Itmatromlawanni Makdenrer die, Ntutga plolli-mneheni la anin lawna ralamni
29
Daud ya'ulli-yawedni la'a wniatunnu-wniahniarni:
Uplerlawna hopopanni-lili'irnu la'a Ilyamou-Watyatoha miy re!
Mmiai pia mi'uli-miwedi mhiu'ru-mhielma mlilili-mmiamuawua Orgahi-Orha'a Uplerlawna-Mempulwatnu onnila E preheni-mkaini hititni-repreparni nora E plolli-mneheni.
2 Mi'uli-miwed reria E'a yoma E nanni ed mak kden la tutullu-lolo'oni.
Mtiuk lia E',
mak kamrehi-kamda'ar nohora liplipni-kamka'mani momuounu-witwitanni.a
3 Orgahi-Orha'a Uplerlawna-Mempulwatnu Nhar lirni pa nlola tah'i lawna wawannu
pa nmai die prahkani emeknekama kukru-gauru,
me yetanni (wniahlani) lola hletan lawna-yoir lawna wawannu.
4 Orgahi-Orha'a Nhar lirni de npenpuen niohora tniorna-riautu
nor wutga preheni-mkaini.
5 Lirni nodia upkarururu pa nwakloli-nwaklalia ora-au liawna,
ne agaria on lalawna mak kden la'a Libanon ho'mana kdielu-kliatna pala patia.
6 Orgahi-Orha'a Nhi' pa wo'or Libanon de herieri-walwialia pa emeknekama sapi a'na mak knenehu-ktertera la' genni.
Ne wo'ora Siryon narian pa emeknekama hayori-orpau mak kran lakni na'nama nahe'eya la' to'orni.
7 Orgahi-Orha'a lirni nhi' nande layera nwadawar lola etnu lioli.
8 Lirni nawo'la-nawainia wo'ora-kawru.
Orgahi-Orha'a Nawo'la-nawainia wo'or-kawru mak kden la Kades.
9 Orgahi-Orha'a lirni nkahyoi gergera ora-au mak ha riwra ora-au mak karuri,b
me napi'ir momuoga ora-au mak kden la wo'ora-kawru re tawni.
Me la'a roma-kreini de Itmatromlawanni upni-a'nani re riarin pa riwra:
“Orgahi-Orha'a inponni toto' memna!”
10 Orgahi-Orha'a Nodi plolli la ger wawuau liawna wawannu.
Enodi plolli de emeknekama Ray pa ntorna-nraut pa nodi liarni.
11 Matroma!
Mual rurmu-laimu la hermu-darmu mutmu-rahamu,
totpena honona re rler la kalwiedni-paitiotni.