Asana yɛ́ nyɛŋána ɔ hiɔ́bɔ hí belumitinine noómi
5
1 Nulumí áŋa haála hekime anyía ɛnjɔkɔ́nɔ́nɔ moó nyíóyo náánɔ́ a nyɛnamá anyɛ́ bá tɛ́ ŋáá lɔ́kɔ́ma ta ɛ ɛkatɛ́katɛ́ ci be-ti-menyí Bandɔ́mɛsɛ́.
Yááŋa háyɛ anyía ɔɔcɔ wɔmɔtɛ́ náánɔ́ ŋa fíánanana oónyí ú cááyɛ́ síkíne.ª
2 Ta híáná,
nu ŋe nú bíléne na bumálá bukime,
yiíyi anyía nu ŋá nɔ́ nyɛ́mana nu ɔlɛlaka mbá núɔ ɔɔ́ŋɔ́kɛ́na aanɔ́ ɛ ɛkatɛ́katɛ́ nyɛnamá nyɛ́ ɔɔcɔ e nyí ŋe líhe aáná.
3 Aá yaŋɔ́,
ta ya mɛ́ŋa haaca,
úúmi ɔtɛ́má áŋa hoóhi na banɔ́ ;
ɛ́ɛhɛ́ ya mɛáŋa ɔkákálákɛ́nánɔ́ mekilíkínyí ma ɔɔcɔ oócí háyɛ anyía ya mɛ́ŋa na banɔ́.
4 Ekúlú ayɛ́ nu ká nɔ́ bɛ́bándána,
úúmi ɔtɛ́má káá bá na banɔ́.
Ánɔ sɔ́mbɔ́tɔ́na asana yɛ́ ɔɔcɔ oócí a makɛ́nda me uusú Otéŋí a Waáŋá Yésus,
5 anyía núénú wuúci báka,
nuó wuúci cumeke ná Sátanª anyía wá caŋgɛ́na ciayɛ́ cɛɛ́tɔ,
ɔ ɔkɛla anyía Bandɔ́mɛsɛ́ é nohí yááyɛ́ elilé buɔ́sɛ́ ebú Otéŋí a Waáŋá ká ka hálɔ́mɔ́na.ª
6 Bú tɛ á bá bɔmbányɛ anyía nuénú bíbéétíki aná.
Tɛ́ka nu ŋe nú ményi ɛnjaba eeci a cɛ ŋaa kɔ́ɔna anyía :
« Maandándá me enutisi ŋé nutisi oŋuŋe a wɔtɔ́bɔ́kɔ́nɔ́ okimekime » e ?
7 Ánɔ aáŋíá enutisi yɛ́ buáyá ekime,
ɔ ɔkɛla anyía núénú fúúméne.
Aá taaká,
ɔfɔnɔ tɛ á bá náánɔ́.
Yááŋa anyía,
*Kilís áŋa ciasɔ́ ɛtɔ́mbá cɛ *Basíka acɛ́ bá ŋá sɔ́mbɛ́na a yáásɔ́ asana.ª
8 Túá nyíáka bɔŋanda aná ;
mbá tɛ́ cáŋa ne enutisi yɛ́ buáyá,
te yí menjiŋé,
ta yɛ́ nyɛŋána ;
mbá túá nyíáka bɔŋanda eébú ne biléti a bɛ́ tɛ á bá ne enutisi na aá taaká noómi ne e bufúúménénú.
9 Ɛ ŋa mɛ́ banɔ́ ɔ́ɔ́ŋɔ́kɛ́ná eémí e nufuleª anyía núénú bíkékényíki anyía nɔtɛ bɛ́látáka a nyɛkɛla nyɛ́ bɛsana na bakanda tusɔmɔ.
10 Tɛ́ cáŋa na baacɔ bá ɛnjɔkɔ́nɔ́nɔ bekime bá ɔmɛsɛ́ ooci,
ne beléne mɔɔnyɛ́,
na bɔhɔɔ bɛnyɛ́ma bɛ́ bɔsɔ́ɔ́kɔ́,
ta anyía benyemi bɛbɔ́kɔ́bɔ́kɔ ;
yamɛ banɔ́ laana aáná,
keyé nu ŋa nɔ́ nyɛmána nu ɔhátɔ́kɔ́na yáaŋa buúse bukime ɔ ɔmɛsɛ́ ooci o okolíhéke haála hé etémbí.
11 Énu menyí aámbáya anyía bɔkɔ abɔ́ ɛ ŋa mɛ́ banɔ́ ɔ́ɔ́ŋɔ́kɛ́ná áŋa anyía nɔtɛ bɛ́látáka ɔ ɔkɛla bɛsana na ɔɔcɔ okime awɔ́ u ŋa bɛ́lɔ́ŋɔ anyía onyíinyí u olumitinine,
mbá wuúci ɔɔcɔ u ɛnjɔkɔ́nɔ́nɔ,
ta anyía muléne mɔɔnyɛ́,
ta anyía munyemi bɛbɔ́kɔ́bɔ́kɔ,
ta anyía mutɔ́kɔ baacɔ,
ta anyía muhíólo meluku,
ta anyía muhɔɔ bɛnyɛ́ma bɛ́ baacɔ ;
ɛ ŋa mɛ́ banɔ́ láana :
Nuti nyíényi te bu nyíényi na nyɛnamá nyɛ́ ɔɔcɔ eényí.
12 Yááŋa anyía ɛ tɛ ámɛ bá na makɛ́nda me okélísíki baacɔ bá nɔháatɛ́ a bá tɛ abɔ́ bá na basɔ́.
Ɔ́kɔ,
tɛ́ka baacɔ bé noómi bé uúnú ɔlɔŋɔ nua nɔ́ŋa na makɛ́nda me okélísíki e ?
13 A baacɔ bá nɔháatɛ́ bekime,
Bandɔ́mɛsɛ́ u ŋeé beébe kélísi.
Ánɔ aáŋíá aná aanɔ́ ɛ ɛkatɛ́katɛ́ ɔŋána.ª