Nufule enú Bóol ŋɔ yɔɔ́ŋɔ́kɛ́ná belumitinine bá
Kalasi
1
1 Yaŋɔ́ Bóol ɛ́ ŋa mɛ́ banɔ́ ɔɔ́ŋɛ́na nufule eenu.
Ya mɛ́ŋa *ɔɔcɔ u ɛndɔ́ma u *Yésus *Kilís,
tɛ́ cáŋa a makɛ́nda ma baacɔ,
ta anyía a nyɛkɛla nyɛ́ ɔɔcɔ a wɔmɔtɛ́.
Mbá ya mɛ́ŋa ɔɔcɔ u ɛndɔ́ma a makɛ́nda ne me Yésus Kilís na ma ciasɔ́ Síkíne *Bandɔ́mɛsɛ́.
Wuúci u ŋeé héenyi Yésus e biwéewé.
2 Na yaŋɔ́ ne benyíinyí bé olumitinine bekime a bá bɔ́ŋa aaha tu ŋa sɔ́ banɔ́ téŋi,
banɔ́ tuɔ́bɔ tú belumitinine tú iisí ci Kalasi.
3 Na ciasɔ́ Síkíne Bandɔ́mɛsɛ́ ne uusú Otéŋí a Waáŋá Yésus Kilís bá banɔ́ sayábákɛ́na,
bá banɔ́ iínjíékíne mbuumu ɛ ɛtɛ́má noómi.
4 Énu menyí anyía Kilís ŋeé bílénékíné okoówé a yáásɔ́ asana anyía mbá Bandɔ́mɛsɛ́ á basɔ́ nyɛ́ánákɛ́nɛ́na maasɔ́ maabɛ́,
mbá u basɔ́ kétúnyíki a bɛɛbɛ́ bɛ́ bɛsana bɛ́ ɔmɛsɛ́ ooci.
U ŋaá kɛ́láka aáná a nyɛháŋa nyɛ́ cíásɔ́ Síkíne Bandɔ́mɛsɛ́.
5 Nuúmi á bámɔ́kɔ́na ná Bandɔ́mɛsɛ́ bikúlú bikime,
híáná yááŋa.
6 Báámɛ benyíinyí,
Bandɔ́mɛsɛ́ ŋaá banɔ́ lɔ́ŋɔ́kɔ a asana na yaála yí nuubo yí Yésus Kilís.
I ŋeé mi kéké buéŋí ɔ ɔhɔla anyía nú me tényí enú wuúci bɛ́yúataka,
nuó túme ɔlátɛ́na nyɛnamá nyɛ́ ambányɛ yɛ́ ɛsɔ́ma yí etémbí a yɛ́ tɛ á bá ambányɛ.ª
7 Aá taaká nyɛnamá nyɛ́ ambányɛ yɛ́ ɛsɔ́ma yí etémbí tɛ á bá.
Asana ɔ́mɔtɛ́,
baacɔ a bɔ́mɔtɛ́ á bɔ́ŋa hɔ́á e bé ŋe bú túŋúlinyi cíínú ɛtɛ́má ;
bá ŋa bɔ́ áamba otúmúlíene Ambányɛ yɛ́ Ɛsɔ́ma a yɛ́ ŋa lɛca Kilís.
8 Ɛ ŋa mɛ́ banɔ́ láana anyía mbɔ́kɔ ɔɔcɔ a wɔmɔtɛ́ ŋáá banɔ́ húlíkínyi ambányɛ yɛ́ ɛsɔ́ma yí etémbí a yɛ́ tɛ á bá eeye ayɛ́ tu ŋa sɔ́ banɔ́ húlíkínyi,
Bandɔ́mɛsɛ́ é wuúci lɔmɔ́kɔ,
ª ta yɛ́ caŋa á bá basɔ́,
te elilé yɛ́ bɔsɔ́ma yɛ́ Bandɔ́mɛsɛ́ a yɛ́mɔtɛ́.
9 Tu na maá sɔ́ banɔ́ láakɛna,
tu ŋa sɔ́ hálɔ́mɔ́nɛ́na ɔ banɔ́ láana aámbáya anyía,
mbɔ́kɔ ɔɔcɔ a wɔmɔtɛ́ ŋaá banɔ́ húlínyi ambányɛ yɛ́ ɛsɔ́ma yí etémbí a yɛ́ tɛ á bá eeye ayɛ́ nu ŋa nɔ́ lɔ́kɔ́máká,
núó lumitinine,
Bandɔ́mɛsɛ́ é wuúci lɔmɔ́kɔ.
10 Ɔ́kɔ,
aámbáya,
ɛ ŋa mɛ́ aamba anyía baacɔ é mi lémbíki ayɛ́ʼ Bandɔ́mɛsɛ́ e ?
Aá yaŋɔ́,
i ŋeé mi léne anyía Bandɔ́mɛsɛ́ á nyɛmána wu o mi lémbíki.
Mbɔ́kɔ ɛ ŋa mɛ́ aamba taaká anyía yémi bílénékíne baacɔ,
ɛ tɛ ámɛ bá munyiɔnɔ mu Kilís.
11 Baláamɛ,
énu menyí anyíaʼo :
Ambányɛ yɛ́ Ɛsɔ́ma ayɛ́ ɛ ŋa mɛ́ banɔ́ húlíkínyi ti ómo húle ná ɔɔcɔ a wɔmɔtɛ́.
12 Ta ɔɔcɔ a wɔmɔtɛ́ ti ómo mi yiíyi laana,
te o mi yiíyi eékúnyi ;
mbá Yésus Kilís ú ŋe mi yiíyi nambɔ́nɛ́na.
13 Nu tɛ ŋá nɔ́ nána uúmi olíhe ú buáyá,
ekúlú ayɛ́ ɛ ŋaá mɛ bá yamɛ́ látákɛ́na abɛ́kɛ́lɛ́na cé olumitinine ú *Besuif ;
ɛ ŋa mɛ́ bá yémi tékeseke buéŋí tuɔ́bɔ tú belumitinine Kilís,
ɛ aámbáka ohónyí okime wú o tuútu menyisiki.
14 Baacɔ bé híími hɛɛya ŋa bɔ́ bá bábɔ́ látákɛ́na abɛ́kɛ́lɛ́na cé olumitinine ú Besuif eécé,
mbá yaŋɔ́ ɛ ŋaá mɛ bá yémi beébe hɔlaka o o biíbi látɛ́na ;
i ŋeé mi bíínjíé e nyiwééné a nyɛlátɛ́na nyɛ́ abɛ́kɛ́lɛ́na cá babaabá,
mío beébe hɔlaka.
15 Mbá,
Bandɔ́mɛsɛ́ ŋaá mɛ́ lɔ́tɔ́,
yaŋɔ́ tɛ́ka ne obíbíéne.
U ŋeé mi boosíki ekúlú e yí ŋeé wuúci bílénékíné,
yɔ́ mɛ lɔ́ŋɔ́kɔ anyía yémi wuúci nyiɔkɛna buólí.
16 U ŋa mɛ́ nambɔ́nɛ́na uúyé Ɔɔ́nɔ́ anyía yémi wuúci menyi,
mbá i hulíkínyi baacɔ a bá tɛ ábɔ́ bá Besuif Ambányɛ yɛ́ Ɛsɔ́ma ;
ɛ tɛ ɔ́mɔ kɔ báta ɔɔcɔ ta bɔkɔ.
17 Yaŋɔ́ ta ɔcɔba eé *Yelúsalɛm né eebe a bá ŋa bɔ́ cáŋa ɔbámɔ́kɔ́na *baacɔ bá ɛndɔ́ma na yaŋɔ́.
Mbá i ŋe tényí ámɛ cɔba fiaŋɔ a Alabi;
ª e elime eécí,
ɛ ŋa kaá mɛ halɔ́mɔ́na aá Tamás.
18 E elime cɛ tuɔŋɔ tɔ́tátɔ́,
nyiámɛ nyɛcɔba eényí eé Yelúsalɛm anyía tuésú ményínyi ne Bíel.
I ŋe mí limékíne ne wuúci hú mɔɔ́sɛ́ buunyi.
19 Yaŋɔ́ ta ɔlɛca ɔɔcɔ u ɛndɔ́ma u Yésus u etémbí ;
mbá ɛ ŋa mɛ́ lɛcá Sáak,
onyíinyíª u Otéŋí a Waáŋá.
20 Aá taaká,
eé nyiínyi nyɛ́ Bandɔ́mɛsɛ́,
bɛsana eebi abɛ́ ɛ ŋa mɛ́ kɔɔna áŋa taaká,
i ti ŋé mi néŋe.
21 E elime eécí,
ɛ ŋa mɛ́ cɔbá i iisí ne ci Silíi ne ci Silisí.
22 Mbá a aháŋá na tuɔ́bɔ tú belumitinine Kilís tú iisí ci *Yuté,
bá ŋa bɔ́ bá ɛ́cɛ bá tɛ ŋa bɔ́ mɛ lɛcá ta buɔ́sɛ́ ;
23 bá ŋa bɔ́ bá bábɔ́ lɔ́kɔ́máka bɔ́ lɔ́kɔ́máka bɔsɔ́ɔ́kɔ́ ábɔ́ táŋáka,
bá kɔ́ɔnaka báyɛ :
« Ɔɔcɔ awɔ́ u ŋaá bá waá basɔ́ tékeseke buáyá a yáaŋa o ohulinyi baacɔ aámbáya anyía bá hákɛ́na mɔŋɔlɛ́ né Kilís,
asana ayɛ́ u ŋaá bá wa yáambaka omenyisi buáyá ! »
24 Aáná bá ŋa bɔ́ bá bébú iínjíékíne Bandɔ́mɛsɛ́ nuúmi aámɛ a asana.