Nyɛnambɔnɛna nyɛ́ bɛsana
háyɛ Sáaŋ ŋɔ yɔɔ́ŋɔ́kɔ́
Nyitúme nyí nufule
1
1 Nufule eenu ŋe bíkéti bɛsana ebí *Yésus *Kilís ŋa námbɔ́nákɛ́na bɔnyiɔnɔ bá *Bandɔ́mɛsɛ́.
Bandɔ́mɛsɛ́ u ŋeé wuúci laána anyía wé beébe nambɔ́nákɛ́na bɛsana a bɛ́ á nyɛ́mana o tényí bɛ́kɛ́lákaª anyía bébú biíbi menyí.
Yaátɛ́ asana Yésus Kilís ŋaá tɔ́má yááyɛ́ elilé yɛ́ bɔsɔ́ma ná muayɛ́ munyiɔnɔ Sáaŋ anyía wé keé beébe námbɔ́nákɛ́na bɛsana eébí.
2 Sáaŋ oócí u ŋeé bíkétíkínyi baacɔ bɛsana bikime abɛ́ ú ŋa lɛ́cáka,
u ŋaa kɔ́ɔna anyía bɛ́áŋa taaká cɛ́ Bɛsana bɛ́ Bandɔ́mɛsɛ́ ;
Yésus Kilís áŋa ɔmbasɔ́mbásɔ u bɛsana eébí.
3 Bɔmbányɛ ná baacɔ a bá ŋa bɔ́ fanɛna bɔsɔ́ɔ́kɔ́ bɛsana bikime bí nufule eenu abɛ́ Bandɔ́mɛsɛ́ ŋaá námbɔ́nákɛ́ná baacɔ ;
bɔmbányɛ tɔ́na né eebe e bé ŋe bú biíbi lɔ́kɔ́ma,
bé biíbi látákɛ́na.
Yááŋa anyía ekúlú ayɛ́ bɛsana eébí káá bɛ́kɛ́láka a yáaŋa hoóhi.
Sáaŋ ŋeé téŋí tuɔ́bɔ tú belumitinine Kilís
4 Yaŋɔ́ Sáaŋ,
ɛ ŋa mɛ́ banɔ́ ɔɔ́ŋɛ́na nufule eenu,
banɔ́ tuɔ́bɔ tú belumitinine *Kilís tútíndétú nɔ́mɔ tú iisí cɛ Asi.
ª Bandɔ́mɛsɛ́ a wáŋa wɔɔ́sɔ,
u ŋaá bá,
u ká ka hálɔ́mɔ́na,
wá banɔ́ sáyábákɛ́na,
wá banɔ́ iínjíékíne mbuumu ɛ ɛtɛ́má.
Bililé bítíndétú nɔ́mɔ a bɛ́ ŋɔ́ nyíɔnɔ Bandɔ́mɛsɛ́ bɛ́ á banɔ́ sayábákɛ́na,
bɛ́ á banɔ́ iínjiékíne tɔ́na mbuumu ɛ ɛtɛ́má ;
bɛ́áŋa eé buúse bɔ́ núáyɛ́ nɔkɔná.
5 Yésus Kilís taaká cɛ ɔmbasɔ́mbásɔ á banɔ́ sáyábákɛ́na tɔ́na,
mbá u banɔ́ iínjíékíne mbuumu ɛ ɛtɛ́má ;
wuúci wáŋa ɔɔcɔ u buúsebuúse ɔ ɔhaanyua e biwéewé,
ª wáŋa Otéŋí u betéŋí bekime bá ɔmɛsɛ́.
U naŋa waá basɔ́ lénéke,
u ŋá basɔ́ háŋɔ́náka a bɔɔbɛ́ anyía u ŋe keé wé a yáásɔ́ asana.
6 Wuúci u ŋa kɛ́láka anyía túésú téŋgínyi ɔlɔŋɔ ne wuúci ;
yɔ́ kɛlaka tɔ́na anyía túásɔ́ bá *beluli nyiínjie a bá ŋa bɔ́ nyiɔnɔ ciayɛ́ Síkíne Bandɔ́mɛsɛ́.
ª Ne nuúmi,
ne butéŋí ŋá nyɛmána né Yésus bikúlú bikime.
Híáná yááŋa !
7 Ɛ́ná,
wa yáaŋa ɔfaaya a bɛlɔndɔ́ noómi;
ª baacɔ bekime ké bú wuúci lɛcaka ne eése,
te eebe e bé ŋe bú wuúci bɔlɔ́ a aháŋá yɛ́ nɔkɛndá.
Tɔnyɛ́nɔ́ tukime tɔ́ ɔmɛsɛ́ káá lɛ́laka a yááyɛ́ asana.
Ɛ́ɛ,
bú káá bɛ́kɛ́láka taaká aáná,
ª híáná yááŋa !
8 Otéŋí a Waáŋá Bandɔ́mɛsɛ́ ɔsɛ :
« Yaŋɔ́ Alɛfa,
yaŋɔ́ Ɔmɛ́ka.
»ª Wuúci wáŋa wɔɔ́sɔ,
u ŋaá bá,
u ká ka hálɔ́mɔ́na ;
wáŋa Alámakɛ́nda.ª
Yésus me bítóŋínyi ná Sáaŋ a Bátɛmɔs
9 Yaŋɔ́ Sáaŋ,
uunú onyíinyí u olumitinine Yésus,
na yaŋɔ́ na banɔ́ tua sɔ́ŋa balatánɔ́ e nyimónjóló ne Yésus na a nyɛlɔ́kɔ́ma nyí muuyé ne e nyiéhínyínyi nyí indekese,
basɔ́ bekime eeyé e Butéŋí noómi.
Aámɛ a aháŋá,
bá ŋaá mɛ hátɛ́na,
bɔ́ kɔɔ́ mɛ háya a Bátɛmɔs,
iisí a cɛ́mɔtɛ́ ɛ ɛkatɛ́katɛ́ cɛ nuɔmɔ́,
ª a asana ayɛ́ ɛ naŋa yémi hulikinyi baacɔ Bɛsana bɛ́ Bandɔ́mɛsɛ́,
i tóŋgínyi baacɔ anyía Yésus áŋa ɔmbasɔ́mbásɔ u bɛsana eébí.
10 Aáná,
buɔ́sɛ́ a búmɔtɛ́ bú Otéŋí a Waáŋá,
ª Elilé yɛ́ Bandɔ́mɛsɛ́ ŋeé mi oofíníne,
ɛ tɛ háná bímenyi ;
ɛ ŋá lɔ́kɔ́ma okelú ma bɛ́átábɔ́tɔ́na na makɛ́nda eémi e elime i iŋetí acɛ́ ɛsɛ́bɛ́,
11 ɔsɛ :
« Ɔɔ́ŋɔ́kɔ e nufule noómi bɔkɔ abɔ́ ɔ ŋɔɔ́ lɛca,
mbá a tɔ́mɔ́kɔ́nɛ́na tuɔ́bɔ tú belumitinine Yésus tútíndétú nɔ́mɔ eetu aáná :
Ɛfɛ́ɛsɛ,
Simíiline,
Bɛɛlɛkámɛ,
Tɛatíil,
Saalɛtɛs,
Fɛlátɛ́lɛ́fi,
Lawotisé. »
12 Ɛ ŋa mɛ́ bɛ́kúálɛ́ta ɔ ɔlɛca ɔɔcɔ awɔ́ u ŋaá bá waá táŋáka na yaŋɔ́.
Ɛ́makɛ́la yámɛ bɛ́kúálɛ́ta,
ɛ ŋá lɛcá na bɛtálɛ́ná bɛ́ *lámba bítíndétú nɔ́mɔ bɛtábɔ́nákánɔ́ ne kóolo ne cííbú lámba.
13 Ɛ ŋá lɛcá tɔ́na bɔkɔ a bɔ́mɔtɛ́ ɛ ɛkatɛ́katɛ́ cɛ lámba eécí,
bɔ́ hɔ́áka ɔɔcɔ awɔ́ ú ma láŋába káaŋa,
u ŋé bísúŋe kandá ci kóolo a asasa.ª
14 Na yááyɛ́ aatɔ́ na túáyɛ́ tuhúnyi ŋaá bá fulúndúndúé háyɛ ɔlɔndɔ́ ;
cíáyɛ́ eése nɔmaka háyɛ nɔbɛ́mbɛ nú oocó.
15 Cááyɛ́ akɔlɔ́ mányɛmaka háyɛ eléŋú eyí bó mo nyíosi o oocó.
Úúyé okelú hámɔ́kɔ́na na makɛ́nda háyɛ bɛandándá bɛ́ bɛahɔ́ bí nuúci.ª
16 Ɔɔcɔ oócí ŋaá bá tímbie e úúyé ɔɔbɔ́ ú manɔ́mɛ tunjoti tútíndétú nɔ́mɔ ;
nɔsala nɔ́ ɔhána a nɔ́ ŋa tɛa bɛháŋá bikimeª ŋaá bá nua hámɔ́kɔ́na a nyíáyɛ́ nyuúté.
Búáyɛ́ buúse nɔmaka háyɛ ɔɔ́cɔ́ naŋa wá nɔmaka na makɛ́nda ɛ ɛkatɛ́katɛ́ cɛ buɔ́sɛ́.
17 Ɛ́makɛ́la yémi wuúci lɛca,
i ŋé wuúci kuakɔ́nákɛ́na a akɔlɔ́ háyɛ ɔɔcɔ ewú wéénú.
Mbá u ŋá mɛ tala uúye ɔɔbɔ́ ú manɔ́mɛ a cɛɛ́tɔ,
ɔsɛ náámɛ :
« Eti líkíméke,
yaŋɔ́ i ŋeé mi túméke bɛsana bikime,
yaŋɔ́ tɔ́na i ké mí biíbi menyisiki bikime.
18 Ya mɛ́ŋa wɔɔ́sɔ.
I ŋeé mi wé,
asana ɔ́mɔtɛ́ ɛ ŋa mɛ háanyua e biwéewé ;
yaŋɔ́ ooci wɔɔ́sɔ bikúlú bikime.
I meé mi bítímbie ne tulibe tú owé na tɔ́ haála hé biwéewé áyá.
19 Ɔɔ́ŋɔ́kɔ aná bɛsana abɛ́ ɔ ŋɔɔ́ lɛca aaha ;
ɔɔ́ŋɔ́kɔ na a bɛ́ ŋa bɛ́kɛ́la aámbáya na a bɛ́ɔ cɔba ɔ ɔbɛ́kɛ́láka e elime cí eebi.
20 Lɔ́kɔ́ma nyihembule a nyɛnámbánɔ́ ne nyí tunjoti tútíndétú nɔ́mɔ atɔ́ ɔ ŋɔɔ́ lɛca ɔɔ́mɛ ɔ ɔɔbɔ́ ú manɔ́mɛ na bɛtálɛ́ná bɛ́ lámba bítíndétu nɔ́mɔ bí kóolo :
Tunjoti tútíndétú nɔ́mɔ áŋa tubílícínyínyí tú *bililé bɛ́ masɔ́ma bɛ́ Bandɔ́mɛsɛ́ bɛ́ tuɔ́bɔ tú belumitinine Yésus tútíndétú nɔ́mɔ ;
bɛtálɛ́ná bɛ́ lámba áŋa tubílícínyínyí tú tuɔ́bɔ tú belumitinine eétú. »