Rsumbain la Itmatromlawanni Makdenrer die, la' ler mak rler la susa ralamni
6
Hadi de Daud nhiar ya'ulli-yawedni maka ha rala la mak khi' o'tani la mak kwatunu-kwahniara.
Rwatunu-rwahniara rnairi hitara-fiola.
Rwahniar de rlernohora mak ha riwra mak kla' wo'awa:a
2 Matroma Makdenreri O'a!
Yana Mukmua a lia'a O yawenan lawanmu di ralamni.
Yana Mliwra-mkaklia a lia'a O hankeranmu di.
3 Msiayni a'u Matroma yoma a ru'ru-la'yu rhorwua.
Mual a' pua ururi-ulai yoma amuahwenn olek a wua.
Mhi' a' pua hota a kalwied owa'ana.
4 A ralmu nmolu-nhelma olekwa.
Hota la lera wo'ir owa'ana Omultarg a'u pa a'g emkadi Matrome?!
5 Mpualdioinia pa Mua Munawar doinia a lia,
Matroma.
Mulewn a'u yoma la'a O sniayanmu mak kodi liarni de.
6 Yoma hota la'a noh mati-rai miol die hota edon rakot nohor owa'an O hihi'imu-yapyapmu re,
de la riy id mana hota edonna na'uli-nawedi olek O la' hande.
7 Amuahwenn a'u,
yoma a'g e puolu-wuak tiy O la' lelera-melmela,
de a lu'yu ntuin la a le'wu wawannu.
8 Onnila a arwa'lu re,
pede akoko'a-kiakakur nande
a ma'tu ramehra me ta'enniana ramkek samomuou.
9 Itmatromlawanni Makdenrer die,
Natlin nan oleka a puolpuo'lu-wakwa'ku,
pede la' dodo'ondi de mak khi' yatyata-halal miy re,
rhawlakarmi la hande looo!
10 A polpuo'lu-wakwa'ku,
de Itmatromlawanni Nreilili-na'mamuau wua.
11 Hota a arwa'lu honona re rheduma ne rmola-rma' nande
rrei lia li'iru pa rmeh'a rahihi'a.