2
1 Báámɛ baáná e,
ɛ ŋa mɛ́ banɔ́ ɔ́ɔ́ŋɛ́na bɛsana eébí anyía nu tɛ kɛláka bɛsana a bɛɛbɛ́.
Mbá,
mbɔ́kɔ yɛ́ ŋɔ́ yɔ́ɔ hámɛ́na anyía kuɔŋɔ́ ɔɔcɔ a wɔmɔtɛ́ ɔ́ɔ kɛ́la asana a yaabɛ́,
menyi anyía tua sɔ́ŋa na Mɔkamɛna eé buúse bú Síkíne Bandɔ́mɛsɛ́ ;
wuúci wáŋa Yésus Kilís,
atálɛ́mánánɔ́ yɛ́ ɔɔcɔ.
2 Yááŋa anyía wuúci bɛ́muátá u ŋaá bɛ́sɔ́mbɛ́na háyɛ etúké anyía mbá Bandɔ́mɛsɛ́ á basɔ́ nyɛanákɛ́nɛ́na maasɔ́ maabɛ́ ;
tɛ́ cáŋa hú maasɔ́ maabɛ́ bímuócí,
mbá u ŋaá nyɛ́anɛnɛna tɔ́na maabɛ́ ma baacɔ bekime bá ɔmɛsɛ́ okime.
Mumenyi Bandɔ́mɛsɛ́ ŋaá látɛ́na bíáyɛ́ bikotí
3 Mbɔ́kɔ tu naŋa tuasɔ́ látákɛ́na *bikotí bɛ́ Bandɔ́mɛsɛ́,
bú ŋo tóŋínyi anyía tu ŋe sú wuúci menyi bɔmbányɛ.
4 Ɔɔcɔ okime awɔ́ ú ŋa kɔɔna anyía u ŋeé wuúci menyi bɔmbányɛ,
mbá u tɛ látɛ́na bíáyɛ́ bikotí áŋa na afala,
taaká tɛ á bá nááyá buúse bukime.
5 Mbá yááŋa anyíaʼo,
ɔɔcɔ okime awɔ́ ú ŋa látɛ́na bɛsana abɛ́ Bandɔ́mɛsɛ́ ŋa kɔɔna,
wuúci oócí u ŋé léne Bandɔ́mɛsɛ́ bɔmbányɛ bɔmbányɛ.
A asana eéyé tu ŋe sú ményi anyía tua sɔ́ŋa balatákánɔ́ e nyimónjóló ne wuúci.
6 Ɔɔcɔ okime awɔ́ u ŋá kɔɔna anyía u ŋee límine e nyimónjóló na Bandɔ́mɛsɛ́ ŋá nyɛmána wu olíhéke i iŋetí ci olíhe ú *Kilís bɛ́muátá.
7 Baláamɛ bá ɔtɛ́má e,
okotí ayɛ́ ɛ ŋa mɛ́ banɔ́ ɔ́ɔ́ŋɛ́na aaha tɛ a bá yɔɔ́sɔɔ́sɔ yí okotí.
Mbá okotí yɛ́ buáyá yááŋa ;
yiíyi nú ŋe nú ményi o otúme e nyitúme nyí úúnú olumitinine.
Okotí yɛ́ buáyá eéyé áŋa buhúnyi abɔ́ nú na maá nɔ́ lɔ́kɔ́máka.
8 Mbá ta híáná,
okotí ɔ́ yɔɔ́sɔª yáaŋa ɛ ŋa mɛ́ banɔ́ ɔ́ɔ́ŋɛ́na ;
yiíyi eéyé yí ŋé bítóŋínyi ne o olíhe ú Kilís ne e úúnú áyá.
Yááŋa anyía ibíne á yáaŋa ɔ ɔmanɔkɔna ;
taaká ci eese á yáaŋa ɔ ɔnɔma.ª
9 Ɔɔcɔ okime awɔ́ u ŋá kɔɔna anyía u ŋeé líhe ambányɛ yí olíhe e eese noómi mbá,
u liŋekine uuyé onyíinyí á yánáŋa i ibíne noómi.
10 Yááŋa anyíaʼo,
ɔɔcɔ okime ewú u ŋeé léne uuyé onyíinyí,
wuúci u ŋeé líhe ambányɛ yí olíhe e eese noómi ;
ta bɔkɔ a búmɔtɛ́ bú o wuúci kúfítínyi tɛ a bá nááyá.
11 Mbá ɔɔcɔ okime ewú u ŋe líŋine uuyé onyíinyí ŋeé líhe i ibíne noómi.
U ŋaá kánda i ibíne noómi,
u ti menyí haála ahá u ŋa cɔ́ba ananyía ibíne meé wuúci kuusi indímé.
12 Banɔ́ báámɛ baáná e,
ɛ ŋa mɛ́ banɔ́ ɔ́ɔ́ŋɛ́na bɛsana eebi anyía Bandɔ́mɛsɛ́ maá banɔ́ nyɛ́ánakɛnɛna máánɔ́ maabɛ́ a asana ne Kilís.
13 Ɛ ŋa mɛ́ banɔ́ ɔ́ɔ́ŋɛ́na bɛsana eebi,
banɔ́,
báámɛ be síkíne,
anyía nu ŋe nú menyi ooci awɔ́ u ŋaá bá o otúme e nyitúme nyɛ́ bɛnyɛ́ma bikime.
Ɛ ŋa mɛ́ banɔ́ ɔ́ɔ́ŋɛ́na bɛsana eebi,
banɔ́,
na bɛnɔ́kɔ́ na babɔ́la,
anyía nú ma nɔ́ yáká ɔɔcɔ u menjiŋé.
14 Banɔ́ báámɛ baáná,
ɛ ŋa mɛ́ banɔ́ ɔ́ɔ́ŋɛ́na bɛsana eebi anyía nu ŋe nú menyi ciasɔ́ Síkíne Bandɔ́mɛsɛ́.
Ɛ ŋa mɛ́ banɔ́ ɔ́ɔ́ŋɛ́na bɛsana eebi,
banɔ́,
báámɛ be síkíne,
anyía nu ŋe nú menyi ooci awɔ́ u ŋaá bá o otúme e nyitúme nyɛ́ bɛnyɛ́ma bikime.
Ɛ ŋa mɛ́ banɔ́ ɔ́ɔ́ŋɛ́na bɛsana eebi,
banɔ́,
na bɛnɔ́kɔ́ na babɔ́la,
anyía nua nɔ́ŋa na makɛ́nda o olumitinine noómi,
Bɛsana bɛ́ Bandɔ́mɛsɛ́ ŋeé límine aanɔ́ ɛ ɛtɛ́má ekúlú ekime,
nú ma nɔ́ yáká tɔ́na ɔɔcɔ u menjiŋé.
15 Banɔ́ bekime,
nuti bíínjíékíne o oléne ɔmɛsɛ́ ooci ta bɛsana a bɛ́áŋa ɔ ɔmɛsɛ́.
Yááŋa anyía,
ɔɔcɔ okime ewú u ŋeé bíínjie o oléne ɔmɛsɛ́ ooci ti ŋée léne Síkíne Bandɔ́mɛsɛ́ buúse bukime.
16 A bɛsana bikime bɛ́ ɔmɛsɛ́ ooci a bɛ́áŋa anyía :
Na bɛsana bí imehú a bɛ́ ŋa basɔ́ hámɛ́na ɛ ɛtɛ́má,
na yaáká yí eése,
ne obíbééti awɔ́ baacɔ ŋe bú bíbééti na búábɔ́ bɔnɔ́mɛ ;
bí ti ŋé húle né Síkíne Bandɔ́mɛsɛ́,
mbá bíáŋa bɛ́ ɔmɛsɛ́.
17 Énu menyi anyía ɔmɛsɛ́ ooci á yáaŋa ɔ ɔmana,
na bɛsana a bɛ́ ŋa hámɛ́na baacɔ ɛ ɛtɛ́má áyá.
Mbá,
ɔɔcɔ okime awɔ́ u náŋa waá látákɛ́na bɛsana e bí ŋeé bíléníne Bandɔ́mɛsɛ́ ŋeé líhe bikúlú bikime.
Benuusi Kilís
18 Báámɛ baáná,
bikúlú bí nyibíóndísínyi eebi tua sɔáŋa o olíhe.
Ánɔ bɛ́tááka anyía bá ŋa banɔ́ láákɛ́na anyía e bikúlú eébí munuusi *Kilís káá hámɛ́na baacɔ hú huasɛ.
Yááŋa anyía benuusi Kilís ma bɔ́ háláka aámbáya ;
buátɛ́ bɔkɔ bú ŋo tóŋínyi anyía tua sɔáŋa o olíhe bikúlú bí nyibíóndísínyi.
19 Baacɔ eébé ŋa bɔ́ bá buáyá e úúsú ɔlɔŋɔ,
bá ŋa bɔ́ hámɔ́kɔ́na anyía bɔ́ tɛ ɔ́mɔ bɔ́ bá taaká cɛ́ baacɔ cí uúsú ɔlɔŋɔ.
Yááŋa anyíaʼo,
mbɔ́kɔ bábɔ́ bámɔ́kɔ́na baacɔ bé úúsú ɔlɔŋɔ,
keyé bá ŋa bɔ́ lɔ́bɔ́kɔ.
Mbá bá ŋa bɔ́ hátɔ́kɔ́ná anyía búé bítóŋínyi o motóndóló anyía bɔ́ tɛ ɔ́mɔ bɔ́ bá taaká cɛ́ baacɔ cí uúsú ɔlɔŋɔ.
20 Mbá banɔ́,
a yáánɔ́ aháŋá,
nu ŋe nú ményi anyía Kilís na maá banɔ́ súkunekine *Efúúménénú yí Elilé.
Ɛ́ɛhɛ́ nua núáŋa o omenyi taaká,
ª banɔ́ bekime.
21 Mbɔ́kɔ yaŋɔ́ ɛ ŋa mɛ́ banɔ́ ɔ́ɔ́ŋɛ́na bɛsana eebi,
bú tɛ á bá anyía nu ti ŋé nú ményi taaká ;
yááŋa hú anyía nuanua báka o omenyi taaká,
nu menyukune tɔ́na anyía afala tɛ á bá yɛ́ ɔháma aá taaká noómi.
22 Ɛ́ɛ,
aányɛ́ wáŋa ɔfalafala aná e ?
Ɔfalafala áŋa ɔɔcɔ okime awɔ́ u ŋa kɔɔna anyía Yésus tɛ a bá Kilís.
Wuúci wáŋa ɔfalafala,
wuúci munuusi Kilís,
u bínéŋítíkínyi ekúlú ɔ́mɔtɛ́ na ciasɔ́ Síkíne Bandɔ́mɛsɛ́ ne uuyé Ɔɔ́nɔ́ áyá.
23 Yááŋa anyía ɔɔcɔ okime ewú u ŋé bínéŋítínyi Ɔɔ́nɔ́ u Bandɔ́mɛsɛ́ ŋeé bínéŋítínyi tɔ́na Síkíne.
Mbá ɔɔcɔ okime awɔ́ u ŋa kɔ́ɔna anyía Yésus áŋa Ɔɔ́nɔ́ u Bandɔ́mɛsɛ́ ŋe ményi tɔ́na Síkíne.
24 Yaátɛ́ asana núánɔ́ nyɛmána nú otétényíki bɔmbányɛ e cíínú ɛtɛ́má asana eéyé ayɛ́ nu ŋa nɔ́ lɔ́kɔ́máká e nyitúme nyí úúnú olumitinine.
Mbɔ́kɔ nu ŋa nɔ́ cɔ́ba ne buúse o otétényi bɔmbányɛ e cíínú ɛtɛ́má asana ayɛ́ nu ŋa nɔ́ lɔ́kɔ́máká e nyitúme nyí úúnú olumitinine,
nu ké nú límine banɔ́ bɛ́muátá e nyimónjóló na Ɔɔ́nɔ́ u Bandɔ́mɛsɛ́ ne Síkíne áyá.
25 Bɔkɔ ebú Kilís ŋaá basɔ́ bɛ́tánɛ́ná áŋa yɔɔ́sɔɔ́sɔ yí olíhe yí ekúlú ekime.
26 Ɛ ŋa mɛ́ banɔ́ ɔ́ɔ́ŋɛ́na aáná a asana na baacɔ a bá ŋa bɔ́ áamba ɔ banɔ́ nénisi ohónyí.
27 Mbá banɔ́,
a yáánɔ́ aháŋá,
Kilís na maá banɔ́ súkunine Efúúménénú yí Elilé;
ª ɛ́ɛhɛ́ bú tɛ ŋá háná ɔyɔɔ́lɔ anyía bá banɔ́ eékúnyíki nyiékúnyi nyí etémbí.
Yááŋa anyía Elilé eéyé ŋaá banɔ́ eékúnyi bɛsana bikime a bɛ́áŋa taaká,
biíbi tɛ́ka bɛfala.
Énu limíne e nyimónjóló nááyá háyɛ Elilé ŋaá banɔ́ eékúnyíkí.
Baáná bá Bandɔ́mɛsɛ́
28 Yaátɛ́ asana aná,
banɔ́ báámɛ baáná,
énu limíne e nyimónjóló ne *Kilís,
ananyía ekúlú ayɛ́ u ká ka hálɔ́mɔ́na,
tu ká sɔ́ bámɔ́kɔ́na o moyóyónó,
tu tɛ lɔ́kɔ́ma aatɔ́ ɔlama eeyé eé buúse.
29 Ahɛ́ nu ŋe nú menyi anyía wáŋa atálɛ́mánánɔ́ yɛ́ ɔɔcɔ eé buúse bɔ́ Bandɔ́mɛsɛ́,
énu menyí tɔ́na anyía ɔɔcɔ okime awɔ́ u ŋa kɛ́la bɛsana a bɛtálɛ́mánánɔ́ áŋa uuyé ɔɔ́nɔ́.