Nufule enú Yésus ma tɔ́mɛ́na belumitinine bá Saalɛtɛs
3
1 « Ɔɔ́ŋɔ́kɛ́na nufule né *elilé yɛ́ bɔsɔ́ma a hiɔ́bɔ hí belumitinine *Kilís hɛ́ Saalɛtɛs anyía :
“Aana Ooci a wáŋa ne bililé bítíndétu nɔ́mɔ a bɛ́áŋa eé buúse bɔ́ Bandɔ́mɛsɛ́,
ª wuúci ú meé tímbie tunjoti tútíndétú nɔ́mɔ ɔ ɔɔbɔ́ ŋa kɔɔna ɔsɛ :
I ŋe mí menyi búɔ́wɔ buólí,
i menyukune anyía bó ŋo yó woómisi buéŋí anyía ɔ ɔ́ŋa wɔɔ́sɔ,
yiíyi anyía ɔ ɔ́ŋa owéénú.
2 Haanyúá,
mbá e tétényíki bɛsana bí olumitinine a bíáŋa bɛlɔbɔ́kɔ́nɔ́ nɔ́ɔ́wɔ,
anyía bí ti wéékúne bikime buúse bukime.
Yááŋa anyía ɛ́ ma mɛ́ lɛcaka mɔ́ɔ́wɔ monyiókínyí tɛ á bá mefúúménénú bɔmbányɛ bɔmbányɛ eé buúse bɔ́ ciamɛ Bandɔ́mɛsɛ́.
3 Bɛ́táá aná nyɛlɔ́kɔ́ma anyɛ́ ɔ ŋɔ́ɔ lɔ́kɔ́máka Bɛsana bɛ́ Bandɔ́mɛsɛ́ buáyá,
wo biíbi káha bɔmbányɛ.
Biíbi tétényíki mbá a bɛ́kákálákɛ́na búɔ́wɔ bɔɔbɛ́,
mbá a sɔ́mba ɔkɔlɔ́ eé buúbu.
Mbɔ́kɔ o ti ŋóo bíkékényi,
ɛ ká mɛ ɔ hámɛ́na hú huasɛ,
e ti menyi onjéŋí.
Ɛ ká mɛ́ faaya háyɛ weébi.
4 Ta híáná,
bɔ́mɔtɛ́ belumitinine Kilís nɔ́ɔ́wɔ a Saalɛtɛs tɛ ɔ́mɔ́ bɔ́ háya bihíŋe a bíábɔ́ bɛlaŋa a nyɛkɛla nyɛ́ bɛɛbɛ́ bɛ́ bɛsana.
Beébe,
bá ká bɔ́ láŋábaka bɛlaŋa e bifúlúndúndúé,
tú ké sú kéndikinyi ne beébe anyía bá bɔ́ŋa banyɛmánánɔ́.
5 Aáná muyáka mukime káá bɛ́háya bɔlaka e bufúlúndúndúé ;
i ti ké mi nyímísi ta buɔ́sɛ́ nyíáyɛ́ nyiínyi e nufule nú olíhe.
I ké mí muúmu kamɛna ne eé buúse bɔ́ Bandɔ́mɛsɛ́ ne eé buúse bɔ́ bíáyɛ́ *bililé bɛ́ masɔ́ma anyía muáŋa úúmi.
6 Ɔɔcɔ a wáŋa ne eetú cá ɔlɔ́kɔ́máka á lɔ́kɔ́máka aátɛ́ Elilé ŋaá laana baacɔ bá tuɔ́bɔ tú belumitinine Kilís.” »
Nufule enú Yésus ma tɔ́mɛ́na belumitinine bá Fɛlátɛ́lɛ́fi
7 « Ɔɔ́ŋɔ́kɛ́na nufule né *elilé yɛ́ bɔsɔ́ma a hiɔ́bɔ hí belumitinine *Kilís hí Fɛlátɛ́lɛ́fi anyía :
“Ooci a wáŋa ofúúménénú,
wuúci atálɛ́mánánɔ́ yɛ́ ɔɔcɔ eé buúse bɔ́ Bandɔ́mɛsɛ́,
wuúci ne tulibe tɔ́ Táfitª e úúye ɔɔbɔ́ ;
wáŋa anyía wéé kúune ehenyi,
ɔɔcɔ u etémbí tɛ á bá wu o yiíyi kueye ;
wéé yiíyi kuéye,
ɔɔcɔ u etémbí ti yiíyi kuúne;
ª wuúci u ŋa kɔɔna ɔsɛ :
8 I ŋe mí menyi mɔ́ɔ́wɔ monyiókínyí ;
i ŋe mí menyi anyía ɔ tɛ ŋɔ́ɔ́ bá na makɛ́nda meéŋí.
Ta híáná,
o ŋoó tétényíki bíámɛ bɛsana buéŋí,
kuɔŋɔ́ te o mi bínéŋítínyi.
Ɛ́ná,
í me mí o kuunine ehenyi oówo eé buúse ;
yiíyi ɔɔcɔ tɛ á bá wu okueye.
9 Ɛ́ná,
aáná ɛ ká mɛ́ kɛlaka na baacɔ bá ɔlɔŋɔ ú Sátan,
beébe bé ŋe bú néŋé baacɔ anyía bá bɔ́ŋa *Besuif,
yiíyi anyía bá tɛ ábɔ́ bá aáná :
I ké mí beébe eékíkínyi anyía bé otúmékíne eŋéndu ɔ ɔ kuɔŋɔ́ nyémi.
Bé ké bú ményutune anyía i ŋe mí o léne.
10 A asana eyí o ŋoó weéhíkínyínyí otétényi bíámɛ bɛsana,
yaátɛ́ asana yaŋɔ́ tɔ́na i ké mi o tétényíki ekúlú ayɛ́ baacɔ bekime bá ɔmɛsɛ́ okime ká bɔ́ lɔ́kɔ́máka muuyé a mɔ́ á nyɛmána mu o beébe hámɔ́kɔ́nɛ́na.
11 Kokóokó,
yaŋɔ́ ooci hí aámbáya.
Tétényíki bɔmbányɛ bɔmbányɛ bɛsana abɛ́ ɔ́ ŋɔ́ɔ waákɔ́nákɛ́na anyía ɔɔcɔ tɛ ɔ hɔɔ́nɔ yɔ́ɔ́wɔ atamba yí nuúmi.
12 Ɛ ká mɛ́ kɛla anyía muyáka mukime é limíne ekúlú ekime eé Ciíbe cɛ ciamɛ Bandɔ́mɛsɛ́ i iŋetí ci nukúse ;
ta bɔkɔ tɛ á bá bú o wuúci hémúnyi hɔ́á buɔ́sɛ́.
I ké mí wuúci ɔ́ɔ́ŋɔ́kɔ a cɛɛ́tɔ ne nyiínyi nyɛ́ ciamɛ Bandɔ́mɛsɛ́ ne nyiínyi nyɛ́ ciayɛ́ bálɛ́ka ;
ciíci ciáŋa yɔɔ́sɔɔ́sɔ yí *Yelúsalɛm ayɛ́ Bandɔ́mɛsɛ́ ŋa tɔ́ma,
yí húlúkúne ɔ Ɔmuaná.
Ɛ ká mɛ́ ɔ́ɔ́ŋɔ́kɔ a ciayɛ́ cɛɛ́tɔ tɔ́na yáámɛ yɔɔ́sɔɔ́sɔ yí nyiínyi.
13 Ɔɔcɔ a wáŋa ne eetú cá ɔlɔ́kɔ́máka á lɔ́kɔ́máka aátɛ́ Elilé ŋá láana baacɔ bá tuɔ́bɔ tú belumitinine Kilís.” »
Nufule enú Yésus ma tɔ́mɛ́na belumitinine bá Lawotisé
14 « Ɔɔ́ŋɔ́kɛ́na nufule né *elilé yɛ́ bɔsɔ́ma a hiɔ́bɔ hí belumitinine *Kilís hɛ́ Lawotisé anyía :
“Ooci awɔ́ bɔ́ ŋɔ lɔ́ŋɔ anyía Híáná Yááŋa,
ª wuúci wáŋa taaká cɛ ɔmbasɔ́mbásɔ u mɔŋɔlɛ́ wuúci tɔ́na indíné cɛ bɛnyɛ́ma bikime abɛ́ Bandɔ́mɛsɛ́ ŋe ketiki,
ª ɔsɛ :
15 I ŋe mí menyi mɔ́ɔ́wɔ monyiókínyí ;
i ŋe mí menyi anyía o ti ŋóo sioŋóno,
a tɛ bálá.
Ɛ ŋa mɛ́ hɔ́la oléne anyía óo sioŋónóko,
ta anyía ɔ́ɔ báláka.
16 Mbá ayɛ́ ɔ ɔ́ŋa yámbɛ́yámbɛ,
e ti sioŋóno,
a tɛ bálá,
míɔ ɔcɔba ɔ kuɔŋɔ́ áányakaka.
17 Ɔ ŋɔɔ́ kɔɔna asɛ ɔ ɔ́ŋa ɛnɔ́mɛ cɛ ɔɔcɔ,
ɔ wáŋa na bɔnɔ́mɛ buéŋí,
ta bɔkɔ tɛ ŋa háná ɔ́ yɔ́ɔ bɛ́ámbɛ́na ;
e ti menyi anyía ɔ ɔ́ŋa na mahana buéŋí ɔ ɔhɔla,
ɔ ɔ́ŋa taaká cɛ ɔsɔ́kásɔ́ka ci onuti etémbí,
kuɔŋɔ́ ne indímé.
18 Yaátɛ́ asana i ŋe mí o lébe anyía faáya kɔ ɔɔ́ndɔ́ náámɛ kóolo ecí oocó me fúúmínyi ;
aáná ɔ kɔ́ɔ́ bá taaká cɛ ɛnɔ́mɛ cɛ ɔɔcɔ.
Kɔ́ ɔɔ́ndɔ́ tɔ́na bɛlaŋa e bifúlúndúndúé,
biíbi laŋába aá cɛɛ́tɔ anyía a tɛ háná lɔ́kɔ́ma aatɔ́ ɔlama e úúwu onuti etémbí.
Kɔ́ ɔɔ́ndɔ́ tɔ́na bɔkanyɛ́ bú obícébíkínyi e eése anyía ɔ háná ɔ lɛcakana.
19 Ɛ naŋa yámɛ kákálákɛ́na,
i bɔ́nɔ́sɛ́ákaª eebe bekime ebé i ŋeé mi léne.
Yaátɛ́ asana bíínjíé na makɛ́nda mekime o olumitinine,
mbá a bɛ́kákálákɛ́na búɔ́wɔ bɔɔbɛ́,
mbá a sɔ́mba ɔkɔlɔ́ eé buúbu.
20 Ɛ́ná,
yaŋɔ́ ooci eé buúse bú ehenyi,
i ŋe mí kite okokí ɛ lɔ́ŋɔ́kɔ baacɔ.
Mbɔ́kɔ ɔɔcɔ a wɔmɔtɛ́ ŋaá lɔ́kɔ́ma úúmi ɔtáŋa,
yó mi kuune ehenyi,
i ké mí oofine eéyé e ciíbe,
túó nyíékínyi ne wuúci.
21 Ɛ ká mɛ́ kɛla anyía muyáka mukime á faáya wé ke límíne na yaŋɔ́ o otéŋínyi baacɔ,
híáná yaŋɔ́ tɔ́na ɛ ŋaá mɛ yáká ;
aáná tua sɔ́ŋa limine na ciamɛ Síkíne o otéŋínyi baacɔ.
22 Ɔɔcɔ a wáŋa ne eetú cá ɔlɔ́kɔ́máka á lɔ́kɔ́máka aátɛ́ Elilé ŋa láana baacɔ bá tuɔ́bɔ tú belumitinine Kilís.” »