Nufule enú Bóol ŋɔ yɔɔ́ŋɔ́kɛ́ná belumitinine bé
Filibí
Bitéŋíti
1
1 Yaŋɔ́ Bóol,
ɛ ŋa mɛ́ banɔ́ ɔ́ɔ́ŋɛ́na nufule eenu,
na yaŋɔ́ ne Timotéª ;
tua sɔ́ŋa bɔnyiɔnɔ bé Yésus Kilís.
Tu ŋa sɔ́ banɔ́ ɔ́ɔ́ŋɛ́na nufule eenu,
na banɔ́ belumitinine Yésus Kilís bekime [bé nyimónjóló ne wuúci] ;
na báánɔ́ bekendisi belumitinine na báánɔ́ batiákɛ́lɛ,
banɔ́ bekime ebé nu ŋe nú líhe e Filibí.
2 Na *Bandɔ́mɛsɛ́ ciasɔ́ Síkíne ne Otéŋí a Waáŋá *Yésus *Kilís bá banɔ́ sayábákɛ́na,
mbá bá banɔ́ iínjíékíne mbuumu ɛ ɛtɛ́má.
Bóol ŋe yiínjie Bandɔ́mɛsɛ́ bitéŋíti
3 Ɛ naŋa yemí iínjíékíne ciamɛ Bandɔ́mɛsɛ́ bitéŋíti ekúlú ekime ayɛ́ ɛ ŋa mɛ́ banɔ́ bɛ́táá.
4 Aáná ya mɛ́ŋa ne obíléne ɔ ɔtɛ́má ekúlú ekime ayɛ́ ɛ ŋa mɛ́ banɔ́ bɛ́cɔ́kɔ́lɛ́nɛ́na Bandɔ́mɛsɛ́
5 a nuafa enú nu ŋe nú hiíte o ohulinyi baacɔ Ambányɛ yɛ́ Ɛsɔ́ma,
o otúme buɔ́sɛ́ abɔ́ nu ŋa nɔ́ hákɛ́na mɔŋɔlɛ́ né Yésus ɔ ɔkɔɔ́háma aámbáya.
6 Ya mɛ́ŋa na mɔŋɔlɛ́ anyía Bandɔ́mɛsɛ́ kéé kúényikinyi ɔnyiɔ ambányɛ yí buólí eyí u ŋeé túme aanɔ́ ɛ ɛtɛ́má ɔ ɔkɔɔ́háma buɔ́sɛ́ ebú Yésus *Kilís ká ka hálɔ́mɔ́na ɔ ɔmɛsɛ́.
7 Ɛ ŋá mɛ́ nyɛmána wu ɔbámɔ́kɔ́na na nyɛnamá nyɛ́ ɔbɛ́táá eényí anyía ɛ ŋaá mɛ banɔ́ léne buéŋí.
Yááŋa anyía Bandɔ́mɛsɛ́ ŋaá banɔ́ sayábɛ́na banɔ́ bekime bɔkɔ búmɔtɛ́ háyɛ yaŋɔ́,
te ekúlú ayɛ́ ya mɛ́ŋa eé ciíbe cɛ ɛcaná,
ª te ekúlú ayɛ́ ɛ ŋa mɛ́ kamɛna Ambányɛ yɛ́ Ɛsɔ́ma,
i yiíyi óónyísíkínyi ɛ ɛtɛ́má cɛ́ baacɔ.
8 Bandɔ́mɛsɛ́ áŋa uumi ɔmbasɔ́mbásɔ anyía ɛ ŋa mɛ́ banɔ́ léne,
banɔ́ bekime,
buéŋí ne nulénéne e nú ŋeé húle ɔ ɔtɛ́má ú Yésus Kilís.
9 Aáná ɛ ŋa mɛ́ banɔ́ bɛ́cɔ́kɔ́lɛ́nɛ́na Bandɔ́mɛsɛ́ anyía núánɔ́ nulénéne á ááŋánáka bɔmbányɛ bɔmbányɛ a nyɛnamá anyɛ́ nua nɔ́ŋa nú omenyi taaká cɛ́ bɛsana cɛ́ Bandɔ́mɛsɛ́,
nuó ményi obúlúne bɛtálɛ́mánánɔ́ bɛ́ bɛsana,
10 ananyía nyíánɔ́ nyɛbɛ́kɛ́lɛ́na á bámɔ́kɔ́na nyɛmbányɛ ɔ ɔhɔla.
Aáná nu ká nɔ́ bámɔ́kɔ́nɛ́na bɛtálɛ́mánánɔ́ bɛ́ baacɔ,
tɛ́ka na hɛkɔma buɔ́sɛ́ ebú Kilís ká ka hálɔ́mɔ́na ɔ ɔmɛsɛ́.
11 Yésus Kilís káá banɔ́ íínjie makɛ́nda ma ɔkɛlaka bɛmbányɛ bɛ́ bɛsana ;
aáná baacɔ ké bú iínjíékíne Bandɔ́mɛsɛ́ ne nuúmi ne nyinyemi a nyíánɔ́ nyɛbɛ́kɛ́lɛ́na eényí.
Bóol ŋa bɛ́nyíá mɔɔhɔ a asana na Ambányɛ yɛ́ Ɛsɔ́ma
12 Banɔ́ báámɛ benyíinyí,
ɛ ŋa mɛ́ aamba anyía nuénú menyi anyía mɔɔhɔ amá ɛ ŋa mɛ́ bɛ́nyíá aaha ŋaá kɛ́la bɔ kɛla anyía Ambányɛ yɛ́ Ɛsɔ́ma á cɔcɔ́báka bu cɔcɔbaka ne buúse.
13 Yááŋa anyía ne bicénji bikime bí ciíbe cɛ kɔ́mɛ́na na bɔsɔ́ɔ́kɔ́ bé etémbí bekime áyá ŋe bú ményi anyía ya mɛ́ŋa eé ciíbe cɛ ɛcaná ananyía ɛ ŋa mɛ́ nyiɔnɔ *Kilís.
14 Yááŋa tɔ́na anyía mɔɔhɔ amá ɛ ŋa mɛ́ bɛ́nyíá aáná ŋe kíndísi buéŋí ɔmbana ú baacɔ weéŋí ú benyíinyí bé olumitinine,
anyía bábɔ́ háya mɔŋɔlɛ́ né Otéŋí a Waáŋá aámbáya ɔ ɔhɔla,
mbá bé húlikinyi baacɔ Bɛsana bɛ́ Bandɔ́mɛsɛ́,
bé ti líkíme.
15 Aá taaká baacɔ a bɔ́mɔtɛ́ ŋe bú húlinyi baacɔ Ambányɛ yɛ́ Ɛsɔ́ma yí Kilís,
bé mí liŋekine háyɛ anyía tua sɔ́ŋa e biseŋinyinyi ne beébe ;
mbá a bɔ́mɔtɛ́ tɔ́na ŋe bú húlinyi baacɔ Ambányɛ yɛ́ Ɛsɔ́ma eéyé na ambányɛ yɛ́ ɔtɛ́má ekime.
16 Bá ŋa bɔ́ kɛla aáná anyía bé ŋe bú mi léne,
bé ményukune anyía Bandɔ́mɛsɛ́ ŋeé mi télímínyi ɔ ɔkamɛna Ambányɛ yɛ́ Ɛsɔ́ma yí Kilís.
17 Mbá eebe e bé ŋé bú húlinyi baacɔ Ambányɛ yɛ́ Ɛsɔ́ma yí Kilís háyɛ anyía biseŋinyinyiª bɛ́áŋa,
bá bɔ́ŋa na aabɛ́ yɛ́ ɔtɛ́má ;
bé ŋe bú bíkéti anyía bá bɔ́ŋa bé o mi solikinyinyi muuyé aaha e ciíbe cɛ ɛcaná.
18 Ɛ́cɛ anyía,
ta yɛ́ cáŋa á bá na aabɛ́ yɛ́ ɔtɛ́má,
ta anyía na ambányɛ yɛ́ ɔtɛ́má,
bú tɛ ŋá mɛ ɔɔmbɔ ta ɔbaca.
Bekime eébé ŋe bú húlinyi baacɔ Kilís ;
yaátɛ́ asana i ŋeé mi bíléne buéŋí.
I ké túné émi bílénéke buéŋí ɔ ɔhɔla ;
19 ɛ́cɛ anyía i ŋe mí menyi nyɛkɛla eényí káá kɛ́la anyía yamɛ́ nɔhɔ́ na a asana ne úúnú ɔbɛ́cɔ́kɔ́lɛ́na na a asana na nyiɔ́lɔ nyí Elilé eyí Yésus Kilís ŋé yííŋjíéne.
20 Nyɛnamá enyí i ŋeé mi léne anyía asana eéyé á bɛ́kɛ́láka aáná,
yaŋɔ́ tɔ́na na ɛcaná ɔ ɔtɛ́má,
ŋa kɛ́la anyía ɛ tɛ lɔ́kɔ́ma aatɔ́ ɔlama a bɔkɔ a búmɔtɛ́.
Mbá,
i ŋeé mi menyi bɔmbányɛ anyía ta aámbáya te e bikúlú bikime ya mɛ́ŋa na mɔŋɔlɛ́ anyía nyiámɛ nyɛbɛ́kɛ́lɛ́na nyikimekime káá kɛla anyía baacɔ ébú nyemiki Kilís,
ta yaŋɔ́ wɔɔ́sɔ ta yaŋɔ́ owéénú.
21 Aá yaŋɔ́,
i ŋeé mi líhe anyía yémi nyemíki hú Kilís ;
owé áŋa bíámɛ bɛnamá.
22 Mbá,
mbɔ́kɔ a asana eyí i ŋeé mi líhe ya mɛ́ŋa wu ɔwɔɔ́lɔ́kɔ baacɔ aáná,
i ti ŋé mí menyi aátɛ́ yámɛ́ nyɛmána wu ɔtáfa.
23 I me mí eéké ɛ ɛkatɛ́katɛ́ cɛ bɛháŋá bífendí :
I ŋeé mi léne owé anyía yamɛ́ bá ɔlɔŋɔ ne Kilís,
buúbu búáŋa bɔmbányɛ ɔ ɔhɔla ;
24 mbá,
ɔlɔbɔ wɔɔ́sɔ áŋa ɔmbányɛ ɔ ɔhɔla a yáánɔ́ asana.
25 I ŋe mí menyi bɔmbányɛ bɔmbányɛ aáná ;
buátɛ́ bɔkɔ yamɛ́ nyɛmana wu ɔlɔbɔ o olíhe ɔlɔŋɔ na banɔ́ bekime anyía nuánɔ́ kɔ́máka,
nu bílénéke o olumitinine noómi.
26 Aáná,
ekúlú ayɛ́ ɛ ká mɛ háma eé ciíbe cɛ ɛcaná,
míɔ háná ɔbá aanɔ́ a maabána,
nu ká nɔ́ bá na bɔɔcɔ buéŋí o onyemiki Yésus Kilís aámɛ a asana.
Túé líhéke háyɛ Ambányɛ yɛ́ Ɛsɔ́ma ŋo tóŋínyi
27 Bɔkɔ abɔ́ ɛ ŋa mɛ́ hɔla ɔwaamba áŋa anyía nuénú líhéke háyɛ Ambányɛ yɛ́ Ɛsɔ́ma yí *Kilís ŋo tóŋínyi,
ananyía bú káá kɛ́la anyía,
ta ɛ ŋa mɛ́ faáya náánɔ́ ta ɛ tɛ ŋá mɛ faáya,
yamɛ́ lɔ́kɔ́máka bé bíkétíki anyía nua nɔ́ŋa bɔɔ́nɛ́nánɔ́ o olumitinine,
banɔ́ okelú ɔ́mɔtɛ́,
nu nuaka tɔ́na ɛcálɛ ɔtɛ́má ɔ́mɔtɛ́ o ocubisiki Ambányɛ yɛ́ Ɛsɔ́ma ne buúse.
28 Nɔtɛ bɛ́nyíánáka anyía báánɔ́ beliŋine á banɔ́ bémbíki.
Aáná bé ké bú ményi anyía bá bɔ́áŋa benyíménú ;
mbá banɔ́ bɔnɔhɔ́kɔ́nɔ́.
Nyɛkɛla eényí ŋeé húle ná Bandɔ́mɛsɛ́,
29 anyía nua nɔ́ŋa na ɛbɔla ɔ ɔnyiɔkɛna Kilís buólí,
tɛ́ cáŋa hú ɔ ɔháya mɔŋɔlɛ́ nááyá,
mbá na ɔ ɔlɔ́kɔ́máka tɔ́na muuyé a yááyɛ́ asana.
30 Nu naŋa nuanɔ́ lɛ́caka ɛcálɛ acɛ́ ɛ na maá mɛ támba.
ª Aámbáya nu ŋa nɔ́ lɔ́kɔ́ma anyía ya mɛ́ánaŋa o o ciíci nua,
i ciíci cɔbakana ne buúse.
Nua nuáŋa tɔ́na o o ciíci nua ɔlɔŋɔ na yaŋɔ́.