Rsumbain la Uplerlawna yoma E' ed mak kawerta-katailia rira do'oni-halli la plola wawannu
7
Daud natipu-natnian lia Itmatromlawanni yoma nhoratnana Kus,
Benyamina duratni-waitni de:
2 Matromlawnu ne!
O' de Uplerlawna maka akola tieru-gawur nehla.
O' ed mak kruwun reri a'u.
Mtiulan pa Mulewna a'u totpa a'uwlar dioinia riy honona mak khokr a'u re.
3 Yana Mumkek rer niek pa irwal lia ohpora-ahdiawra pa rlihir matmata-rhaw riarara a'u.
Ri'ita-rnunia a'u die,
hota he' ed mak ktulan mai a'u?!
4-5 Matromlawnu ne!
Uplerlawna maka akola tieru-gawur nehla.
La'pa naplola pa a'g e ghi' do'a-yapi hialla' mutwua'lu-lawa'lu,
onde la'pa a'g e ghi' arukia a arwa'lu mak edonna khala,
onde la'pa a'g e ghi' hala la' he-he'a,
6 ndella pa a arwa'lu rhokr a'u pua rrinin targ a lia tani kierna wawannu
totpa rwenn a' pua a' ino'nu nden nek la hande wa.
7 Matromlawnu ne,
Makdenreri O'a!
Mupriri-mukded la genmu-tienmu
pa Orgahamu Muwenan pa Mutowra a arwa'lu re honona mak kor a'u ma'ara.
Mupriri-mukded pa Mtiulan mai a'u,
yoma O' Muhak to'a plola-mneha wawannu.
8 Muwoka-mule' reria rimormiori mak kwatiawua noha-rai honona la'a O walmu-walmu,
totpena la'a liwangenmu-mtatangenmu la' Ilyamou-Watyatoha de
O' nampena ed mak khudi-kpara la ir honona.
9 O' ed mak ktoran reria watghudi la rimormiori re honona.
Mual a lia plola wawannu Matroma,
yoma a'g edonna ghala.
10 Mpuolliohora riy mak khi' do'a-hala re totpa yana rhi' emkade owa'ana,
ne mutehra reria riy mak khi' reria kalwiedwedni re ihranu ralamni,
yoma O' de Uplerlawna mak kdenrer lia plolli-mneheni
maka kamkek eti-lahwa rimormiori kirkirni-ralma riorni.
11 Mak kruwun reri a'u,
de Uplerlawna-Mempulwatnu.
E' ed mak kamori-kalewna riy maka ralamni nden rer lia ploini-ple'erni.
12 Uplerlawna nanpena ed mak kawerta-katailia rira do'oni-halli la plola wawannu.
Lera-lera nekpa Ntutga yawenanni la' riy mak khi' do'a-hala.
13-14 La'pa ir edonna rollia nhioli-lieta mak khala,
de E Nal ir la tera tutnu-wehla gaini.
E' ed maka kpona-kadia wehla plalahwa me krei tiarga ra'pani talli
pa rawlari hokhokar nohora ai liomlomra.
15 Tamkek to'ola riy yatyata-halala re!
Emekto'a patke'a mak ka'uhu-ka'apnu papay pa nwei nieka ler maka hota rmordioini de,
riy yatyata re rtepartarlia nnia'ohma-nniakatia yatyata-halala,
totpena rwei nieka la ler maka hota ra rputra-rpalak rira.
16 E rahia hu'ula pa ra rtota riy mak edonna khala,
mere hota ir owa'an pa mak kler tar lia hu'ul de ralamni.
17 La' hade pede ir orgahani nekpa er maka rukmu owa'ana orgahani yatni-hal wamueheni.
Me orgahani nekpa rutni-rdahla ir orgahani inon wamueheni.
18 A'uli-uwed reria O'a Matroma,
yoma O niukammu de ple'erni ne e!
Apuol reria nhiara la O' Makdella Tutullu-Lolo'oni.