Nyiékúnyi a asana na ɔbɛ́cɔ́kɔ́lɛ́na
2
1 Asana yí buúse a yɛ́ á hɔ́la ayɛ́ ɛ ŋa mɛ́ aamba owoókísi baacɔ áŋa anyía bá bɛ́cɔ́bɔ́kɛ́na Bandɔ́mɛsɛ́,
bá bɛ́cɔ́kɔ́lɔ́kɛ́na,
bé wuúci bataka bɛsana eé buúse bɔ́ baacɔ bekime,
bé wuúci iínjíékíne tɔ́na bitéŋíti eébú eé buúse.
2 Ánɔ bɛ́cɔ́kɔ́lɔ́kɛ́na Bandɔ́mɛsɛ́ ne eé buúse bú betéŋí,
ne eé buúse bɔ́ baacɔ bé etémbí bekime e bé ŋe bú téŋínyi,
anyía ne mbuumu ne yeébu á bámɔ́kɔ́nɛ́na a bunɔŋɔ,
nu kékéke Bandɔ́mɛsɛ́ na nyɛbɛ́kɛ́lɛ́na a nyɛmbányɛ.
3 Ɔbɛ́cɔ́kɔ́lɛ́na Bandɔ́mɛsɛ́ eé buúse bɔ́ baacɔ bekime áŋa ambányɛ yɛ́ asana e yí ŋe bíléníne Bandɔ́mɛsɛ́,
Mu-basɔ́-nohi.
4 U ŋeé léne anyía baacɔ bekime ɔ́ nɔhɔ́kɔ,
bé menyukune taaká.
5 Yááŋa anyía Bandɔ́mɛsɛ́ áŋa hú ɔmɔtɛ́ ;
ohényíhényi áŋa hú ɔmɔtɛ́ tɔ́na ɛ ɛkatɛ́katɛ́ cɛ na Bandɔ́mɛsɛ́ na baacɔ,
wuúci wáŋa ɔɔcɔ,
Yésus *Kilís.
6 U ŋaá faáya yó koó wé anyía wá háŋɔ́náka baacɔ bekime a buɔ́lɛ́ bɔ́ bɔɔbɛ́.
Asana eéyé ŋaá bɛ́kɛ́láka e ekúlú a yɛnyɛmánánɔ́,
bú tóŋgínyi anyía Bandɔ́mɛsɛ́ ŋa yáamba onohi baacɔ bekime.
7 Yaátɛ́ asana Bandɔ́mɛsɛ́ ŋeé mi télímínyi ne muhulinyi baacɔ Ɛsɔ́ma na ɔɔcɔ u ɛndɔ́ma,
anyía yémi hulíkínyi baacɔ bɛsana eébí.
U ŋaá mɛ tɔ́ma o okowéékúnyi baacɔ a bá tɛ ábɔ́ bá *Besuif,
anyía bé lumítékíníne taaká cɛ́ bɛsana.
Ɛ ŋa mɛ́ kɔɔna taaká,
i ti ŋé mi néŋe.
8 Aáná ɛ ŋa mɛ́ áamba anyía keyé banɔ́mɔcɔ́ ábɔ́ bɛ́cɔ́kɔ́lɛ́na Bandɔ́mɛsɛ́ bɛhaála bikime ne efúúménénú yɛ́ ɔtɛ́má,
tɛ́ka ne meliŋé ɔ ɔtɛ́má,
ta na bɛhɔnɔnɔ.
9 Ɛ ŋa mɛ́ áamba tɔ́na anyía beénjú á bɛ́láŋáka a nyɛnamá a nyɛ́ ŋa bɛ́ámba,
bá lɔ́kɔ́máka aatɔ́ ɔlama,
bá tɛ bɛ́nua anamá cé tuhúnyi anyía bébú bítóŋgínyi ;
bá tɛ bɛ́háya bɛnyɛ́ma bɛ́ nyɛnɔ́kɔ́ bí kóolo,
ta bɛ́ bɛnyɛ́ma e bí ŋe mueli bɔmbányɛ,
ta hú bɛlaŋa bɛ́ mɔɔnyɛ́ meéŋí.
10 Mbá,
beénjú a bá ŋa bɔ́ kɔɔna anyía bé ŋe bú kéke Bandɔ́mɛsɛ́ ŋa bɔ́ nyɛmána bá ɔkɛlaka bɛmbányɛ bɛ́ bɛsana.
11 Yɛ́ ŋa nyɛmána anyía beénjú é lesikinyi mbuumuª ekúlú eyí bé ŋé beébe eékúnyi,
bá lɔ́kɔ́mákɛ́na beékúnyi buéŋí.
12 Ɛ ŋa mɛ́ sáŋɔ́nɛ́na beénjú anyía bé ti eékúnyíki banɔ́mɔcɔ́,
bé ti beébe téŋínyi mbá,
bé lesíkínyi mbuumu,
13 anyía Bandɔ́mɛsɛ́ ŋa cáŋacáŋa o keti *Átam.
E elime eécí u ŋe kéti *Ɛfa,
14 tɔ́na anyía *Sátan ti ómo néŋe Átam,
mbá oónjú.
Yááŋa anyía oónjú u ŋa kɛlakɛna Bandɔ́mɛsɛ́ ɛndɔ́kɔ́.
15 Ta híáná,
Bandɔ́mɛsɛ́ kóó nohiki beénjú a asana ne obíéne baáná,
ª mbɔ́kɔ bá ŋa bɔ́ cɔba ne buúse o olumitinine,
bé lénéke baacɔ,
beébe ne efúúménénú yí olíhe e nyibílóosi ɔ ɔmɛsɛ́.