Olumitinine Ɔɔ́nɔ́ u Bandɔ́mɛsɛ́ áŋa indíné ci nulénéne
5
1 Ɔɔcɔ okime ewú u ŋé lumitinine anyía Yésus áŋa *Kilís awɔ́ Bandɔ́mɛsɛ́ ŋaá tɔ́ma o okonóhi baacɔ,
ɔɔcɔ oócí áŋa ɔɔ́nɔ́ u Bandɔ́mɛsɛ́.
Mbɔ́kɔ ɔɔcɔ ŋeé léne Síkíne,
u ŋeé léne tɔ́na bááyɛ́ baáná.
2 Bɔkɔ a bú ŋaá basɔ́ tóŋínyi anyía tu ŋe sú léne baáná bá Bandɔ́mɛsɛ́ áŋa anyía tu ŋe sú léne Bandɔ́mɛsɛ́,
tu látákɛ́na bíáyɛ́ *bikotí tɔ́na.
3 Yááŋa anyíaʼo :
Oléne Bandɔ́mɛsɛ́ áŋa nyɛlátɛ́na nyɛ́ bíáyɛ́ bikotí ;
aáná nyɛlátɛ́na nyɛ́ bíáyɛ́ bikotí tɛ ŋáá nata,
4 anyía ɔɔcɔ okime a wáŋa ɔɔ́nɔ́ u Bandɔ́mɛsɛ́ áŋa na makɛ́nda ma ɔyáka bɛsana bɛ́ ɔmɛsɛ́.
Tu ŋa sɔ́ yáka bɛsana bɛ́ ɔmɛsɛ́ anyía tu ŋa sɔ́ háya mɔŋɔlɛ́ né Yésus Kilís.
5 Aányɛ́ wáŋa wu ɔyáka bɛsana bɛ́ ɔmɛsɛ́,
ɛ tɛ ŋáa bá hú ooci ewú u ŋe lumitinine anyía Yésus áŋa Ɔɔ́nɔ́ u Bandɔ́mɛsɛ́ e ?
6 Yésus Kilís oócí u ŋaá fááya ɔ ɔmɛsɛ́,
yó bíótíne ne menyífé,
manɔ́ŋɔ́ mó wuúci hámɔ́kɔ́na e úúyé owé;
ª u tɛ ɔ́mɔ fáaya ɔ ɔmɛsɛ́ hú ne menyífé me úúyé obíótíne meéme ne meéme,
mbá u ŋaá fááya ne menyífé me úúyé obíótíne na manɔ́ŋɔ́ me úúyé owé.
Aáná Efúúménénú yí Elilé ŋaá háya ɛmbasɔ́ ;
ciayɛ́ ɛmbasɔ́ áŋa taaká anyía yɛ́áŋa taaká.
7 Yááŋa anyía bambasɔ́mbásɔ áŋa bátátɔ́ :
8 Ne *Efúúménénú yí Elilé,
ne menyífé,
na manɔ́ŋɔ́ ;
bɛ́tátɔ́ eébí okelú ɔ́mɔtɛ́.
9 Mbɔ́kɔ tu náŋa tuesú lumitekine anyía ɛmbasɔ́ cɛ baacɔ áŋa taaká,
túé menyí anyía ɛmbasɔ́ cɛ Bandɔ́mɛsɛ́ áŋa taaká ɔ ɔhɔla cɛ baacɔ,
ananyía wuúci bɛ́muátá u ŋaá háya ɛmbasɔ́ a asana ne uuyé Ɔɔ́nɔ́.
10 Aáná ɔɔcɔ ewú u ŋe lúmitinine anyía Yésus áŋa Ɔɔ́nɔ́ u Bandɔ́mɛsɛ́ áŋa na ɛmbasɔ́ eécí nááyá bɛ́muátá.
Mbá ɔɔcɔ ewú u ti ŋé lúmitinine ŋeé híite Bandɔ́mɛsɛ́ háyɛ ɔfalafala,
anyía u ti ómó lúmitinine ɛmbasɔ́ acɛ́ u ŋa hákɛ́nɛ́ná uuyé Ɔɔ́nɔ́.
11 Ciátɛ́ ɛmbasɔ́ eécí áŋa anyía Bandɔ́mɛsɛ́ ŋaá basɔ́ iínjíékíne yɔɔ́sɔɔ́sɔ yí olíhe yí ekúlú ekime.
Olíhe oócí áŋa né uuyé Ɔɔ́nɔ́.
12 Ɔɔcɔ okime a wáŋa e nyimónjóló na Ɔɔ́nɔ́ u Bandɔ́mɛsɛ́ áŋa ne olíhe,
mbá ɔɔcɔ okime awɔ́ u tɛ á bá e nyimónjóló na Ɔɔ́nɔ́ u Bandɔ́mɛsɛ́ tɛ á bá ne olíhe.
Bɛsana bí nyibíóndísínyi
13 Banɔ́,
belumitinine Yésus *Kilís a wáŋa Ɔɔ́nɔ́ u Bandɔ́mɛsɛ́,
ɛ ŋa mɛ́ banɔ́ ɔ́ɔ́ŋɔ́kɛ́na bɛsana eébí ananyía nuénú menyi anyía nua núáŋa na yɔɔ́sɔɔ́sɔ yí olíhe yí ekúlú ekime.
14 Tu ŋe sú menyi anyía Bandɔ́mɛsɛ́ ŋaá lɔ́kɔ́ma bɔkɔ bukime ebú tu ŋe sú wuúci bata mbɔ́kɔ bú ŋeé wuúci bíléníne ;
asana eéyé ŋaá basɔ́ iínjie makɛ́nda ɔ ɔtɛ́má noómi.
15 Aáná,
háyɛ tu ŋe sú menyi anyía u ŋaá basɔ́ lɔ́kɔ́ma,
túé menyi tɔ́na anyía ekúlú eyí tu ŋe sú wuúci bata bɔkɔ a búmɔtɛ́,
tua sɔ́áŋa ne buúbu.
16 Mbɔ́kɔ ɔɔcɔ a wɔmɔtɛ́ ŋa lɛ́ca uuyé onyíinyí á kɛlaka asana a yaabɛ́ a yɛ́ tɛ á bá yí o wuúci cɔbana o owé,
wá bɛ́cɔ́kɔ́lɔ́kɛ́nɛ́na ɔɔcɔ oócí Bandɔ́mɛsɛ́ ;
Bandɔ́mɛsɛ́ kéé wuúci iínjie olíhe.
Asana eéyé ŋa lɛca baacɔ a bá ŋa bɔ́ kɛla bɔɔbɛ́ a bú tɛ á bá bú o beébe cɔbana o owé.
Mbá bɔɔbɛ́ a búmɔtɛ́ áŋa bú ɔcɔbana ɔɔcɔ o owé ;
tɛ́ cáŋa a nyɛnamá nyɛ́ bɔɔbɛ́ eényí ɛ ŋa mɛ́ kɔɔna anyía bá bɛ́cɔ́kɔ́lɔ́kɛ́nɛ́na ɔɔcɔ eé nyiínyi.
17 Nyɛnana nyikime anyɛ́ ɔɔcɔ ŋa nána ŋaa bɛ́lɔ́ŋɔ anyía bɔɔbɛ́.
Mbá ta híáná,
maabɛ́ a mɔmɔtɛ́ áŋa hɔ́á a má tɛ á bá ma ɔcɔbana ɔɔcɔ o owé.
18 Tu ŋe sú menyi anyía ɔɔcɔ awɔ́ a yáaŋa ɔɔ́nɔ́ u Bandɔ́mɛsɛ́ tɛ ŋá háná á kɛla bɔɔbɛ́.
Mbá Ɔɔ́nɔ́ u Bandɔ́mɛsɛ́ ŋeé wuúci tétényiª anyía ɔɔcɔ u menjiŋé ti wuúci kɛlá bɔɔbɛ́.
19 Tu ŋe sú menyi anyía basɔ́ tua sɔáŋa bɛnyɛ́ma bɛ́ Bandɔ́mɛsɛ́,
mbá baacɔ bekime bé etémbí bá ɔmɛsɛ́ á bɔ́ŋa e butéŋí bɔ́ ɔɔcɔ u menjiŋé noómi.
20 Tu ŋe sú ményi tɔ́na anyía Ɔɔ́nɔ́ u Bandɔ́mɛsɛ́ ŋaá faaya ɔ ɔmɛsɛ́,
yɔ́ basɔ́ iínjíékíne makɛ́nda me omenyinyi na taaká cɛ Bandɔ́mɛsɛ́.
Tua sɔ́ŋa balatákánɔ́ e nyimónjóló na taaká cɛ Bandɔ́mɛsɛ́ oócí e elime ci Yésus Kilís,
uuyé Ɔɔ́nɔ́.
Wuúci wáŋa taaká cɛ Bandɔ́mɛsɛ́ ;
wáŋa yɔɔ́sɔɔ́sɔ yí olíhe yí ekúlú ekime.
21 Banɔ́,
báámɛ baáná,
énu bíkékényíki,
nuti nyemíki bɛbɔ́kɔ́bɔ́kɔ.