Anyána bááŋa bá ɔwaálɔ́náka anamá cé bililé
4
1 Baláamɛ bá ɔtɛ́má,
nuti tényí lúmitine baacɔ a bá ŋa bɔ́ kɔ́ɔna anyía bá bɔ́ŋa na Ambányɛ yí Elilé ;
mbá,
ánɔ cáŋa beébe búlúnéke bɔmbányɛ bɔmbányɛ ananyía núénú ményi mbɔ́kɔ bá bɔ́ŋa taaká ne Elilé e yí ŋeé húle ná Bandɔ́mɛsɛ́.
Yááŋa anyía *behémúnyi bɛsana bá bɛfala ma bɔ́ hála haála hekime.
2 Ánɔ lɛca anyána nua nɔ́ŋa nú omenyi anyía ɔɔcɔ áŋa ne *Efúúménénú yí Elilé.
Ɔɔcɔ okime awɔ́ u ŋa kɔ́ɔna ɛ ɛkatɛ́katɛ́ cɛ baacɔ anyía Yésus *Kilís ŋeé bíbíéné ɔɔcɔ áŋa taaká ne Elilé e yí ŋe húle ná Bandɔ́mɛsɛ́.
3 Mbá ɔɔcɔ okime ewú u ti ŋé lúmitinine anyía Yésus Kilís ŋeé bíbíéné ɔɔcɔª tɛ á bá ne Elilé e yí ŋe húle ná Bandɔ́mɛsɛ́.
Elilé ayɛ́ wáŋa ne yiíyi áŋa elilé yí munuusi Kilís ;
yiíyi nu ŋa nɔ́ lɔ́kɔ́máká anyía yɛ́ káá fáaya ;
aámbáya eeci yá yáaŋa aaha ɔ ɔmɛsɛ́.
4 Banɔ́ báámɛ baáná,
aá banɔ́,
nua núáŋa baáná bá Bandɔ́mɛsɛ́ ;
nu na maa nɔ́ yákáka behémúnyi bɛsana bá bɛfala anyía Elilé a yááŋa náánɔ́ áŋa na makɛ́nda buéŋí ɔ ɔhɔla elilé a yááŋa á baacɔ bá ɔmɛsɛ́.
5 Yááŋa anyía beébe bá bɔ́ŋa baacɔ bá ɔmɛsɛ́ ;
yaátɛ́ asana bá ŋa bɔ́ táŋa bɛsana bɛ́ ɔmɛsɛ́,
aáná baacɔ bá ɔmɛsɛ́ ŋe bú beébe lɔ́kɔ́ma.
6 A yáásɔ́ aháŋá,
basɔ́ tua sɔ́ŋa baáná bá Bandɔ́mɛsɛ́.
Ɔɔcɔ okime ewú u ŋé ményinyi na Bandɔ́mɛsɛ́,
wuúci u ŋá lɔ́kɔ́ma bɛsana abɛ́ tu ŋa sɔ́ kɔ́ɔna ;
ɔɔcɔ awɔ́ u tɛ á bá ɔɔ́nɔ́ u Bandɔ́mɛsɛ́ tɛ ŋá lɔ́kɔ́ma bɛsana abɛ́ tu ŋa sɔ́ kɔɔna.
Aáná tua sɔ́ŋa tú omenyi ɔwaálɔ́na ne Elilé yí taaká na yɛ́ nyɛnana.
7 Baláamɛ bá ɔtɛ́má,
túé búle lénéne basɔ́ na basɔ́ anyía nulénéne ŋeé húle ná Bandɔ́mɛsɛ́.
Ɔɔcɔ okime náánɔ́ ewú u ŋeé léne bɔsɔ́ɔ́kɔ́ áŋa ɔɔ́nɔ́ u Bandɔ́mɛsɛ́,
u ŋeé ményinyi ne wuúci.
8 Ɔɔcɔ okime ewú u ti ŋéé léne bɔsɔ́ɔ́kɔ́ ti ŋéé ményinyi na Bandɔ́mɛsɛ́,
anyía Bandɔ́mɛsɛ́ naŋa weé lénéke baacɔ.
9 Bandɔ́mɛsɛ́ ŋaá basɔ́ námbɔnɛna núáyɛ́ nulénéne ekúlú ayɛ́ u ŋaá tɔ́má hííyé hɛkɔŋɔ́ hí Ɔɔ́nɔ́ ɔ ɔmɛsɛ́,
ananyía mbá túásɔ́ bá na taaká ci olíhe nááyá.
10 Asana e yí ŋó tóŋínyi nulénéne áŋa anyía Bandɔ́mɛsɛ́ u ŋa cáŋa ɔ basɔ́ léne,
yɔ́ tɔ́ma uuyé Ɔɔ́nɔ́ ɔ ɔkɔbɛ́sɔ́mbɛ́na a yáásɔ́ asana,
mbá u basɔ́ nyɛ́ánakɛnɛna máásɔ́ maabɛ́ ;
nulénéne eénú tɛ á bá anyía basɔ́ tú ŋa sɔ́ cáŋa olénéke Bandɔ́mɛsɛ́.
11 Baláamɛ bá ɔtɛ́má,
a asana ayɛ́ Bandɔ́mɛsɛ́ ŋaá basɔ́ lénéke buéŋí aáná,
ɛ́ɛhɛ́ basɔ́ tɔ́na túásɔ́ nyɛmána tú olénékénéne.
12 Énu ményi anyía ta ɔɔcɔ tɛ ŋa lɛ́ca Bandɔ́mɛsɛ́ háyɛ wáŋa ;
ta híáná ekúlú eyí tu ŋe sú lénéne basɔ́ na basɔ́,
tua sɔ́ŋa limine e nyimónjóló ne wuúci,
nulénéne anɔ́ ú náŋa waá basɔ́ lénéke áŋa nunyíóyónú náásɔ́ bɔmbányɛ bɔmbányɛ.
13 Bɔkɔ a bú ŋa basɔ́ tóŋínyi anyía tua sɔ́ŋa balatánɔ́ e nyimónjóló na Bandɔ́mɛsɛ́,
wuúci tɔ́na ɔlatánɔ́ e nyimónjóló na basɔ́ áŋa anyía :
U ŋaá basɔ́ iínjíé yááyɛ́ Elilé.
14 Basɔ́ bɛ́muátá tu ŋa sɔ́ lɛ́cáka na cáásɔ́ eése anyía Taatá Bandɔ́mɛsɛ́ ŋaá tɔ́ma uuyé Ɔɔ́nɔ́ o okonóhi baacɔ bekime bá ɔmɛsɛ́ ;
aáná tu ŋe sú húlinyi baacɔ anyía asana eéyé áŋa taaká.
15 Ɔɔcɔ okime awɔ́ u ŋá kɔ́ɔna anyía Yésus áŋa Ɔɔ́nɔ́ u Bandɔ́mɛsɛ́ ŋee límine e nyimónjóló na Bandɔ́mɛsɛ́,
Bandɔ́mɛsɛ́ tɔ́na e nyimónjóló ne wuúci.
16 Basɔ́ bɛ́muátá tu ŋe sú ményi,
tu lumitekinine anyía Bandɔ́mɛsɛ́ náŋa waá basɔ́ lénéke ;
wáŋa nulénéne.
Aáná ɔɔcɔ okime awɔ́ u náŋa weé líhéke e nulénéne noómi ŋeé límine e nyimónjóló na Bandɔ́mɛsɛ́,
Bandɔ́mɛsɛ́ tɔ́na e nyimónjóló ne wuúci.
17 Bɔkɔ a bú ŋaá basɔ́ tóŋínyi anyía tu ŋe sú léne Bandɔ́mɛsɛ́ bɔmbányɛ bɔmbányɛ áŋa anyía tu ti ké sú líkíme ta bɔkɔ buɔ́sɛ́ abɔ́ Bandɔ́mɛsɛ́ káá sɔ́mbɔ́tɔ́kɔ́nɛ́na baacɔ bɛsana.
Úúsú olíhe ú ɔmɛsɛ́ ooci áŋa i iŋetí ci olíhe ú Yésus Kilís.
18 Bulíkílíki tɛ á bá e nulénéne noómi,
mbá taaká taaká ci nulénéne ŋeé menyisi bulíkílíki ɔ ɔtɛ́má.
Yááŋa anyíaʼo,
ɔbá ne bulíkílíki ɔ ɔtɛ́má ŋeé hémbule anyía bɔ́nɔ́sɛa áŋa cɛ́ ɔbá hɔ́á ;
aáná ɔɔcɔ okime a wáŋa ne bulíkílíki ɔ ɔtɛ́má tɛ ŋá lɔ́kɔ́ma injibí ci nulénéne nú Bandɔ́mɛsɛ́.
19 A náásɔ́,
tua sɔ́ŋa ne nulénéne ɛ ɛtɛ́má ananyía Bandɔ́mɛsɛ́ u ŋaá cáŋa ɔ basɔ́ léne.
20 Mbɔ́kɔ ɔɔcɔ ŋa kɔ́ɔna anyía :
« I ŋeé mi léne Bandɔ́mɛsɛ́ »,
mbá u líŋékíne bɔsɔ́ɔ́kɔ́,
wáŋa na afala.
Yááŋa anyía ɔɔcɔ ewú u ti ŋé léne baacɔ abá u ŋa lɛca ne eése,
ɔɔcɔ oócí tɛ á bá wu olénéke Bandɔ́mɛsɛ́ awɔ́ u tɛ ŋá lɛca.
21 Okotí ayɛ́ Bandɔ́mɛsɛ́ ŋaá basɔ́ iínjie íyéeye aná :
Ɔɔcɔ ewú u ŋeé léne Bandɔ́mɛsɛ́ ŋá nyɛmána tɔ́na wu olénéke bɔsɔ́ɔ́kɔ́.