Nufule nɔ́ ɔláta enú Bóol ŋɔ yɔɔ́ŋɔ́kɛ́ná belumitinine bá
Kɔlɛ́ɛntɛ
Bóol ŋeé téŋi belumitinine bá Kɔlɛ́ɛntɛ
1
1 Yaŋɔ́ Bóol,
*Bandɔ́mɛsɛ́ ŋaá mɛ táfá anyía yámɛ bámɔ́kɔ́na *ɔɔcɔ u ɛndɔ́ma u *Yésus *Kilís.
Yaŋɔ́,
ɛ ŋa mɛ́ banɔ́ ɔ́ɔ́ŋɛ́na nufule eenu,
na yaŋɔ́ ne Timoté,
uusú onyíinyí u olumitinine.
Tu ŋa sɔ́ banɔ́ ɔ́ɔ́ŋɛ́na nufule eenu,
na banɔ́ hiɔ́bɔ hí belumitinine hɛ́ Kɔlɛ́ɛntɛª ne eebe bekime a bá bɔ́ŋa e ekéti yí iisí yɛ́ Akayíª ekime.
2 Na ciasɔ́ Síkíne Bandɔ́mɛsɛ́ ne Otéŋí a Waáŋá Yésus Kilís bá banɔ́ sáyábákɛ́na,
bá banɔ́ iínjíékíne mbuumu ɛ ɛtɛ́má noómi.
3 Nuúmi á bá na Bandɔ́mɛsɛ́,
Síkíne ci uusú Otéŋí a Waáŋá Yésus Kilís,
Síkíne a cɛ́ ŋa bɛ́cáma baacɔ mahana buéŋí,
cɛ basɔ́ kíndísíki ɛtɛ́má bikúlú bikime.
4 Wuúci u ŋaá basɔ́ kíndísi ɛtɛ́má a anamá cá muasɔ́ muuyé ekime.
Ekúlú ayɛ́ ú maá basɔ́ kíndísíki ɛtɛ́má aáná,
basɔ́ tɔ́na tua sɔ́ŋa tu okíndísíki bɔsɔ́ɔ́kɔ́ a bá ŋa bɔ́ lɛ́ca anamá cé muuyé ekime.
Tu ŋe sú beébe hélúmúnyi ɛtɛ́má a tɔɔna háyɛ basɔ́ bɛ́muátá Bandɔ́mɛsɛ́ ŋaá basɔ́ hélúmúkúnyínyi ɛtɛ́má.
5 Asana ayɛ́ tu ŋa sɔ́ kɔ́ɔna áŋa anyía Kilís ŋaá lɔ́kɔ́máká muuyé muéŋí ;
basɔ́ tɔ́na tu ŋa sɔ́ lɔ́kɔ́ma muuyé muéŋí o o wuúci látɛ́na.
Aáná Bandɔ́mɛsɛ́ ŋaá basɔ́ kíndísi buéŋí anyía tua sɔ́ŋa balatánɔ́ e nyimónjóló ne Kilís.
6 Mbɔ́kɔ tu ŋa sɔ́ lɔ́kɔ́ma muuyé,
yááŋa a asana na búánɔ́ bɔmbányɛ anyía núánɔ́ kɛ́ndáka,
mbá Bandɔ́mɛsɛ́ á banɔ́ nóhíki ;
mbɔ́kɔ Bandɔ́mɛsɛ́ ŋaá basɔ́ kíndísíki ɛtɛ́má,
bɛsana eébí tɔ́na áŋa a asana na búánɔ́ bɔmbányɛ ;
aáná nua nɔ́ŋa nú oweéhíkínyínyi muuyé amɔ́ basɔ́ tɔ́na tu ŋe sú eéhínyínyi.
7 Tu ŋe sú ményi bɔmbányɛ bɔmbányɛ anyía nua nɔ́ŋa bɔɔ́nɛ́nánɔ́ o olumitinine noómi ;
tu menyukune tɔ́na anyía Bandɔ́mɛsɛ́ ŋaá banɔ́ kíndísi ɛtɛ́má a nyɛnamá anyɛ́ u ŋaá basɔ́ kíndísi,
ananyía nu ŋa nɔ́ lɔ́kɔ́ma muuyé háyɛ basɔ́ tɔ́na tu ŋe sú muúmu lɔ́kɔ́ma.
8 Baláamɛ,
tu ŋa sɔ́ áamba ɔ banɔ́ óókísi yáaŋa asana eeye,
anyía núénú ményi asana yí muuyé amɔ́ tua sɔ́ŋa balɔ́kɔ́mákánɔ́ i iisí cɛ Asi.
ª Tua sɔ́ŋa balɔ́kɔ́mákánɔ́ muuyé muéŋí mɔ basɔ́ lámakɛna buéŋí ɔ ɔhɔla maasɔ makɛ́nda,
tu bɛ́tááka hú owé.
9 Ɛ́ɛ,
aá taaká,
tu ŋa sɔ́ bá tuásɔ́ bɛ́tááka,
basɔ́ bɛ́muátá,
anyía máásɔ́ mɔɔ́sɛ́ me olíhéke ma mána.
Yááŋa anyía bú ŋaá bɛ́kɛ́láka aáná anyía tu tɛ bámɔ́kɔ́na na mɔŋɔlɛ́ me olíhéke aá basɔ́ bɛ́muátá,
mbá túésú meéme hákɛ́na ná Bandɔ́mɛsɛ́ bímuócí ;
wuúci wáŋa Muhéényi biwéewé.
10 Bandɔ́mɛsɛ́ oócí u ŋaá basɔ́ líhísíkí e muuyé mɔ nyɛnamá nyí owé eényí ;
u káá basɔ́ líhísíki e muuyé mu etémbí.
Ɛ́ɛ,
tua sɔ́ŋa na mɔŋɔlɛ́ anyía u káá basɔ́ líhísíki tɔ́na,
11 mbɔ́kɔ nu ŋá nɔ́ basɔ́ tímbe ne úúnú ɔbɛ́cɔ́kɔ́lɛ́na.
Ekúlú ayɛ́ u káá basɔ́ líhísíki e elime ci úúnú ɔbɛ́cɔ́kɔ́lɛ́na,
baacɔ beéŋí ké bú wuúci bɛ́cɔ́kɔ́lɔ́kɛ́na,
bé wuúci iínjíékíne bitéŋíti a yáásɔ́ asana.
Bóol ŋeé hémbuline baacɔ o-ti-nyíóyísínyi ú úúyé ɔtáŋa
12 Asana a yɛ́ ŋaá basɔ́ iínjie bɔɔcɔ e túásɔ́ tɔcɔɔ́cɔ́ tɔ́ ɛtɛ́má noómi áŋa anyía nyíásɔ́ nyɛbɛ́kɛ́lɛ́na tɛ á bá ne bicocí,
nyɛ́áŋa taaká.
ª Tu ŋe sú nyíóyísíkínyi bɛsana abɛ́ tu ŋa sɔ́ táŋa háyɛ Bandɔ́mɛsɛ́ ŋeé léne,
te eenú eé buúse tu ŋa sɔ́ bɛ́kɛ́lɛ́na aáná.
Tu tɛ ɔ́mɔ́ sɔ́ bɛ́kɛ́lɛ́na ne injiŋé cɛ baacɔ,
mbá yaála yí nuubo yɛ́ Bandɔ́mɛsɛ́ ŋaá basɔ́ kíndísíkí ɔ ɔkɛla aáná.
13-14 Aáná bɛsana bikime abɛ́ tu ŋa sɔ́ banɔ́ ɔ́ɔ́ŋɛ́na ŋa lɔ́kɔ́mána háyɛ bɛ́áŋa bɛɔ́ŋɔ́kɔ́nɔ́,
bɔkɔ a bɔnambánɔ́ tɛ á bá hɔ́á.
Nua nuáŋa ɔ ɔlɔ́kɔ́ma bɛsana bɔmbányɛ nyɛnamá,
mbá ya mɛ́ŋa na mɔŋɔlɛ́ anyía nu ká nɔ́ lɔ́kɔ́máka bɔmbányɛ bɔmbányɛ asana eeye :
Tu ká sɔ́ bá núánɔ́ nuúmi,
banɔ́ tɔ́na nuɔ́ bámɔ́kɔ́na núásɔ́ nuúmi a buɔ́sɛ́ ebú uusú Otéŋí a Waáŋá ká ka hálɔ́mɔ́na.
15 Ɔ mɔŋɔlɛ́ eémé mekime ɛ ŋaá mɛ bá yémi bíkétíki efule tɛ́ka anyía ɛ ká cáŋa ka mɛ́ faaya náánɔ́,
mbá nú bílénéke bikúlú bífendí.ª
16 Aáná yámɛ hatɔ́na náánɔ́,
míɔ cɔba a Masɛtuán;
ª yá ka mɛ́ halɔ́mɔ́na a Masɛtuán,
mío fule tálɛ́mɛ́na náánɔ́ anyía nuánɔ́ mɛ aambákɛ́na ohónyí wú ɔcɔbana úúmi ɔkanda ne buúse eé Yuté.ª
17 Ekúlú ayɛ́ ɛ ŋa mɛ́ sɔ́mbɔ́tɔ́na ɔkɛla aáná,
yaŋɔ́ te onyíóyísínyi úúmi ɔtáŋa,
bú ti ŋó tóŋínyi anyía ɛ tɛ ámɛ bá na taaká ci indélímínyínyi.
Eéʼeé,
ekúlú ayɛ́ ɛ ŋa mɛ́ sɔ́mbɔ́tɔ́na ɔkɛla aáná,
ɛ tɛ ɔ́mɔ kɛ́la a nyiámɛ nyɛháŋa nyɛ́ bɛ́muátá anyía búa bá ekúlú ɔ́mɔtɛ́ na « Ɛ́ɛ » ne « Eéʼeé ».ª
18 Aá taaká,
Bandɔ́mɛsɛ́ bɛ́muátá ŋeé menyi anyía bɛsana bikime abɛ́ tu naŋa tuásɔ́ banɔ́ laákɛ́na tɛ a bá ekúlú ɔ́mɔtɛ́ na « Ɛ́ɛ » ne « Eéʼeé ».
19 Yááŋa anyía Yésus *Kilís bɛ́muátá,
Ɔɔ́nɔ́ u Bandɔ́mɛsɛ́,
wuúci tu ŋa sɔ́ banɔ́ hulíkínyi bíáyɛ́ bɛsana,
na yaŋɔ́ ne Sílas ª ne Timoté,
u tɛ ŋáa bá ekúlú ɔ́mɔtɛ́ na « Ɛ́ɛ » ne « Eéʼeé » ;
mbá « Ɛ́ɛ » ciíci cɛ á báka nááyá.
20 Yááŋa anyía Yésus áŋa « Ɛ́ɛ » a ciáŋa inyíóyísíkínyinyi ɛndána ikime cɛ́ Bandɔ́mɛsɛ́.
Né Yésus tɔ́na tu ŋa sɔ́ kɔɔna ciasɔ́ « *Híáná yááŋa » o owiínjie Bandɔ́mɛsɛ́ nuúmi.
21 Bandɔ́mɛsɛ́ bɛ́muátá u ŋaá basɔ́ lɔ́tɔ́kɔ,
wuúci u naŋa waá kɛ́laka tɔ́na anyía na basɔ́ na banɔ́ túásɔ bá e nyimónjóló ne Kilís.
22 U ŋa háná a basɔ́ bílícíkínyínyi na búáyɛ́ bubílícínyínyí,
yɔ́ basɔ́ iínjie yááyɛ́ Elilé e cíísú ɛtɛ́má noómi o otóŋínyi anyía tua sɔ́ŋa bááyɛ́ baacɔ ;
yiíyi yí ŋo tóŋínyi anyía u káá basɔ́ iínjíékíne tɔ́na bɛnyɛ́ma bí etémbí abɛ́ u ŋa basɔ́ batɛ́ákɛ́nɛ́na.
23 Bandɔ́mɛsɛ́ áŋa uumi ɔmbasɔ́mbásɔ ;
mbɔ́kɔ i ŋeé mi néne,
ɛ ŋa mɛ́ nyɛmána wu owé.
Yááŋa anyía ɛ tɛ ɔ́mɔɔ́ háná faaya náánɔ́ ɔɔ́ Kɔlɛ́ɛntɛ anyía i ti ómo léne ɔ banɔ́ núesiki ɛtɛ́má.
24 Tu tɛ ŋá sɔ́ áamba otéŋínyi uunú olumitinine.
Yááŋa anyía nua nuáŋa bɔɔ́nɛ́nánɔ́ buéŋí o olumitinine,
mbá tu ŋe sú léne ohiite nuafa a asana ne úúnú obíléne.