Sura ka
toIbrani
Vamba nu Tesa
Sura hitu nitulisi ka toYahudi anu nomparasaya i Yesus. Ira nabiasa muni niuli toIbrani. Ira mpuu-mpuu nipandasa ntona sabana pomparasayara i Yesus sampe naria sanu ira nasadia noura pomparasayara bo nesua agama Yahudi mpanjili. Jadi haitu sampe topotulisi sura hitu notulisi ka ira ala mompakaroso pomparasayara ala ira ledo moura momparasaya i Yesus.
Ledo nisanita ntoto isema kakanana notulisi sura hitu. Nadea tona nanguli i Paulus topotulisi sura hitu, tapi naria tona ntanina nanguli i Barnabas atau i Apolos topotulisina.
Topotulisi sura hitu nombatentei Pojanji Nabaru anu nidekei nu Alatala ante kakava i Yesus ri dunia. Niulina Pojanji Nabaru haitu nabelopa pade Pojanji Nokolu anu nioseaka ntona noagama Yahudi. Nipopatorana ka ira nee moura momparasaya sampe rapambela pehuku anu masipato ka tona novia anu nadaa.
Sura hitu nompakalanto i Yesus Ana nu Alatala, bo Ia naogepa pade Nabi Musa bo nabi-nabi ntanina. Ia naogepa pade malaeka-malaeka nTupu, bo pakeni-pakeni agama Yahudi nggaulu. I Yesusmo naogepa pade pura-pura anu naria ri langi bo tana. Bo Ia nianggataka najadi Pakeni nTopanggeni Pesomba nabelopa pade pura-pura topanggeni pesomba agama Yahudi. Iamo topanggeni pesomba anu nombasompo dosa bo nompakalali dosa nu manusia, ante nombadekei karoNa mboto nipatesi manjambei kita.
Topotulisi sura nompakalanto kita kana maroo momparasaya ala mompakadamba rara nu Alatala. Nitesana jonjo-jonjo pomparasaya ntotua ntoYahudi nggaulu ala mompakaroso pomparasaya ntopombaca sura hitu. Bo nipakalantona pokainggu masipato ka tona nipakasalama i Yesus.
Isi nu Sura
Pantepuuna: i Kristus nompasimbayu Tesa nu Alatala ka manusia (1:1-4)
I Yesus naogepa pade topanggeni pojanji nu Alatala nokolu (1:5-7:28)
I Yesus naogepa pade malaeka-malaeka nu Alatala (1:5-2:18)
I Yesus naogepa pade Nabi Musa bo i Yosua (3:1-4:13)
I Yesus Pakeni nTopanggeni Pesomba sampe ri kasae-saena (4:14-7:28)
I Yesus Pakeni nTopanggeni Pesomba anu nompasiayu pojanji nu Alatala anu nabaru (8:1-10:18)
Pojanji nu Alatala Nokolu nisambei Pojanji Nabaru anu nabelopa (8:1-9:10)
Pokarajaa i Yesus najadi Pakeni nTopanggeni Pesomba nabelopa pade pokarajaa ntopanggeni pesomba agama Yahudi nggaulu (9:11-10:18)
Pokainggu masipato ka tona nipakasalama i Yesus (10:19-13:25)
Kita kana maroo momparasaya, nee moura (10:19-39)
Jonjo-jonjo ntona nomparasaya sampe nipokonoa rara nu Alatala (Pasal 11)
Kita kana maroo momparasaya tempo nipandasa, bo nee mompoara kabelo Pojanji nu Alatala nabaru (12:1-29)
Pokainggu anu nompakadamba rara nu Alatala bo tesa kaupuna (Pasal 13)