Ne oónjú na ɛŋgandɔ́
12
1 E elime eécí,
hibílícínyínyí a hiáŋá ŋeé bítóŋínyí ɛ ɛŋɔ́lɔ́muaná :
Mío bísíémúkúnyi,
míɔ lɛca anyía oónjú u ŋaá bá,
ɔɔ́cɔ́ ŋeé wuúci bɛ́bɔ́ŋɔ́lɛna aá cɛɛ́tɔ háyɛ bɔlaka,
oólí nɔmaka ɛ ɛmbana cɛ bíáyɛ́ bɛbanábána,
u ŋaá bá bɛ́háya a yááyɛ́ aatɔ́ oboŋoli yí tunjoti túɔ́hátá ne túfendí.
2 Oónjú oócí ŋaá bá ne nyifume,
u númíki ;
aáná u ŋaá bá wó bókókó anyía inúmí ci obíéne ŋaá bá ci é wuúci kálákɛ́na buéŋí.
3 Aáná hibílícínyínyí hí etémbí ŋeé bítóŋínyi tɔ́na ɛ ɛŋɔ́lɔ́muaná :
I ŋeé mi bísíémúkúnyi,
míɔ lɛca anyía yaandándá yɛ́ ɛŋgandɔ́ª yɛ́ ŋaá bá,
yɛ́ɔ́ nyíɔkɔ bɔ́ɔ́ŋ,
háyɛ oocó,
ciíci na bɛɛtɔ́ bítíndétú nɔ́mɔ,
ne biboŋoli bí butéŋí bítíndétú nɔ́mɔ a bɛɛtɔ́ eébí ;
ciíci tɔ́na na ɛndɔ́ŋɔ cíɔ́hátá.
4 Úúyé ɔndáŋá ŋé húlúnéke nuafa númɔtɛ́ nɔ́ tuafa tɔ́tátɔ́ tú tunjoti tukime tɔ́ ɛŋɔ́lɔ́muaná,
yí tuútu sukuneke ɔ ɔmɛsɛ́.
Ɛŋgandɔ́ eécí ŋa kaá tálɛ́mɛ́nɛ́na oónjú awɔ́ u ŋaá bá we númíki eé buúse,
anyía wá lahɔ́náka ɔɔ́nɔ́ hí ekúlú eyí oónjú oócí ŋeé bíéne.
5 Oónjú nyibíéne ɔɔ́nɔ́ ɔnɔ́mɔcɔ́ eényí,
wuúci u ŋaá nyɛmána wu otéŋgínyi mɔnɔŋɔ mekime ma ɔmɛsɛ́ ne butéŋí bú biléŋúléŋú.
ª Bé ŋeé hiíte o ohiite ɔɔ́nɔ́ oócí,
bé ŋe wuúci súéténé ne eé buúse bɔ́ Bandɔ́mɛsɛ́ na a núáyɛ́ nɔkɔná.
6 Mbá iinyí,
u ŋaá cábákɛ́na i iisí cɛ ɔsɛ́bɛ́á ;
hɔ́á Bandɔ́mɛsɛ́ ŋeé wuúci tábɔ́nákɛ́na anyía wé wuúci túkéke tuɔŋɔ tɔ́tátɔ́ ne ekélékéti.
7 Biité ŋá kua ɔ Ɔmuaná noómi :
Na Mikayɛ́lª na bíáyɛ́ bililé bɛ́ masɔ́ma nuusiki ɛŋgandɔ́ ;
na ɛŋgandɔ́ na bíáyɛ́ bililé bɛ́ masɔ́ma nuaka tɔ́na biité eébí.
8 Mbá,
beébe ta ɔyáka na Mikayɛ́l na bíáyɛ́ *bililé bɛ́ masɔ́ma ;
aáná bɔ́ tɛ ɔ́mɔ háná abɔ́ bá na haála hé olimine ɔ Ɔmuaná.
9 Ɛ́ɛhɛ́ bá ŋa bɔ́ nyɛkɛ́tɛ́na yaandándá yɛ́ ɛŋgandɔ́ eéyé,
ciíci cɛ́áŋa ciɔ́hɔ cɛ buáyá eécíª acɛ́ bɔ́ ŋɔɔ́ lɔ́ŋɔ anyía ɔlɛmbalɛmba,
ta anyía na Musɔ́mɛ́na na Sátan ;
mu naŋa mué nénisiki ne munéŋéne baacɔ bekime bá ɔmɛsɛ́ okime.
Bé ŋe bú ciíci nyɛkɛ́tɛ́na ɔ ɔmɛsɛ́ na bíáyɛ́ bililé bɛ́ masɔ́ma áyá.
10 E elime eécí,
ɛ ŋa mɛ́ lɔ́kɔ́ma yaandándá yí okelú yí húlúkúne ɔ Ɔmuaná,
yɛ́ kɔɔnaka yɛ́sɛ :
« Aámbáya ekúlú yɛ́ nyɛkɔmba má kaáháma !
Bandɔ́mɛsɛ́ me tóŋínyi na mááyɛ́ makɛ́nda na búáyɛ́ butéŋí ;
makɛ́nda me butéŋí a yáaŋa a aabá cá ciayɛ́ *Mesíi,
anyía bá ma nyɛ́kɛtɛna ɔ ɔmɛsɛ́ musɔ́mɛ́naª báásɔ́ benyíinyí.
Muúmu mu ŋaá bá mué beébe sɔ́mɔ́kɛ́na ne nebutúé na nabuɔ́sɛ́ ná cíásɔ́ Bandɔ́mɛsɛ́.
11 Mbá báásɔ́ benyíinyí ŋe bú muúmu yákaka na a asana na manɔ́ŋɔ́ ma Ɔɔ́nɔ́ u Ɛtɔ́mbá,
na a asana na ciábɔ́ ɛmbasɔ́ acɛ́ bá ŋa bɔ́ bá bábɔ́ laákɛ́na baacɔ anyía Bɛsana bɛ́ Bandɔ́mɛsɛ́ áŋa taaká.
Bé ŋe bú bíínjíékíne o olumitinine noómi ɔ ɔkɔɔ́háma eyí bé ŋe bú lumítíne owé.
12 Yaátɛ́ asana,
banɔ́ biliminyi bɛ́ Ɔmuaná bikime,
énu bílénéke buéŋí !
Mbá,
mahana náánɔ́,
banɔ́ biliminyi na bɛ́ ɔmɛsɛ́ na bɛ́ nuɔmɔ́ nɔ́ makɛ́lɛ́,
anyía Musɔ́mɛ́na eémú kokóokó munyíóyónó na nyɛŋána nyikime ;
mu menyukune anyía ekúlú me muúmu lɔ́bɛ́na etíkítíki. »
13 Ɛ́makɛ́la ɛŋgandɔ́ á bɛ́lɛ́ca anyía bé me ciíci aahɛna ɔ ɔmɛsɛ́,
ci ŋé túme ɔwɔɔ́ŋɛ́na oónjú ewú u ŋeé bíéné ɔɔ́nɔ́ ɔnɔ́mɔcɔ́.
14 Mbá bé ŋe yiínjie oónjú oócí bibéku bífendí bɛ́ yaandándá yí kóndónyi anyía we fúlúlúé ɔ ɔkɔɔ́háma i iisí cɛ ɔsɛ́bɛ́á,
haála ehé bé ŋeé wuúci tábɔ́nákɛ́ná anyía bé wuúci túkéké hɔ́á ɔ ɔmbana ú tuɔŋɔ tɔ́tátɔ́ ne ekélékéti haaca na ciɔ́hɔ eécí.
15 Ciɔ́hɔ ŋaá lɛcá aáná,
cɛ ŋá aanyákákɛ́na oónjú oócí bɛahɔ́ bí menyífé e elime háyɛ nuɔmɔ́,
anyía bɛahɔ́ bí menyífé eébí é wuúci hɔlána.
16 Asana ɔ́mɔtɛ́,
ɔmɛsɛ́ ŋɔ hɔ́kɔ́nɔ́nɔ oónjú :
Ú ŋeé hélúnue,
nyɛmɛnaka eényí nuɔmɔ́ nú menyífé anɔ́ ciɔ́hɔ ŋa yaanyákáka a nyíáyɛ́ nyuúté.
17 Hilóbi ŋeé tímbie ciɔ́hɔ buéŋí a asana eéyé,
cɛ ŋá cɔbá o okonúusi baáná bé etémbí bé oónjú oócí ;
beébe bá naŋa bábɔ́ lɔ́kɔ́mákɛ́na *bikotí bɛ́ Bandɔ́mɛsɛ́,
bá látákɛ́na taaká ecí Yésus ŋa nambɔ́nɛ́na baacɔ.
18 Aáná cɛ ŋga tálɛ́mɛ́ná a asálá yɛ́ nuɔmɔ́ nɔ́ makɛ́lɛ́.