La riy miak Itmatromlawanni Nreiniana-na'nana
15
Hade de Daud ya'ulli-yawedni la wniatunnu-wniahniarni:
Riy ratiana:
“Matroma hota he' ed maka Ompwayow nohora pa nla'a O roma kreimu,
pa nden rerlia O wo'ora-kawurmu Sion mak kmou-kwitan dena de?”
2 Itmatromlawanni wniahlani:
“Maka Awuayow nohora pa nla'a ro'mu krei nayanni,
pa nden rer lia wo'ora Sion mak kmou-kwitan de,
de riy mak klola talla mak kaplola pa nmou-nwitan la'a do'a-hala ralamni,
me nhi' kalwieda-paitiota la' haneknek wawannu.
Enakot nohor neka plele'erni
3 me edonna napupu-naheria rimormiori walli.
Riy de edonna ntot weyata mutwualli la' yatyatni,
me edonna ntota rimormior wialli nan yatyatni.
4 Edon nrekna-nwaiti riy yatyata-halala,
mere nhormata-nkanala la'a riy mak kamta'ata Itmatromlawanni.
Edonna nwadur et miemna la'a hya' maka enlokar nohora mere hota nhi' nana,
la'pa emkade ho'mana hota nler la susa ralamni.
5 Nal kupna-kai lia ra'otna de edonna rnairia ya'itarni.
Me nahmena riy rala kupna nhiodal nuru totpena ntota riy mak kaplola la hala wawannu.
Riy mak emkade hota nla'a roma krei'yu nayanni,
pa nden rer lia wo'ora-kawru Sion mak kmou-kwitan de.
Hota ndella mtiertierannu.”