Nufule nú buúse enú Bóol ŋɔ yɔɔ́ŋɔ́kɛ́ná
Timoté
Bitéŋíti
1
1 Yaŋɔ́ Bóol,
*ɔɔcɔ u ɛndɔ́ma u *Yésus *Kilís e nyitélímínyi na nyɛ́ *Bandɔ́mɛsɛ́,
muasɔ́ Munohi,
ne nyí Yésus Kilís,
maasɔ́ Mɔŋɔlɛ́.
2 Yaŋɔ́,
ɛ ŋa mɛ́ ɔ wɔɔ́ŋɛ́na nufule eenu,
kuɔŋɔ́ Timoté ;
ɔ ɔ́ŋa ciamɛ taaká cɛ ɔɔ́nɔ́ anyía o ŋoó lumitinine.
Na ciasɔ́ Síkíne Bandɔ́mɛsɛ́ ne uusú Otéŋí a Waáŋá Yésus Kilís bá ɔ sayábákɛ́na,
bá ɔ bɛ́cáma mahana,
bé o wiínjie mbuumu ɔ ɔtɛ́má noómi.
Beékúnyi eékúnyi cá bɛfala
3 Ekúlú ayɛ́ ɛ ŋa mɛ́ bá yámɛ cɔbaka a Masɛtuán,
ɛ ŋɔ mɛ́ ɔ laána anyía ɔ́ɔ lɔ́bɔ ɛ Ɛfɛ́ɛsɛª anyía ɔ́ɔ sáŋɔ́nákɛ́na baacɔ a bɔ́mɔtɛ́ bá hɔ́á oweékúnyi nyiékúnyi nyɛ́ bɛfala.
4 Beébe sáŋɔ́nákɛ́na tɔ́na obíínjie ne o obíkéti tuhélúméke tɔ́ buáyá na ɔ ɔfana eénye cá baacɔ cá tɔnyɛ́nɔ́ a cá tɛ ŋá mana.
ª Bɛsana eébí bikime ŋe céhisi hú isuŋí,
bɛ́ tɛ ɔɔ́lɔ ɔkɛla nyɛtákɛ́na nyɛ́ bɛsana nyɛ́ Bandɔ́mɛsɛ́.
Tu ŋe sú menyi nyɛtákɛ́na eényí anyía tu ŋe sú lumitinine.
5 Aatɔ́ yɛ́ asana eyí o ŋoó beébe laana aáná áŋa anyía bá ŋa bɔ́ nyɛmána bé olénéke bɔsɔ́ɔ́kɔ́.
Nulénéne eénú hulukune e efúúménénú yɛ́ ɔtɛ́má noómi,
ne e hííwu hɛcɔɔ́cɔ́ a hɛ́áŋa ɔ ɔtɛ́má a hɛ́ tɛ ŋɔ́ yɔ́ɔ kákálɛ́na,
na aá taaká ci olumitinine.
6 A aháŋá na bɛsana eébí,
bɔ́mɔtɛ́ baacɔ ŋa bɔ́ nánáka ohónyí,
bɔ́ cɔba hú o ohulinyi baacɔ bɛsana bí isuŋí a bɛ́ tɛ ŋɔ́ yɔɔ́lɔ.
7 Bé ŋe bú bíhiíte háyɛ eebe e bé ŋe bú menyi oweékúnyi *bikotí bɛ́ Bandɔ́mɛsɛ́ mbá,
bé ti biíbi lɔ́kɔ́ma bɔmbányɛ beébe bɛ́muátá :
Ta bɔkɔ abɔ́ bá ŋa bɔ́ kɔɔna,
mbá te mehúnyi emé bé ŋe bú hémúnyi oweékúnyi na mɔŋɔlɛ́ mekime.
8 Tu ŋe sú menyi anyía bikotí bɛ́ Bandɔ́mɛsɛ́ áŋa bɛmbányɛ mbɔ́kɔ bé ŋeé biíbi látɛ́na háyɛ yɛ́ á nyɛmána.
9 Túé menyi anyía bá náŋa bé ti é télímínyi bikotí eé buúse bɔ́ bɛtálɛ́mánánɔ́ bɛ́ baacɔ mbá,
bé ŋeé biíbi télímínyi ne eé buúse bɔ́ bacaŋɛna bɛsana,
ne eé buúse bɔ́ baacɔ a bá ŋa bɔ́ kɛlɛna Bandɔ́mɛsɛ́ aatɔ́ ɔnata,
ne eé buúse bɔ́ na baŋána na bakɛla maabɛ́,
ne eé buúse bú eebe e bé ŋe bú féníne na Bandɔ́mɛsɛ́ ne olumitinine,
ne eé buúse bɔ́ bɔɔ́nɔ na bíábɔ́ bibíényi na baacɔ bé etémbí áyá.
10 Ɛ náŋa bé télímíkínyi tɔ́na bikotí ne eé buúse bɔ́ balátɛ́na beénjú,
ne eé buúse bɔ́ banɔ́mɔcɔ́ a bá ŋa bɔ́ fianana bɔsɔ́ɔ́kɔ́ banɔ́mɔcɔ́.
Bikotí áŋa tɔ́na ne eé buúse bɔ́ bakɛla onduné ú baacɔ,
ne eé buúse bú benéŋe baacɔ,
ne eé buúse bɔ́ baacɔ a bá ŋa bɔ́ talɛmɛna ɛ ɛmbasɔ́ cɛ́ bɛfala,
ne eé buúse tɔ́na bɔ́ baacɔ a bá ŋa bɔ́ kɛla bɛɛbɛ́ bɛ́ bɛsana bí etémbí e bí ŋe núusi ambányɛ yí nyiékúnyi.
11 Ambányɛ yí nyiékúnyi eéyé áŋa a Ambányɛ yɛ́ Ɛsɔ́ma noómi ;
yɛ́ ŋa lɛca Bandɔ́mɛsɛ́,
Muómóomo.
U ŋeé líhe a ambányɛ yɛ́ haála.
Wuúci ú ŋeé mi cuméke Ambányɛ yɛ́ Ɛsɔ́ma eeye.
Bóol ŋe yiínjie Bandɔ́mɛsɛ́ bitéŋíti
12 I ŋé mi iínjie Yésus *Kilís,
uusú Otéŋí a Waáŋá,
bitéŋíti,
anyía ú ŋa lɛ́ca anyía ya mɛ́ŋa ɔɔcɔ u ɔháya mɔŋɔlɛ́,
yó mi hiíte háyɛ múáyɛ́ munyiɔnɔ.
Wuúci u ŋeé mi kíndísi tɔ́na ɔ ɔnyiɔ buólí eébú.
13 Buáyá,
ɛ ŋaá mɛ bá yémi wuúci fénékíne,
i tekeseke bááyɛ́ baacɔ,
i wuúci ɔɔ́mbɔ́náka tɔ́na.
Ta híáná,
Yésus ŋaá mɛ bɛ́cáma mahana,
anyía ɛ ŋa mɛ́ bá i ti émi menyi bɔkɔ abɔ́ ɛ ŋaá mɛ bá yámɛ kɛlaka,
ɛ tɛ háya mɔŋɔlɛ́ nááyá.
14 Uusú Otéŋí a Waáŋá ŋaá mɛ sayábákɛ́na buéŋí,
yó mi iínjie makɛ́nda na ma ɔhákɛ́na mɔŋɔlɛ́ nááyá ne me olénéke bɔsɔ́ɔ́kɔ́.
15 Buhúnyi eebu áŋa taaká cí buhúnyi ;
búáŋa bɔmbányɛ anyía baacɔ bekime é buúbu háya ɔ ɔtɛ́má noómi :
Yááŋa anyía Yésus Kilís ŋaá faáya ɔ ɔmɛsɛ́ ooci anyía wó ko nóhíki bakɛla maabɛ́ bekime.
Yaŋɔ́,
ya mɛ́ŋa mɔkɛla maabɛ́ mú buúsebuúse.ª
16 Ta híáná,
Yésus Kilís ŋaá mɛ bɛ́cáma mahana,
yaŋɔ́ mɔkɛla maabɛ́ mú buúsebuúse,
ª anyía wó tóŋínyi baacɔ anyána u ŋeé beébe eéhínyínyi buéŋí.
U ŋo tóŋínyi hibílícínyínyí eéhí o okíndísi baacɔ a bá ká bɔ́ hákɛ́na mɔŋɔlɛ́ nááyá,
bɔ́ bɔ́ŋgɔ́na yɔɔ́sɔɔ́sɔ yí olíhe yí ekúlú ekime.
17 Ne nuúmi ne nyinyemi á bámɔ́kɔ́na né Otéŋí a Waáŋá Bandɔ́mɛsɛ́ anyía u ŋe téŋínyi ekúlú ekime,
wáŋa Indiwé ;
ta ɔɔcɔ tí ŋé wuúci lɛca,
wuúci wáŋa bímuócí Bandɔ́mɛsɛ́.
*Híáná yááŋa.
Bóol ŋeé lébe Timoté
18 Uumi ɔɔ́nɔ́ Timoté,
i ŋe mí o lébe ne mehúnyi emé *behémúnyi bɛsana bá Bandɔ́mɛsɛ́ ŋa bɔ́ kɔ́ɔnaka ɔ yɔ́ɔ́wɔ asana ananyía ɔ́ɔ kɛ́nda ne meéme ɔ ɔnua ambányɛ yí biité.
19 Tétényíki uúwe olumitinine,
mbá a kɛla anyía hííwu hɛcɔɔ́cɔ́ hɛ́ ɔtɛ́má tɛ ɔ kákálɛ́na ;
bɔ́mɔtɛ́ baacɔ ŋe bú kínéke ɔlátɛ́na ambányɛ yí ohónyí eéyé,
bɔ́ nánáka e uúbu olumitinine.
20 Ne Iméné na Alɛkɛsándɛlɛ á bɔ́ŋa ɔ ɔlɔŋɔ ú nyɛnamá nyɛ́ baacɔ eényí ;
i ŋe mí beébe báka mío beébe cumeke ná Sátanª anyía bábɔ́ aákɔ́nákɛ́na omenyi anyía bé ti ŋé féníne Bandɔ́mɛsɛ́.