Yésus áŋa o ooki ú Sásɛ́
19
1 Yésus ŋa kaáhámá e Yéliko,
waá hɔ́laka bɔ hɔlaka.
2 Ɔŋáŋa u ɔɔcɔ ŋaá bá aáhá,
nyíáyɛ́ nyiínyi ŋaá bá ɛ́cɛ Sásɛ́.
U ŋaá bá mutéŋínyi mu *betúé etéési.
3 U ŋaá bá wa yáambaka ɔlɛca anyána Yésus áŋa.
Mbá u tɛ ɔ́mɔ bá ne ohónyí a asana na etúte yɛ́ baacɔ,
anyía u ŋaá bá okúti.
4 U ŋá cábákɛ́na eé buúse,
u ŋá bááta a bɔɔtɛ́ bú sikɔmɔɔl anyía mbá wá lɛca Yésus awɔ́ ŋa nyɛ́mana wu ɔhɔlɛna o ohónyí oócí.
5 Ɛ́makɛ́la Yésus á kaáhámá a haála eéhé,
u ŋá tálɛ́mɛ́na,
u ŋé bééti eése ɔ ɔmuaná,
mbá ɔsɛ ná Sásɛ́ :
« Tényí sɔ́ɔ́na ɔ ɔmɛsɛ́,
anyía hɛ́nánɔ ɛ ŋá mɛ nyɛmána wu olimekine e uúwu ooki. »
6 Sásɛ́ ŋe tényí sɔ́ɔ́na,
u ŋé wuúci káha ne obíléne e uúyé ooki.
7 Ekúlú ayɛ́ baacɔ ŋa bɔ́ lɛ́cá asana eéyé,
bekime ŋé túme ɔtáŋa ɛmbásɛmbásɛ,
báyɛ :
« Ú maá cɔ́ba ɔ ɔkɔfíanɛna o ooki ú aabɛ́ yɛ́ ɔɔcɔ. »
8 E uúye ooki,
Sásɛ́ ŋeé bíkósíti né Otéŋí a Waáŋá,
mbá ɔsɛ :
« Ɔ́ɔ lɛcá,
Otéŋí,
míɔ cɔba o owiínjíékíne basɔ́kásɔ́ka asaasalɛ yɛ́ búámɛ bɔnɔ́mɛ ;
mbɔ́kɔ ya mɛ́ŋa oweébénú bɔkɔ bɔ́ ɔɔcɔ a bɔ́mɔtɛ́,
míɔ cɔba o o wuúci helúmúnyínyi bɛnyɛ́ma bínyíse. »
9 Yésus ɔsɛ nááyá :
« Hɛ́nánɔ baacɔ bé ciíbe eeci ma bɔ́ nɔ́hɔkɔ,
anyía ɔɔcɔ ooci áŋa tɔ́na ɔ hɛnyɛ́nɔ́ hɛ́ *Abɛ́laham.
10 Yááŋa anyía Ɔɔ́nɔ́ u ɔɔcɔ ŋaá faáya ɔ ɔwaamba baacɔ e benyímékénénú o o beébe nohíki. »
Ɛnjaba cɛ bɔnyiɔnɔ bátátɔ́
11 Ekúlú ayɛ́ baacɔ ŋaá bá bábɔ́ lɔ́kɔ́máka bɛsana eébí,
Yésus ŋa háná é beébe túmíné ɛnjaba,
anyía u ŋaá bá hoóhi ne Yelúsalɛm na anyía baacɔ ŋaá bá bébú kétiki anyía *Butéŋí bɔ́ Bandɔ́mɛsɛ́ búɔ cɔba ɔ ɔlɛcana hí aámbáya.
12 U ŋé beébe laana ɔsɛ :
« Ɔɔcɔ ɔmɔtɛ́ u hɛnyɛ́nɔ́ hí otéŋí ŋeé súété a bunɔŋɔ bɔ́ haaca,
anyía Otéŋí u mɔnɔŋɔ meéŋí é wuúci bééti otéŋí ú búáyɛ́ bunɔŋɔ,
mbá u ka hálɔ́mɔ́na.
13 Wa yánáŋa tɛ́ka ne osúéte,
u ŋɔ́ lɔ́ŋɔ́kɔ bááyɛ́ bɔnyiɔnɔ a bɔ́mɔtɛ́ bɔ́ɔ́hátá,
u ŋé beébe iínjíékíne hú náányɛ́ nyɛnamá nyɛ́ ɔmbana nyɛ́ mɔɔnyɛ́,
ɔsɛ náábɔ́ :
“Ánɔ kɛláka onduné na mɔɔnyɛ́ eémé ɔ ɔkɔɔ́háma ekúlú ayɛ́ ɛ́ ká kaá mɛ hálɔ́mɔ́na.”
14 Mbá buayá ŋaá bá búé wuúci liŋekine,
bá ŋa bɔ́ tɔ́mɛ́na otéŋí u mɔnɔŋɔ meéŋí baacɔ o okoó wuúci laana báyɛ :
“Tu ti ŋé sú léne anyía ɔɔcɔ ooci á bá uusú otéŋí.”
15 Ta híáná,
u ŋá bááta otéŋí u baacɔ eébé,
u ŋá ka hálɔ́mɔ́na a búáyɛ́ bunɔŋɔ.
U ŋá laána baacɔ anyía bé wuúci lɔ́ŋɔ́kɛ́na bɔnyiɔnɔ ebé ú ŋe yiínjíékíne mɔɔnyɛ́,
anyía bé wuúci laákɛ́na anyána bá ŋa bɔ́ kɛlaka onduné.
16 Mu buúse ŋaá faáya,
mu ŋá laána otéŋí mɔsɛ :
“Otéŋí,
mɔɔnyɛ́ emé o ŋoó mi iínjíé ŋeé bíéné mɔɔnyɛ́ mɔɔ́hátá.”
17 Mbá ɔsɛ nááyá :
“Ɛ́hɛ́ɛ,
bɔmbányɛ !
Ɔ ɔ́ŋa ambányɛ yɛ́ munyiɔnɔ,
anyía ó moó tétényíki bɔmbányɛ tɔnyɛ́mányɛ́ma,
í me mí o bééti kɔ́mɛ́na cɛ bálɛ́ka cíɔ́hátá.”
18 Munyiɔnɔ mu béfendí ŋaá faáya,
mɔsɛ :
“Otéŋí,
mɔɔnyɛ́ emé o ŋoó mi iínjíé ŋéé bíéne mɔɔnyɛ́ matáánɔ.”
19 Otéŋí ɔsɛ nááyá :
“Kuɔŋɔ́ tɔ́na,
í me mí o bééti kɔ́mɛ́na cɛ bálɛ́ka ɛ́táánɔ.”
20 Munyiɔnɔ a mumɔtɛ́ ŋaá faáya,
mbá mɔsɛ :
“Otéŋí,
mɔɔwɔ mɔɔnyɛ́ emé o ŋoó mi iínjíé,
ímeémé,
i ŋe mí meéme ɔɔ́tɔ́kɔ́kɔ́ e ekéti yɛ́ bɔlaka,
míɔ bátɛ́na.
21 Ɛ ŋa mɛ́ kɛlá aáná anyía ɛ ŋa mɛ́ bá yémi o líkíméke,
anyía ɔ ɔ́ŋa na nyɛhatɛ́ ;
o ŋoó hiíte bɛnyɛ́ma abɛ́ ɔ́ tɛ ɔ́mɔ bátɛ́na,
a sáŋáka abɛ́ ɔ tɛ ɔ́mɔ wɔɔ́nɔ.”
22 Mbá ɔsɛ :
“Ɔ ɔ́ŋa aabɛ́ yɛ́ munyiɔnɔ,
míɔ cɔba ɔ ɔ kuɔŋɔ́ túméke tɔkɔma ɔ mɔ́ɔ́wɔ mehúnyi ma bɛ́muátá ;
ɔ ŋɔɔ́ bá oó menyukune anyía ya mɛ́ŋa na nyɛhatɛ́,
i ŋe mí hiíte bɛnyɛ́ma abɛ́ ɛ tɛ ɔ́mɔ bátɛ́na,
ɛ sáŋáka abɛ́ ɛ tɛ ɔ́mɔɔ́ wɔɔ́nɔ́.
23 Anyíatɛ́ aná ɔ tɛ ɔ́mɔ háya máámɛ́ mɔɔnyɛ́ haála ahɛ́ baacɔ ŋɔ fɔ́lɔ mɔɔnyɛ́ anyía a nyiámɛ nyɛkahálɔ́mɔ́na mío koó meéme hiíte na bɛtálá e ?”
24 Mbá ɔsɛ ná baacɔ a bá ŋa bɔ́ bá hoóhi ne wuúci :
“Ánɔ mɛ cáhɔ́nɛ́na mɔɔnyɛ́ amá muáŋa ne meéme,
nú iínjíé né ooci a wáŋa na mɔɔnyɛ́ mɔɔ́hátá.”
25 [Bé ŋé wuúci laana anyía :
“Otéŋí,
wa yáaŋa na mɔɔnyɛ́ mɔɔ́hátá !”]
26 Mbá ɔsɛ :
“Ɛ ŋa mɛ́ banɔ́ laana ɛsɛ́ ɔɔcɔ okime a wáŋa na bɛnyɛ́ma,
bá ká háná é wuúci iínjíé ;
mbá asana ɔ́mɔtɛ́,
ɔɔcɔ okime awɔ́ u tɛ á bá na bɔkɔ,
bé kéé wuúci cáhɔ́nɛ́na ta bɔkɔ abɔ́ wáŋa ne buúbu.
27 Mbá a aháŋá na baacɔ e bé ŋe bú mi liŋine,
beébe bé ti ómo bú léne anyía yámɛ bááta uubú otéŋí,
énu beébe héléne aaha,
núé beébe ɔɔ́nɔ́kɔ,
yamɛ́ lɛcaka.” »
Nyiofine nyí Yésus eé Yelúsalɛm
28 Ɛ́makɛ́la wáa mana ɔtáŋa oócí na baacɔ eébé,
Yésus ŋaá bá weé búekeke ɔ ɔcɔba eé Yelúsalɛm.
29 Ekúlú ayɛ́ u ŋaá bá wa yáaŋa hoóhi na Bɛ́tɛ́fasɛ na Bɛtani,
a maabána ma nɔkɔndɔ nú Molifié,
u ŋá tɔ́ma *baákɔ́nɛ́na béfendí,
30 ɔsɛ náábɔ́ :
« Ánɔ cɔbá a bunɔŋɔ eebu eénú eé buúse.
Ahɛ́ nú ŋga nɔ́ háma,
nu ŋa nɔ́ kúana ɔɔ́nɔ́ u abaŋabɛbɛa osúŋénú.
Ta ɔɔcɔ tɛ ŋá cáŋa á bááta.
Énu wuúci súŋúne,
núé héléne.
31 Mbɔ́kɔ ɔɔcɔ ŋá banɔ́ báta ɔsɛ :
“Anyíatɛ́ nu ŋe nú wuúci súŋúne e ?”,
ánɔ bɛ́káma nɔsɛ :
“Otéŋí a Waáŋá ŋeé wuúci yáamba.” »
32 Baákɔ́nɛ́na ebé Yésus ŋaá tɔ́ma ŋa bɔ́ kúána bɛsana háyɛ u ŋeé beébe laákɛ́na.
33 Ekúlú ayɛ́ bá ŋa bɔ́ bá bébú súŋúnéke ɔɔ́nɔ́ u abaŋabɛbɛa,
bemuútí abaŋabɛbɛa ŋe bú beébe báta báyɛ :
« Anyíatɛ́ nu ŋe nú súŋúne ɔɔ́nɔ́ u abaŋabɛbɛa ooci e ? »
34 Mbá báyɛ :
« Otéŋí a Waáŋá ŋeé wuúci yáamba. »
35 Aáná bé ŋge wuúci hálámánána né Yésus ;
bé ŋé wuúci táláka bíábɔ́ bɛlaŋa bí nyiike e elime.
Bé ŋé bééti Yésus o olimisinyi.
36 Hú waá cɔ́cɔbaka ne buúse,
baacɔ é húle abɔ́ aanyɛaka bíábɔ́ bɛlaŋa bí nyiike o ohónyí ɔ ɔmuaná.
37 Ekúlú ayɛ́ u ŋaá bá wa yáaŋa hoóhi ne Yelúsalɛm ɔ ɔcɔba a hɛlɔɔkɔ hɛ́ nɔkɔndɔ nú Molifié,
etúte yɛ́ baákɔ́nɛ́na ekime ŋo nyíóyo ne obíléne,
bé ŋé túme onyemi Bandɔ́mɛsɛ́ okelú ɔ ɔmuaná e *bikéki bɛ́ bɛsana abɛ́ bá ŋa bɔ́ lɛ́caka.
38 Bá kɔ́ɔnaka báyɛ :
« Bandɔ́mɛsɛ́ á sáyábákɛ́na Otéŋí awɔ́ u ŋa fáaya eé nyiínyi nyí Otéŋí a Waáŋá.
Mbuumu á bámɔ́kɔ́na ɔ Ɔmuaná,
nuúmi ná Bandɔ́mɛsɛ́. »*
39 Bɔ́mɔtɛ́ *Bafalisiɛ́ŋ bé etúte ŋa bɔ́ laána Yésus báyɛ :
« Muékúnyi,
kákálákɛ́na nyɛkɛla nyɛ́ bɔ́ɔ́wɔ baákɔ́nɛ́na ! »
40 Mbá u ŋá bɛ́káma ɔsɛ :
« Ɛ ŋa mɛ́ banɔ́ láana anyía bébú lésíkínyi mbuumu,
ta andányɛ́ kéé bíólíkínyi. »
Yésus ŋa lɛ́la baacɔ bé Yelúsalɛm
41 Ekúlú eyí Yésus ŋaá bá wa yáaŋa hoóhi na bálɛ́ka ci Yelúsalɛm,
u ciíci lɛcaka,
u ŋé túme ɔlɛla a asana na baacɔ bá hɔ́á.
42 Mbá ɔsɛ :
« Ééʼ,
mbɔ́kɔ banɔ́ tɔ́na nu ŋa nɔ́ bá nuenú ményukune bɛsana a bɛ́áŋa bɛ́ɔ banɔ́ kɛ́la bɔmbányɛ hɛ́nánɔ,
keyé bɔmbányɛ,
mbá aámbáya bɛ́áŋa bɛnambánɔ́ a cáánɔ́ eése.
43 Yááŋa anyía,
mɔɔ́sɛ́ ŋa fáakɔna náánɔ́ amá báánɔ́ beliŋine káá banɔ́ bɔ́ŋɛna na nɔbɛkɛ nú biité,
bɔ́ banɔ́ nyíá,
bɔ́ banɔ́ kúeyikinyi ihényí ikime.
44 Bá ká bɔ banɔ́ ɔɔ́nɔ́kɔ,
bɔ́ kátaka búánɔ́ bunɔŋɔ ;
bé ti ké bú síke nyɛndányɛ́ nyɛ́mɔtɛ́ nyɛtálánɔ́ ɔ sɔ́ɔ́kɔ́ ɔ ɔmuaná,
anyía nu ti ómo nú menyi ekúlú ayɛ́ Bandɔ́mɛsɛ́ ŋaá faáya ɔ ɔ banɔ́ nóhi ! »
Yésus ŋɔ yɔɔ́ŋɛ́na bakɛla onduné
45 E elime eécí,
Yésus ŋo yóófíne eé *Ciíbe cɛ Bandɔ́mɛsɛ́,
u ŋé túme ɔwɔɔ́ŋɛ́na bakɛla onduné ;
46 ɔsɛ náábɔ́ :
« Yááŋa yɔɔ́ŋɔ́kɔ́nɔ́ a Ciɔɔ́ŋɛ́ cɛ́ Bandɔ́mɛsɛ́ anyía :
“Ciamɛ Ciíbe káá bá Ciíbe cɛ ɔbɛ́cɔ́kɔ́lɛ́na.”
* Mbá banɔ́,
nú me nú ciíci ceŋisi ciíbe ecí beébi ŋa bɔ́ bɛ́námba noómi. »
47 Yésus ŋaá bá we yeékúnyíki mɔɔ́sɛ́ mekime eé Ciíbe cɛ Bandɔ́mɛsɛ́.
Ne betéŋínyi *beluli nyiínjie,
ne *beékúnyi bikotí,
na *baáŋá bé *Besuif ŋaá bá bábɔ́ áambaka ohónyí wú o wuúci ɔ́ɔ́nɔ.
48 Mbá bá ŋa bɔ́ bá bé ti ébu ményí anyána bábɔ́ kɛla,
anyía baacɔ bekime ŋa bɔ́ tákákɛ́na eetú ɔ ɔlɔ́kɔ́ma bɛsana abɛ́ u ŋaá bá waá kɔ́ɔnaka.