Unut lawna la riy mak khu'ru-khelam la Itmatromlawanni Makdenrer die
16
Daud sniumbaini la wniatunnu-wniahniarni:
Mutiak a'u Uplerlawnu ne,
yoma agha'ar a arnu la O' mak kruwun rer a'u.
2 A'ukot la Itmatromlawanni:
“A Matromlawnu O'a,
Omhi' a ralmu pa nahepuepru.
O' ed mak kareh dioin memna hare honona mak aliernana re!”
3 A'g e ghu'ru-ghelam la'a riy mak edonna khi' do'a-kyapi hala mai noh di.
A ralmu naplele'er pa agora ira mholi wutu.a
4 Mere he' mak kiwra kru'u-ktowar la hegan ornoha-orrai,
yeher to'a pa rlului-rnurnuhru la' lera-lera.
Uhmena gor wut lia ir pa mhoi-mtania rara la hegan ornoha,
la'pa kotni-nanni uhmena gheik la.
5 Mere Matroma!
O' emolmolan neka me nhiakra samomuou memna maka aliernan de.
Hya' ed maka hota aliernan de etla O limmu ralamni.
6 La'a hya' to' maka Omuala mai a'u re de,
id mana edonna yata.
Hare honona samomuou memna!
7 U'uli-uwedi reri O'a Matroma,
yoma Omtiutga talan mak kaplola mai a'u.
La' melmel ho'mana awuaror nohora talla mak kaplol de pa hota aliola.
8 A nhiortu nden reri mamain la' O'a Matromlawnu ne!
O' ed rer lia a' o'nu pede ta'ennian memna riy rawo'la a'u.
9 La' hade pede a ralmu nden rer lia' yahepru,
me a'u'uli-uwedia O'a.
Hota a' ino'nu edon nler la hadomdoma.
10 Yoma hota O' edonna Mtio'or doinia a' pua lier la matmiati-molmuolu ralamni.
O' edonna Muolin doinia lili'irmu-hopopanmu mak katlina-katailla O'a,
de nler la noh mati-rai miolu.b
11 O' ed mak ktutmuat a lia'a loi-talan mak kler la mormiori-dardiari ralamni.
A yahepru de emekneka opli mak kha'a yoma O' e Muor A' tialla.
Omdiella a' o'nu pede anieniehu-tiertera la yamuki-yahepru pa nodi liarni.