2 Timotius i

Sura i Paulus Karanduana ka

i Timotius

Vamba nu Tesa

Lako ri pura-pura sura nitulisi i Paulus, sura hitu kaupuna. Sura hitu nitulisina tempo ia nitarunggu ri kota Roma (1:8,16-17; 2:9). Nikitana naparamo gantana ia rahuku mate (4:6). Jadi nitulisina sura hitu ka i Timotius. I Timotius langgai muda anu nipotove i Paulus mpo anana mboto. Nasaemo i Timotius nosampokarajaa nte i Paulus bo nikeniakana todea topomparasaya ri ngata Efesus tempo sura hitu nipakatu ka ia.

Sura hitu petevai i Paulus kaupuna ka i Timotius. Niperapina i Timotius masalisa mosinggava nte ia (4:9,21) apa nalentoramo rarana nte i Timotius (1:3-5). I Paulus nompakadidi rara i Timotius ala rapoviana pokarajaa niparasaya nu Alatala ka ia ante mpuu-mpuu rarana (1:6-7) bo mantidamaka rara riara kasusana (1:8; 2:3-12). Nituduna i Timotius mompatuduki pepatuduki nakana (1:13; 2:2; 3:14), mombatagi tona nanggeni pepatuduki nasala (2:14-18; 3:1-9), bo mompasimbuku njuu mompatolele Kareba Belo bo movia pura-pura pokarajaa nTupu (4:1-2).

I Timotius nipopatora mombajagai pokaingguna mboto, bo rapasialana jonjo i Paulus, haitumo pomparasayana, posabarana, pepotovena, bo pantidamakana. Pepatuduki niepena lako nte i Paulus kana rapatudukina ka tona ntanina anu namala raparasaya bo mompakule mompatuduki tona ntanina (2:2).

Isi nu Sura

Tesa pantepuuna (1:1-2)

I Paulus nosukuru sabana pomparasaya i Timotius (1:3-5)

I Paulus nompakadidi rara i Timotius ala mabelo pokarajaana ka i Yesus (1:6-4:8)

I Paulus nerapi i Timotius masalisa mosinggava nte ia (4:9-15)

Nau i Paulus nitarunggu bo domo masae rahuku mate, ia bate-batena nanjarumaka Alatala (4:16-18)

Petabe (4:19-22)