mana lera nmel wa de a'g e koko'a-herer a'u,
mere hota la' repardoin wa dewade niniha-malmiali a' owa'an wa.
7 La' ler maka adiella kalwiedni-paitiotni ralamni de,
de agatniekame hota a'g edon lier la yatyatni-halalli.
8 Yoma la O kalwiedmu mai a'u Matroma
O Mhi' a' die emeknekama ili-watu wo'ora mak karuri-ka'orta.
Mere la' ler maka alier la susa ralamni de a'umta'at wenn a'u
pa awuarora de:
“Ine!
Uplerlawna Nolin doin olek limni mai a'g ee!”
9 Alier la polpuol ina-wakwak ama pa,
apuol lia O'a,
10 giwra:
“La'pa amuat die hota Omliernana unut lawna hya'a Matrome?!
Riy mak kmati olekwa mana ta'enniana ra'uli-rawed re'ru Matroma!
La'pa amuat die ta'enniana wuahaur nohor owa'ana O kalwiedmu-paitiotmu mai a' pua nodi liarni!
11 Mlinreri-muatreria a'u Matroma!
totpena Mtiulla-msiayn a'u.
O' to' ed mak ktulan mai a'u.”
12 A yatipu-yatnia'nu de O Mual oleka yamuki-yahepru ma Mhuernia.
O' ed mak ka'ala a ralam mawlu pa O Muala niniha-malmiali ma Mhuernia.
13 Pede hota la' hadiwa de a'g edonna riwa li'mu
mere a'u'uli-uwed rer O'a Matroma.
Uplerlawnu ne!
Hota a gala a tu'nu-nhia'ru
pa a'u'uli-uwedia O'a Matroma pa nodi liarni.