Sura Paratama nitulisi
i Petrus
Vamba nu Tesa
Topotulisi sura hitu i Petrus, saito lako ri sapulu randua anaguru i Yesus. Nipakatuna sura hitu ka topomparasaya anu nonturo ri bagia Asia Kodi. (Peinta gambara ngata ri kuli nu buku.) Tempo haitu ira nombarasai kasusa bo kapari sabana ira nangoseaka i Yesus. Jadi patuju sura hitu ala mompakaroso pomparasayara ala mosabara riara kasusa haitu. I Petrus nompopatora ka ira Kareba Belo anu nombatesa i Yesus Kristus. Ia namate, natuvu mpanjili, bo makava mpanjili. Nipopatorana pura-pura belo rakavara sabana anu nipovia i Kristus, jadi haitumo sabana naria panjarumakara naroso. Niulina patuju nu kasusa haitu ala rasani kaliangu nu pomparasayara, bo niulina rakavara tambo tempo i Yesus makava mpanjili. Jadi ira kana mosabara bo maroo rarara tempo nirasaira kasusa, nangoseaka jonjo i Kristus.
Niulina muni ane kita nombarasai kasusa bo kapari sabana nangoseaka i Yesus, kita kana mekou nte Alatala bo matutu mokainggu nabelo (4:19). Bo mpengaya-ngaya pepatuduki ntanina nitulisina ala mompakaroso rarata manjarumaka Alatala, bo mokainggu mabelo anu masipato ka todea nu Alatala.
Isi nu Sura
Petabe (1:1-2)
Alatala kana ratoiya sabana nidekeiNa ka kita panjarumaka naroso (1:3-12)
Kita nipatuduki mokainggu mabelo sabana kita todea nu Alatala (1:13-2:10)
Pepatuduki mokainggu nabelo riara dunia nadaa; mekou nte pomarenta; pepatuduki ka potudua, topoberei, bo pura-pura topomparasaya (2:11-3:12)
Pepatuduki ka tona nombarasai susa bo pari sabana pangoseakara i Kristus (3:13-4:19)
Pepatuduki ka pakeni ntodea topomparasaya bo ka todea biasa (5:1-11)
Petabe kaupuna (5:12-14)