Nufule nú buúse anɔ́
Sáaŋ
ŋɔ yɔɔ́ŋɔ́kɔ́
Buhúnyi e bú ŋe yiínjíéne olíhe
1
1 Tu ŋa sɔ́ banɔ́ ɔɔ́ŋɛ́na nufule eenu a asana yí Buhúnyi e bú ŋe yiínjíéne olíhe.
ª Bú ŋaá bá ɛ́cɛ nyitúme nyɛ́ bɛnyɛ́ma bikime tɛ ŋáá bá.
Tu ŋa sɔ́ lɔ́kɔ́máka úúyé ɔtáŋa na cáásɔ́ eetú,
túo buúbu lɛcáka na cáásɔ́ eése cá bɛ́muátá,
túo buúbu kebeliki ;
cáásɔ́ aabá cío buúbu bítíséke.
2 Ekúlú ayɛ́ *Bandɔ́mɛsɛ́ ŋeé céŋísi Buhúnyi bú olíhe eébú ɔɔcɔ u cɛɛ́tɔ,
yó buúbu tóŋínyi a baacɔ,
tu ŋe sú buúbu lɛcáka.
Ɛ́ɛhɛ́ tu ŋa sɔ́ banɔ́ bíkétínyi,
tu banɔ́ húlikinyi asana yɛ́ yɔɔ́sɔɔ́sɔ yí olíhe yí ekúlú ekime eéyé a yɛ́ ŋaá bá ne Síkíne Bandɔ́mɛsɛ́ ;
aámbáya yɛ́ ma basɔ́ bítóŋínyi a miányɛ́.
3 Asana eéyé tu ŋa sɔ́ lɛ́cáka,
túɔ́ lɔ́kɔ́máka ;
yiíyi eéyé tu ŋa sɔ́ banɔ́ húlinyi tɔ́na anyía núánɔ́ bámɔ́kɔ́na e nyimónjóló na basɔ́ abá tua sɔ́ŋa e nyimónjóló ne ne Síkíne ne ne uuyé Ɔɔ́nɔ́ *Yésus *Kilís.
4 Basɔ́ bɛ́muátá,
tu ŋa sɔ́ banɔ́ ɔ́ɔ́ŋɛ́na bɛsana eébí ananyía mbá túásɔ́ª bámɔ́kɔ́na háyɛ nyitíne nyí bilúŋe.
Síkíne Bandɔ́mɛsɛ́ áŋa eese
5 Ɛsɔ́ma acɛ́ tu ŋa sɔ́ lɔ́kɔ́máká né Yésus *Kilís,
ícíeci tu ŋa sɔ́ banɔ́ húlinyi :
Cɛ́áŋa anyía Bandɔ́mɛsɛ́ áŋa eese,
ta bɔkɔ a búmɔtɛ́ bú ibíne tɛ a bá nááyá.
6 Mbɔ́kɔ tu ŋa sɔ́ kɔ́ɔna anyía tua sɔ́ŋa e nyimónjóló na Bandɔ́mɛsɛ́,
basɔ́ hú ɔcɔba ne buúse ɔ ɔkɛla bɛsana bí ibíne,
ɛ́cɛ anyía tu ŋe sú néŋe baacɔ,
tu ti líhe a taaká noómi.
7 Asana ɔ́mɔtɛ́,
mbɔ́kɔ tu ŋe sú líhe e eese noómi háyɛ Bandɔ́mɛsɛ́ wuúci bɛ́muátá ŋé líhe e eese noómi,
tua sɔ́áŋa e nyimónjóló basɔ́ na basɔ́,
manɔ́ŋɔ́ me uuyé Ɔɔ́nɔ́ Yésus ŋaá basɔ́ fúúmínyi a búásɔ́ bɔɔbɛ́ bukime.
8 Mbɔ́kɔ tu ŋa sɔ́ kɔ́ɔna anyía tu tɛ asɔ́ bá bakɛla maabɛ́,
tu ŋe sú bínéŋe basɔ́ bɛ́muátá ;
aáná taaká tɛ a bá náásɔ́ buúse bukime.
9 Asana ɔ́mɔtɛ́,
mbɔ́kɔ tu ŋa sɔ́ bɛ́kɔ́tɔ búásɔ́ bɔɔbɛ́ eé buúse bɔ́ Bandɔ́mɛsɛ́,
wuúci bɛ́muátá u káá basɔ́ buúbu nyɛanɛnɛna,
yó buúbu fúúmínyi bukime anyía wáŋa atálɛ́mánánɔ́ yɛ́ ɔɔcɔ,
u nyíóyísíkínyi úúyé ɔtáŋa.
10 Túásɔ́ kɔɔna anyía tu tɛ ŋá sɔ́ kɛ́la bɔɔbɛ́,
tú me sú hélúmúnyi Bandɔ́mɛsɛ́ ɔfalafala,
búáyɛ́ buhúnyi tɛ a bá a cáásɔ́ eetú buúse bukime.