Nufule nɔ́ ɔláta anɔ́
Sáaŋ
ŋɔ yɔɔ́ŋɔ́kɔ́
Bitéŋíti
1
1 Yaŋɔ́,
*mukendisi belumitinine *Kilís,
ª ɛ ŋa mɛ́ ɔ́ɔ́ŋɛ́na Kiliyaª nufule eenu ;
wáŋa ooci awɔ́ *Bandɔ́mɛsɛ́ ŋɔɔ́ lɔ́tɔ́.
Ɛ ŋa mɛ́ ɔ́ɔ́ŋɛ́na tɔ́na bááyɛ́ baáná ebé i ŋeé mi léne bɔmbányɛ bɔmbányɛ.
Tɛ́ cáŋa yaŋɔ́ bímuócí ɛ ŋa mɛ́ banɔ́ léne,
baacɔ bekime e bé ŋe bú ményi taaká ŋa bɔ́ banɔ́ léne tɔ́na
2 a asana na taaká a cɛ́áŋa náánɔ́ ;
ciíci cɛ káá bá náánɔ́ aáná bikúlú bikime.
3 Ne Síkíne Bandɔ́mɛsɛ́ ne uuyé Ɔɔ́nɔ́ *Yésus Kilís á basɔ́ sáyábákɛ́na,
bá basɔ́ bɛ́cámáka mahana,
mbá bá basɔ́ iínjíékíne mbuumu ɛ ɛtɛ́má na aá taaká ne e nulénéne noómi.
Túé lénékénéne
4 Ɛ ŋa mɛ́ bá háyɛ nyitíne nyí bilúŋe a nyiámɛ nyɛlɛca anyía bɔ́ɔ́wɔ baáná a bɔ́mɔtɛ́ ŋa bɔ́ kánda aá taaká noómi háyɛ okotí ayɛ́ Bandɔ́mɛsɛ́ ŋaá basɔ́ iínjie.
5 Ɛ́ná aámbáya,
Kiliya,
asana ayɛ́ ɛ ŋɔ mɛ́ ɔ bata áŋa anyía tu ŋa sɔ́ nyɛmána tú o búle lénéne basɔ́ na basɔ́ ;
tɛ́ cáŋa yɔɔ́sɔɔ́sɔ yí okotí ɛ ŋa mɛ́ ɔwɔɔ́ŋɛ́na aaha,
mbá okotí yɛ́ buáyá ayɛ́ tu ŋa sɔ́ lɔ́kɔ́máka o otúme e nyitúme nyí uúsu olumitinine.
6 Taaká ci nulénéne áŋa o búle látɛ́na *bikotí bɛ́ Bandɔ́mɛsɛ́ ;
okotí ayɛ́ nu ŋa nɔ́ lɔ́kɔ́máká e nyitúme áŋa anyía énu búle lénéne.
7 Ɛ ŋaá mɛ kɔɔna aáná anyía baacɔ beéŋí ma bɔ́ hála haála hekime.
Bé ŋe bú néŋe baacɔ ;
bé ti lumítíníne anyía Yésus *Kilís ŋeé bíbíéné ɔɔcɔ aaha ɔ ɔmɛsɛ́.
ª Nyɛnamá nyɛ́ ɔɔcɔ a nyɛ́ ŋá táŋa aáná áŋa munéŋe baacɔ,
wuúci tɔ́na munuusi Kilís.
8 Yaátɛ́ asana,
énu bíkékényi banɔ́ bɛ́muátá,
anyía búánɔ́ buólíª bukime abɔ́ nu ŋa nɔ́ nyiɔ́kɔ ti wé etémbí ne etémbí,
mbá nu bɔ́ŋgɔ́na bíánɔ́ bɛnamá.
9 Énu menyi anyía ɔɔcɔ okime awɔ́ u náŋa u tɛ á látɛ́na nyiékúnyi nyí Kilís,
mbá u sólikinyi ɔkɛla bíáyɛ́ bɛsana bɛ́ bɛ́muátá ma nána ohónyí,
u tɛ á bá e nyimónjóló na Bandɔ́mɛsɛ́.
Mbá ɔɔcɔ okime awɔ́ u naŋa waá látákɛ́na nyiékúnyi nyí Kilís áŋa e nyimónjóló na na ciasɔ́ Síkíne Bandɔ́mɛsɛ́ ne ne uuyé Ɔɔ́nɔ́ áyá.
10 Aáná mbɔ́kɔ ɔɔcɔ a wɔmɔtɛ́ ŋaá fááya náánɔ́ ne nyiékúnyi nyí etémbí,
nuti wuúci káha e úúnú ooki,
te o wuúci laana anyía « hɔɔ́ɔʼ »,
11 anyía ɔɔcɔ ewú é wuúci téŋíti ŋeé lumitine yááyɛ́ aabɛ́ yɛ́ nyɛbɛ́kɛ́lɛ́na.
12 Ya mɛ́ŋa na bɛsana biéŋí bɛ́ ɔ banɔ́ láakɛna,
mbá i ti ŋé mi léne o biíbi ɔ́ɔ́ŋɔ e nufule ;
i ŋeé mi bíkéti ɔkɔfáaya náánɔ́ ɔ ɔkɔɔ́ banɔ́ lɛca,
mbá tu táŋátáŋa tu lɛcákána anyía tuásɔ́ bámɔ́kɔ́nɛ́na háyɛ nyitíne nyí bilúŋe.
13 Baáná bá ɔnɔ́ɔnyia e woónjúª awɔ́ Bandɔ́mɛsɛ́ ŋɔɔ́ lɔ́tɔ ŋe bú o téŋi.