Nɔtɛ sɔ́mɔ́kɔ́nɔ́nɔ eé buúse bú be-ti-menyí Bandɔ́mɛsɛ́
6
1 Anyíatɛ́ nu ŋa nɔ́ kɛ́la anyía ekúlú ayɛ́ mulumitinine a mumɔtɛ́ áŋa e nyiitíé na sɔ́ɔ́kɔ́,
mu ŋe keé muúmu sɔ́mɛ́na né be-ti-menyí Bandɔ́mɛsɛ́ e ?
Yaŋɔ́ ɛsɛ́ hiɔ́bɔ hí belumitinine hɛ́ a nyɛ́mana hí okélísíki nyiitíé eényí e ?
2 Énu menyí bɔmbányɛ anyía belumitinine *Kilís bé ké bú kélísíki baacɔ bekime bá ɔmɛsɛ́.
Mbɔ́kɔ banɔ́ belumitinine,
núánɔ́ nyɛ́mána nú okélísíki baacɔ bekime bá ɔmɛsɛ́,
mbá anyána aná nu tɛ anɔ́ bá nú okélísíki tɔsanasáná e ?
3 Nu ti ŋé nú ményi anyía basɔ́ tu ké sú kélísíki te bililé bɛ́ masɔ́ma e ?
Mbá anyána aná na tɔsanasáná tú olíhe ú ɔmɛsɛ́ ooci e ?
4 Ɛ́ɛhɛ́ aná,
mbɔ́kɔ nu ŋé nú tíéne na sɔ́ɔ́kɔ́ a bɛsana bí olíhe ú ɔmɛsɛ́,
anyána nua nɔ́ŋa nú ɔcɔbana asana eéyé eé buúse bɔ́ baacɔ abá hiɔ́bɔ hí belumitinine tɛ ŋá fánɛna te butíkítíki e ?
5 Ɛ́cɛ anyía nu tɛ ŋá nɔ́ lɔ́kɔ́ma aatɔ́ ɔlama e ?
Yááŋa anyía ta ɔɔcɔ ɔmɔtɛ́ u injiŋé tɛ á bá aanɔ́ ɛ ɛkatɛ́katɛ́ a wáŋa wu ocikiliekene bɛsana e ?
6 Mbá anyíatɛ́ nu ŋa nɔ́ sɔ́mɔ́nɔ́nɔ eé buúse bú be-ti-menyí Bandɔ́mɛsɛ́ e ?
7 Bú tɛ ŋáá lɔ́kɔ́mána te butíkítíki a yáánɔ́ aháŋá anyía núánɔ́ sɔ́mɔ́kɔ́nɔ́nɔ,
banɔ́ belumitinine.
Ta sɔ́ɔ́kɔ́ ŋá yɔ́ɔ kɛlá aabɛ́ yɛ́ asana ayɛ́ háányɛ́,
ɔ tɛ ɔ́ bá wu oweéhínyínyi e ?
Te u ŋé yóo kutéke aatɔ́,
ɔ tɛ ɔ́ bá wu ɔnyɛana e ?
8 Mbá ɔ́ kɔɔ́ lɛcaka bɔmbányɛ,
banɔ́ bɛ́muátá nu ŋa nɔ́ kɛ́la bɛɛbɛ́ bɛ́ bɛsana a bɛ́ tɛ ŋá nyɛ́mana,
nu kutekene bɛɛtɔ́ banɔ́ abá nua nɔ́ŋa benyíinyí bé olumitinine.
9 Nu ŋe nú ményi bɔmbányɛ bɔmbányɛ anyía bakɛla maabɛ́ tɛ abɔ́ bá ne ehélé buúse bukime e *Butéŋí bɔ́ Bandɔ́mɛsɛ́.
Nuti bínéŋéke ;
énu menyí bɔmbányɛ anyía ta bakɛla ɛnjɔkɔ́nɔ́nɔ,
te benyemi bɛbɔ́kɔ́bɔ́kɔ,
ta bakanda tusɔmɔ,
ta banɔ́mɔcɔ́ a bá ŋa bɔ́ fiánanana beébe ne beébe,
10 te beébi,
te beléne bɔnɔ́mɛ,
te behíólo meluku,
ta bɔɔ́mbɔ́na bɔsɔ́ɔ́kɔ́ mbá te bicónjólóŋó bɛ́ baacɔ tɛ́ ká bɔ́ bɔ́ŋɔ ehélé haála ahá Bandɔ́mɛsɛ́ ŋé téŋínyi.
11 Híáná banɔ́ a bɔ́mɔtɛ́ nu ŋa nɔ́ bámɔ́kɔ́ná buáyá.
Mbá Bandɔ́mɛsɛ́ ŋaá banɔ́ súáka,
yɔ́ banɔ́ fúúmíkínyi,
yɔ́ kɛla anyía núánɔ́ bámɔ́kɔ́na bɛtálɛ́mánánɔ́ bɛ́ baacɔ eeyé eé buúse ne e elime ci Otéŋí a Waáŋá Yésus Kilís na a makɛ́nda me Elilé yɛ́ ciasɔ́ Síkíne Bandɔ́mɛsɛ́.
12 Ya mɛ́ŋa na makɛ́nda ma ɔkɛlaka bɔkɔ bukime,
mbá tɛ́ cáŋa bɔkɔ bukime bú ŋaá mɛ ɔ́ɔ́lɔ́.
Ya mɛ́ŋa na makɛ́nda ma ɔkɛlaka bɔkɔ bukime,
mbá ɛ tɛ ámɛ bá wu ɔbɛ́nyɛ́ana anyía yamɛ́ bɛ́cáŋa yɔɔ́lɛ́ yɛ́ bɔkɔ a búmɔtɛ́.
13 Bɛnyɛ́ma bɛ́ ɔnyíá áŋa a asana na tɔɔna,
tɔɔna a asana na bɛnyɛ́ma bɛ́ ɔnyíá ;
asana ɔ́mɔtɛ́,
Bandɔ́mɛsɛ́ kéé biíbi menyisiki bikime bífendí buɔ́sɛ́.
Aá Bandɔ́mɛsɛ́,
u ti ómo kétiki cɛɛ́tɔ cɛ ɔɔcɔ a asana na ɛnjɔkɔ́nɔ́nɔ,
anyía cɛɛ́tɔ cɛ ɔɔcɔ áŋa a asana na Bandɔ́mɛsɛ́,
Bandɔ́mɛsɛ́ a asana na cɛɛ́tɔ cɛ ɔɔcɔ.
14 Bandɔ́mɛsɛ́ ewú u ŋeé héényi uusú Otéŋí a Waáŋá o owé káá basɔ́ héenyiki tɔ́na a mááyɛ́ makɛ́nda.
15 Nu ti ŋé nú ményi anyía cíínú cɛɛ́tɔ áŋa háyɛ maláŋá ma cɛɛ́tɔ ci Kilís e ?
Mbá ya mɛ́ŋa wu ohiite aná maláŋá ma cɛɛ́tɔ ci Kilís anyía yé ké mi meéme ceŋísi maláŋá me okendí u oónjú e ?
ª Eéʼeé,
ta buɔ́sɛ́.
16 Nu ti ŋé nú menyi tɔ́na anyía ɔɔcɔ okime awɔ́ á látana ne okendí u oónjú á yáaŋa cɛɛ́tɔ ɛmɔtɛ́ ne wuúci e ?
Yááŋa yɔɔ́ŋɔ́kɔ́nɔ́ anyía :
« Bífendí eébí bɛ́ɔ kɔ hálɔ́mɔ́na ɔɔcɔ ɔmɔtɛ́. »*
17 Mbá ɔɔcɔ okime awɔ́ á látana e nyimónjóló ne Otéŋí a Waáŋá ká ka hálɔ́mɔ́na elilé ɔ́mɔtɛ́ ne wuúci.
18 Yaátɛ́ asana,
ánɔ nyɛánáka ɛnjɔkɔ́nɔ́nɔ.
Yááŋa anyíaʼo,
bɛɛbɛ́ bɛ́ bɛsana bí etémbí abɛ́ ɔɔcɔ áŋa wu ɔkɛlaka tɛ a bá bí obítíse ciayɛ́ cɛɛ́tɔ ;
mbá ɔɔcɔ awɔ́ u ŋa kánda tusɔmɔ ŋaá háya ciayɛ́ cɛɛ́tɔ bihíŋe.
19 Nu ti ŋé nú menyi anyía cíínú cɛɛ́tɔ áŋa ciíbe ci *Efúúménénú yí Elilé a yááŋa náánɔ́,
yiíyi Bandɔ́mɛsɛ́ ŋaá banɔ́ íínjie e ?
Tɛ́ cáŋa banɔ́ bɛ́muátá nu ŋa nɔ́ mánɛna aná cíínú cɛɛ́tɔ,
mbá Bandɔ́mɛsɛ́.
20 Bandɔ́mɛsɛ́ ŋaá bɛ́cáŋgɛ́na buéŋí ɔ ɔ banɔ́ háŋɔ́náka,
ɛ́ɛhɛ́ núánɔ́ nyɛ́mana nú o wuúci nyemiki ne cíínú cɛɛ́tɔ[,
na bíánɔ́ bililé áyá anyía nua nɔ́ŋa bíáyɛ́ bɛnyɛ́ma].