Sura Paratama nitulisi
i Yohanes
Vamba nu Tesa
Sura paratama nitulisi i Yohanes, anaguru i Yesus anu najadi pakeni ntopomparasaya. Nantuntuni tesa ntopomparasaya nggaulu, i Yohanes notulisi sura paratama hitu lako ri ngata Efesus, bo nipakatuna ka todea topomparasaya ri propinsi Asia Kodi. Tempo haitu natuamo i Yohanes.
Tempo i Yohanes notulisi sura hitu, naria guru-guru agama anu nanggeni pepatuduki nasala. Pangulira, i Kristus ledo najadi manusia mpuu, aga lenjena mpo manusia. Niulira muni nau pokaingguta madaa, ledo nakuya, sabana aga karota nadaa, ledo kita. Tapi i Yohanes nanguli pepatudukira haitu nasala. Ia nompopaisani ka kita i Yesus Ana nu Alatala anu mpuu-mpuu najadi manusia. Ane kita nosisani nte Alatala, kita menonto movia dosa bo mangoseaka parentaNa. Isema-sema nomparasaya i Kristus bo nompotove Alatala, kana rapotovena muni sampesuvuna.
Sura hitu nitulisi ala kita matuvu mosangu rara nte Alatala bo nte AnaNa i Yesus Kristus. Nitulisi muni ala kita mainga bo ledo mantuntuni pepatuduki nasala, anu mamala mompakagero katuvuta sampe ledo natuvu nosangu rara nte Alatala.
Naria patuju ntanina sampe i Yohanes notulisi sura hitu. Niulina ri 5:13, “Yaku notulisi sura hitu ka komiu topomparasaya Ana nu Alatala, ala rasanimiu mpuu komiu matuvu mabelo sampe ri kasae-saena.” Ane niparasayata i Yesus, kita domo maeka nte Alatala (2:28; 3:19-22; 4:16-18; 5:14).
Isi nu Sura
Pantepuuna (1:1-4)
Kana matuvu riara reme (1:5-2:29)
Ana-ana nu Alatala bo ana-anu Magau nu Seta (Pasal 3)
Pepatuduki nu Alatala bo pepatuduki nabi-nabi mpodava (4:1-6)
Kita kana mosimpotove (4:7-21)
Tona nomparasaya i Yesus ledo nantuntuni pokainggu nadaa ri dunia (Pasal 5)