Butéŋí bɔ́ tuɔŋɔ tɔ́sɛ́na ɛ́mɔtɛ́
20
1 E elime eécí,
ɛ ŋá lɛcá *elilé yɛ́ bɔsɔ́ma a yɛ́mɔtɛ́ yí e hulukune ɔ Ɔmuaná ;
yí me bítímbie ɔ ɔɔbɔ́ ne tulibe tú okuunine nɔɔfia nú tííme na yaandándá yɛ́ bɔcanja.
2 Elilé eéyé ŋa ka hátɛ́na ɛŋgandɔ́,
ciɔ́hɔ cɛ buáyá,
ciíci cɛáŋa ɔlɛmbalɛmba,
ta anyía na Musɔ́mɛ́na na Sátan,
múó ciíci ɔɔtɔ́kɔkɔ na bɔcanja anyía mué limine aáná tuɔŋɔ tɔ́sɛ́na ɛ́mɔtɛ́.
3 Nyɛáhɛ́na eényí á nɔɔfia nú tííme noómi ;
yí ŋé kuéye,
ª yɛ́ ŋa faca ne tulibe.
Yí ŋé bílícínyínyi ɔ ɔmuaná,
anyía ɛŋgandɔ́ eécí tɛ háná néŋe baacɔ bá ɔmɛsɛ́ ɔ ɔkɔɔ́háma tuɔŋɔ tɔ́sɛ́na ɛ́mɔtɛ́.
E elime cɛ tuɔŋɔ eétú,
bá ŋá nyɛmána bé o ciíci nyɛana hikúlúkúlú.
4 E elime eécí,
ɛ ŋá lɛcá tɔkɔná.
Baacɔ a bá ŋa bɔ́ bá limekine hɔ́á,
bé ŋeé beébe iínjíékíne makɛ́nda me okélísíki baacɔ.
Míɔ lɛcá tɔ́na tɔtányɛ́ tɔ́ baacɔ abá bá ŋaá cáláká bɛɛtɔ́ a asana na nyíábɔ́ nyibíínjie,
bó lumitekinine Bɛsana bɛ́ Bandɔ́mɛsɛ́,
na a asana yɛ́ taaká ecí Yésus ŋaá námbɔ́nákɛ́na baacɔ.
Beébe eébé bó ti ómo bú nyemi múálá,
ta ɔbɔ́kɔ́bɔ́kɔ yí hííyé hibílícínyínyí ;
baacɔ te o beébe bílícínyínyi ta tɔbɔlɔ mbá ta aabá.
Bá ŋa bɔ́ háányuaka e biwéewé,
Bandɔ́mɛsɛ́ yó beébe iínjíékíne makɛ́nda me otéŋgínyi baacɔ ɔlɔŋɔ ne *Kilís a tuɔŋɔ tɔ́sɛ́na ɛ́mɔtɛ́.
5 A asana na bɛlɔ́ŋɔ́ bí etémbí,
bɛ́ tɛ ɔ́mɔ háanyuaka e biwéewé ɔ ɔkɔɔ́háma ayɛ́ tuɔŋɔ tɔ́sɛ́na ɛ́mɔtɛ́ káá nyɛmána.
Nyɛhaanyua nyí biwéewé nyí buúsebuúse eényí nyɛ́áŋa.
6 Bɔmbányɛ áŋa ne eebe bekime a bá ká bɔ́ háányúáka e biwéewé a nyɛhaanyua nyí buúsebuúse eényí,
bá bɔ́ŋa tɔ́na bɛtálɛ́mánánɔ́ bɛ́ baacɔ ;
owé ú ɔláta tɛ á bá na makɛ́nda náábɔ́.
Bá ká bɔ́ bá *beluli nyiínjie na bá Bandɔ́mɛsɛ́ ne bé Kilís,
bó téŋgínyi ɔlɔŋɔ ne Kilís a tuɔŋɔ tɔ́sɛ́na ɛ́mɔtɛ́.
Bandɔ́mɛsɛ́ maá yaka Sátan
7 Ɛkákɛ́la tuɔŋɔ tɔ́sɛ́na ɛ́mɔtɛ́ á mana,
bé kéé hémúnyi Sátan a nɔɔfia nú tiímé.
8 Aáná u káá háma,
yɔ́ cɔba o okoónéŋe baacɔ bá mɔnɔŋɔ mekime :
Maáŋa anyía na Kɔk na Maakɔk.
ª U kéé beébe bándáka anyía bábɔ́ cɔba e biité ;
ɔmbana ú baacɔ bá mɔnɔŋɔ eébé káá bá háyɛ ɔsɛ́bɛ́á ú asálá yɛ́ nuɔmɔ́ nɔ́ makɛ́lɛ́.
9 Ɛ́makɛ́la yémí beébe lɛcá,
nyíábɔ́ nyɛányána eényí ɔmɛsɛ́ okime ;
bɔ́ ŋɔ́ bɔŋɔlɛna bálɛ́ka ci belumitinine acɛ́ Bandɔ́mɛsɛ́ ŋeé léne.
Mbá oocó ŋeé húle ɔ Ɔmuaná yó beébe hakaka bekime.
10 Aáná a asana na Musɔ́mɛ́na a mɔ́ ŋaá bá mué beébe néŋéke,
bé ŋeé muúmu nyɛ́kɛ́tɛ́na a nɔɔfia nú oocó ú indusí noómi,
haála ahá na múálá ne *muhémúnyi bɛsana mɔ bɛfala á bɔ́áŋa noómi.
Bá ká bɔ́ bɛ́nyíáka mɔɔhɔ muéŋí ne nebutúé na nabuɔ́sɛ́ bikúlú bikime.
Nyɛkála nyí nyibíóndísínyi
11 E elime eécí,
ɛ ŋá lɛcá yaandándá yɛ́ nɔkɔná e yifúlúndúndúé ;
míɔ lɛca ɔɔcɔ me límine hɔ́á.
Aáná na ɔmɛsɛ́ na Ɔmuaná ŋeé séŋúlúéke eeyé eé buúse,
bá tɛ háná biíbi lɛca ta buɔ́sɛ́.
12 Ɛ ŋá lɛcá bɛlɔ́ŋɔ́ bikime e bí ŋe wéékúne,
na bɛ́ *baáŋá na bɛ́ banásɛ́ áyá ;
bɛ́ ma tálɛ́mákɛ́na eé buúse bɔ́ nɔkɔná.
Bé ŋeé húúnéké tufule ;
bé ŋeé húúné tɔ́na númɔtɛ́ nufule,
nú ŋaá bá nufule nú olíhe.
Bé ŋe kélísíki bɛlɔ́ŋɔ́ bikime a máábɔ́ mekilíkínyí háyɛ búáŋa buɔ́ŋɔ́kɔ́nɔ́ e tufule eétú.
13 Aáná nuɔmɔ́ nɔ́ makɛ́lɛ́ ŋeé hémúkúnyi bɛlɔ́ŋɔ́ abɛ́ nú ŋaá bá ne biíbi ;
ne owé na haála ehé biwéewé áŋa ŋé hémúkúnyi tɔ́na bíábɔ́ bɛlɔ́ŋɔ́.
Bé ŋé kélísíki bɛlɔ́ŋɔ́ bikime eébí a máábɔ́ mekilíkínyí.
14 Nyɛahakɛna eényí ne owé na haála ehé biwéewé ŋaá bá a nɔɔfia nú oocó ú indusí noómi ;
nɔɔfia eénú áŋa haála ahá baacɔ ké bú weékúne owé ú ɔláta.
15 Híáná bá ŋa yaáhákɛ́na ɔɔcɔ okime awɔ́ bɔ́ tɛ ɔ́mɔ kúana nyíáyɛ́ nyiínyi nyɛɔ́ŋɔ́kɔ́nɔ́ e nufule nú olíhe noómi ;
bé ŋe wuúci nyɛkɛ́tɛ́na a nɔɔfia nú oocó ú indusí noómi.