Yésus ma háányua e biwéewé
24
1 A alalɛ yɛ́ ɔyá buɔ́sɛ́ bɔ́ sɔ́ndɛ,
beénjú ŋa bɔ́ hátɔna,
bɔ́ cɔ́bana e eenyie bɛsɔŋɔ bí enumbé abɛ́ bá ŋa bɔ́ tábɔ́náka.
2 Bá ŋgaá kuána anyía bé me fúŋulisi nyɛndányɛ́ a nyɛ́ ŋaá bá e nyiofíníne nyí eenyie.
3 Bé ŋe bú óófíne noómi,
mbá beébe ta ɔlɛca omime ú Otéŋí a Waáŋá Yésus.
4 Ekúlú ayɛ́ asana eéyé ŋaá bá yé beébe yébíki a bíábɔ́ bɛɛtɔ́,
banɔ́mɔcɔ́ béfendí na bɛlaŋa e bifúlúndúndúé ŋé beébe hámɛ́na hú huasɛ.
5 Aáná bulíkílíki ŋeé beébe tímbíé,
bá ŋá cɔ́ŋɛ́máka.
Baacɔ eébé ŋé beébe batá báyɛ :
« Anyíatɛ́ nu ŋa nɔ́ áamba ooci a wáŋa wɔɔ́sɔ aá haála ahá bɛlɔ́ŋɔ́ áŋa e ?
6 U tɛ á kɛla aaha,
mbá ú ma háanyua e biwéewé.
Ánɔ bɛ́tááka háyɛ u ŋaá banɔ́ láakɛna ekúlú ayɛ́ u ŋaá bá wá yánáŋa a *Kalilé,
7 ɔsɛ :
“Yɛ́ ŋá nyɛmána anyía bé fiimbie Ɔɔ́nɔ́ u ɔɔcɔ ná baŋána,
bé wuúci ɔɔ́nɔ́ waátákɛ́nánɔ́ ɔ ɔmbásá,
mbá ɔ mɔɔ́sɛ́ matátɔ́ yɔ́ háányua e biwéewé.” »
8 Aáná bá ŋa bɔ́ bɛ́táá ɔtáŋa ú Yésus.
9 Bá ŋa bɔ́ hátɔ́na hɔ́á,
bá ŋga láákɛ́na na *baákɔ́nɛ́na bɔ́ɔ́hátá na ɔmɔtɛ́ na baákɔ́nɛ́na bé etémbí bekime bɛsana eébí bikime.
10 Beénjú eébé ŋa bɔ́ bá anyía na Malíi,
itónyi cɛ Makatala,
na Sáana,
na Malíi,
iinyí cɛ Sáak ;
bá ŋa bɔ́ bá ɔlɔŋɔ ne beénjú bé etémbí,
beébe bé ŋe bú bíkétíkínyi baacɔ bá ɛndɔ́ma bɛsana eébí.
11 Mbá beébe te olumitinine bɛsana ebí beénjú ŋeé beébe bíkétíkínyi,
anyía bá ŋa bɔ́ bá bábɔ́ bɛ́tááka anyía bɛ́áŋa bɛsana bɛ́ buála.
12 Ta híáná,
Bíel ŋa hátɔ́na,
yɔ́ cɔba e eenyie,
ú ŋga hámá,
u ŋó nyoŋíminyi e eenyie,
u ŋá lɛca hú bɛlahɛlahɛ bɛ́ ɔmbɔ́mɔ́ ɔ ɔmɛsɛ́.
Aáná u ŋá hálɔ́mɔ́na o ooki,
u ŋé kéké asana a yɛ́ ŋaá bɛ́kɛ́láka.
Yésus me bítóŋínyi ná baákɔ́nɛ́na béfendí
13 Hú buátɛ́ buɔ́sɛ́,
*baákɔ́nɛ́na bé Yésus béfendí a bɔ́mɔtɛ́ ŋa bɔ́ bá bábɔ́ cɔ́cɔbaka a bunɔŋɔ bɔ́ Ɛmáyus,
bú ŋaá bá e kilomɛ́ta cíɔ́hátá na ɛ́mɔtɛ́ ne Yelúsalɛm.
14 Bá ŋa bɔ́ bá bábɔ́ táŋátáŋa a bɛsana bikime a bɛ́ ŋaá bɛ́kɛ́láka.
15 Ekúlú ayɛ́ bá ŋa bɔ́ bá bábɔ́ táŋáka,
bé súŋgunyinyi,
Yésus ŋé keé beébe cua ;
bé ŋé túme okendinyi.
16 Bé wuúci lɛcaka,
mbá bé ti wuúci menyútúne,
anyía ibíne ŋaá bá a cáábɔ́ eése.
17 Yésus ŋé beébe batá ɔsɛ :
« Mbá aátɛ́ yááŋa,
nu kandaka,
nu suŋukunyinyi e ?
» Bá ŋa bɔ́ tálɛ́mɛ́na,
bá ŋá lɔ́kɔ́ma ɔtɛ́má ɔnua.
18 Ɔmɔtɛ́ e bífendí eébí ŋaá bá ne nyiínyi anyía Kɛlɛ́ɔ́bas ;
mbá ɔsɛ nááyá :
« Ɛ́cɛ anyía hú kuɔŋɔ́ bímuócí a baacɔ e bé ŋe bú límine e ekéti yí ekúlú aaha eé Yelúsalɛm,
ó ti ŋóo menyi bɛsana a bɛ́ maá bɛ́kɛ́láka ɔ mɔɔ́sɛ́ eeme e ? »
19 U ŋé beébe báta ɔsɛ :
« Bɛsana bɛ́ yaátɛ́ e ?
» Mbá báyɛ :
« Asana a yɛ́ ŋaá hámɛ́na Yésus,
ɔɔcɔ u *Násalɛt ;
wuúci u ŋaá bá *muhémúnyi bɛsana mɔ Bandɔ́mɛsɛ́ a mɔ́ ŋaá bá na makɛ́nda a bɛsana abɛ́ mu ŋaá bá muá táŋáka,
mu kɛ́laka ne eé buúse bɔ́ Bandɔ́mɛsɛ́ ne eé buúse bɔ́ baacɔ bekime bé *Islayɛ́l.
20 Na báásɔ́ betéŋínyi *beluli nyiínjie na báásɔ́ *baáŋá ŋa bɔ́ kɛ́la anyía bá sɔ́mbɔ́tɔ́na o muúmu ɔɔ́nɔ́ muátákɛ́nánɔ́ ɔ ɔmbásá.
21 Tu ŋa sɔ́ bá túésú kétiki anyía muúmu muá nyɛmána mú ɔháŋɔ́náka baacɔ bé Islayɛ́l ;
yɛ́mɔtɛ́ asana áŋa anyía matátɔ́ eeme hɛ́nánɔ amá bɛsana eébí ŋaá bɛ́kɛ́láka.
22 Aáná tɔ́na beénjú a bɔ́mɔtɛ́ bé uúsú ɔlɔŋɔ ŋaá basɔ́ nyímísi injiŋé,
anyía bá ŋa bɔ́ cɔ́bá e eenyie a alalɛ yɛ́ ɔyá,
23 beébe ta ɔlɛca uúyé omime.
Ekúlú ayɛ́ bá ŋga bɔ́ hálɔ́mɔ́na,
bá ŋá bɔ́ basɔ́ bíkétíkínyi anyía bá ŋá bɔ lɛca *bililé bɛ́ masɔ́ma bɛ́ Bandɔ́mɛsɛ́ e bí ŋeé beébe laana anyía Yésus áŋa wɔɔ́sɔ.
24 Baacɔ a bɔ́mɔtɛ́ bé uúsú ɔlɔŋɔ ŋá bɔ cɔ́ba tɔ́na e eenyie,
bɔ́ kúana bɛsana háyɛ beénjú ábɔ́ kɔ́ɔnaka.
Mbá beébe tɔ́na te o wuúci lɛca. »
25 Ɛ́ɛhɛ́ Yésus ŋeé beébe laána ɔsɛ :
« Banɔ́ baacɔ eébé,
nu tɛ anɔ́ bá ne injiŋé,
cíínú ɛtɛ́má ti ŋé tényí e lumitinine bɛsana bikime ebí *behémúnyi bɛsana bá Bandɔ́mɛsɛ́ ŋa bɔ́ kɔ́ɔ́náka.
26 Yɛ́ tɛ ɔ́mɔ nyɛ́mana anyía *Mesíi á lɔ́kɔ́máka ɔkála e,
mbá u limine a núáyɛ́ nuúmi e nú ŋeé húle ná Bandɔ́mɛsɛ́ e ? »
27 U ŋé beébe hembúlékíne bɛsana abɛ́ Ciɔɔ́ŋɛ́ ikime cɛ́ Bandɔ́mɛsɛ́ ŋa kɔ́ɔna a yááyɛ́ asana,
o otúme e tufule tú *bikotí bí *Moyís ɔ ɔkɔɔ́háma e tufule tukime tú behémúnyi bɛsana bá Bandɔ́mɛsɛ́.
28 Ekúlú ayɛ́ bá ŋa bɔ́ bá bá bɔ́áŋa hoóhi na bunɔŋɔ abɔ́ bá ŋa bɔ́ bá bábɔ́ cɔ́cɔbaka,
Yésus ŋa kɛ́la háyɛ anyía u ŋa cɔ́baka ne buúse.
29 Mbá báyɛ nááyá :
« Limíne aaha na basɔ́,
anyía buɔ́sɛ́ meé súéte,
ibíne a yáaŋa hoóhi.
» U ŋó oofíne eé ciíbe anyía wé limíne ne beébe.
30 Ekúlú eyí bé ŋe bú túme onyíényi,
u ŋé hiíte eléti,
yó wíinjie Bandɔ́mɛsɛ́ bitéŋíti,
yó yiíyi bákáka,
u ŋé beébe iínjíékíne anyía bá nyíáka.
31 Aáná ibíne ŋa hátɔna a cáábɔ́ eése,
nyi wuúci menyutune eényí,
mbá u ŋé séŋúlúé eébú eé buúse.
32 Bé ŋe túme ɔlaanana báyɛ :
« Ɔ́kɔ,
tɛ́ka cíísú ɛtɛ́má ŋaá bá inyíóyónó ne obíléne ekúlú ayɛ́ waá bá wá táŋáka na basɔ́ o ohónyí e,
u basɔ́ hémbulekine Ciɔɔ́ŋɛ́ cɛ́ Bandɔ́mɛsɛ́ e ? »
33 Bá ŋa bɔ́ hátɔ́na hí e ekúlú etéeyé,
bá ŋá hálɔ́mɔ́kɔ́na eé Yelúsalɛm.
Bá ŋga bɔ́ kúana na baákɔ́nɛ́na bɔ́ɔ́hátá na ɔmɔtɛ́ na baláayɛ́,
bá bɛ́bándákánɔ́ haála hɔ́mɔtɛ́,
34 bábɔ́ kɔ́ɔnaka báyɛ :
« Otéŋí a Waáŋá áŋa taaká ɔhaanyúánɔ́ o owé,
anyía Símon meé wuúci lɛcaka ! »
35 Beébe tɔ́na bé ŋé bíkétíkínyi baákɔ́nɛ́na eébé na bɛsana a bɛ́ á bɛ́kɛ́láka o ohónyí na anyána bébú wuúci menyutune ekúlú ayɛ́ waá bákáka eléti.
Yésus me bítóŋínyi ná bááyɛ́ baákɔ́nɛ́na eé Yelúsalɛm
36 Ekúlú ayɛ́ *baákɔ́nɛ́na eébé béfendí ŋa bɔ́ bá bá búanaŋa ɔ ɔtáŋa bɛsana eebi,
bé ŋé síke bítéme,
Yésus má tálɛ́mɛ́na aabɔ́ ɛ ɛkatɛ́katɛ́,
mbá ɔsɛ náábɔ́ :
« Mbuumu á bá náánɔ́. »
37 Bá ŋa bɔ́ bálátána,
bé ŋé túme olíkíme buéŋí,
anyía bé ŋe bú kéti anyía ɛnyɔlɛ cíáŋa.
38 Mbá Yésus ɔsɛ náábɔ́ :
« Anyíatɛ́ nu ŋe nú líkíme nyɛnamá eényí e ?
Nyɛnamá nyí isuŋí nyɛ́ aátɛ́ nua nɔ́ŋa ne nyiínyi ɛ ɛtɛ́má e ?
39 Ánɔ lɛcáka na cáámɛ aabá na cáámɛ akɔlɔ́,
mbá núé menyí anyía yaŋɔ́ bɛ́muátá ya mɛ́ŋa ;
ɛnyɔlɛ tɛ á bá ne imehú ne biúhé háyɛ nu ŋa nɔ́ mɛ lɛca ne biíbi. »
40 Ekúlú ayɛ́ u ŋaá bá wá táŋáka aáná,
u ŋé beébe tóŋgínyi na cááyɛ́ aabá na cááyɛ́ akɔlɔ́.
41 Beébe te olumitinine aátɛ́ u ŋaá bá wé beébe laakɛna anyía bá ŋa bɔ́ bá bébú bílénéke buéŋí,
beébe bekékénú tɔ́na.
Aáná Yésus ŋeé beébe báta ɔsɛ :
« Nua nɔ́ŋa nu ɔbá na bɔkɔ bɔ́ ɔnyíá aáhá e ? »
42 Báyɛ :
« Ɛ́ɛ.
» Bé ŋé wuúci iínjíe hiɔfɔ́ a hɛhákákánɔ́.
43 U ŋeé hiíhi hiíte,
u ŋé hiíhi nyíáka,
bé wuúci lɛcaka.
44 Mbá ɔsɛ :
« Ɛ ŋaá mɛ banɔ́ láákɛ́na bɛsana eébí ekúlú ayɛ́ ɛ ŋa mɛ́ bá na banɔ́.
Aáná bɛsana bikime a bɛ́áŋa bɛɔ́ŋɔ́kɔ́nɔ́ a yáámɛ́ asana ne e nufule nú *bikotí nú *Moyís,
ne e tufule tú *behémúnyi bɛsana,
na tɔ́ Maŋana ŋáa nyɛmána bɛ́ ɔbɛ́kɛ́láka. »
45 Ekúlú eéyé u ŋeé beébe iínjíe makɛ́nda ma ɔlɔ́kɔ́máka aátɛ́ Ciɔɔ́ŋɛ́ cɛ́ Bandɔ́mɛsɛ́ ŋá kɔɔna.
46 U ŋé beébe laána ɔsɛ :
« Yááŋa yɔɔ́ŋɔ́kɔ́nɔ́ anyía *Mesíi ŋá nyɛmána we owé,
yɔ́ háanyua e biwéewé ɔ mɔɔ́sɛ́ matátɔ́.
47 Aáná bé kéé húlíkínyi baacɔ bá mɔnɔŋɔ mekime a nyíáyɛ́ nyiínyi anyía bá bɛ́kákálákɛ́na maabɔ́ maabɛ́,
mbá bá sɔ́mba ɔkɔlɔ́ eé meéme ;
aáná Bandɔ́mɛsɛ́ kéé beébe nyɛ́anakɛnɛna maabɔ́ maabɛ́.
Bé kéé húlikinyi baacɔ aáná o otúme eé Yelúsalɛm ɔ ɔcɔba ne buúse.
48 Nu ká nɔ́ hákɛ́na ɛmbasɔ́ a bɛsana eébí.
49 Yááŋa anyíaʼo,
ɛ ká mɛ́ banɔ́ tɔ́mɛ́na *Efúúménénú yí Elilé eyí Síkíne ŋaá bɛ́tána ;
nu ŋa nɔ́ nyɛmána nú olimine aaha a bálɛ́ka eeci ɔ ɔkɔɔ́háma ekúlú eyí nu ké nú híite makɛ́nda e mé ŋeé húle ɔ Ɔmuaná. »
Bandɔ́mɛsɛ́ me béétísi Yésus ɔ Ɔmuaná
50 Yésus ŋé beébe cɔbána hoóhi na Bɛtani,
ª u ŋé hetúnyi aabá ɔ ɔmuaná,
u ŋé beébe sayábɛ́na.
51 Ekúlú ayɛ́ u ŋaá bá weé beébe sayábákɛ́na,
u ŋé beébe bɛ́álɔ́na,
Bandɔ́mɛsɛ́ nyi wuúci béétísi eényí ɔ Ɔmuaná.
52 Mbá beébe bá ŋa bɔ́ hálɔ́mɔ́na eé Yelúsalɛm ne obíléne weéŋí ɛ́cɛ bé me bú wuúci nyemiki.
53 Bá ŋa bɔ́ bá eé *Ciíbe cɛ Bandɔ́mɛsɛ́ mɔɔ́sɛ́ mekime,
bé nyémiki Bandɔ́mɛsɛ́.