15
1 Ne *betúé etéési bá kɔ́mɛ́na na bakɛla maabɛ́ bekime ŋaá bá bébú bíkósíti né Yésus anyía bábɔ́ lɔ́kɔ́máka bíáyɛ́ bɛsana.
2 Na *Bafalisiɛ́ŋ ne *beékúnyi bikotí ŋa bɔ́ lɔ́kɔ́má bɔɔbɛ́,
bé bícúcúléke báyɛ :
« Ɔɔcɔ ooci ŋaá káha bɔmbányɛ bakɛla maabɛ́,
u nyíékínyi ne beébe ! »ª
Ɛnjaba cɛ ɛtɔ́mbá e ci ŋeé nyímé
3 Yésus ŋeé beébe túmíne ɛnjaba ɔsɛ :
4 « Mbɔ́kɔ ɔɔcɔ a wɔmɔtɛ́ náánɔ́ áŋa na ɛtɔ́mbá etíne atáánɔ ;
wée nyimisi ciíci ɛ́mɔtɛ́,
tɛ́ka u káá nyɛ́ána etíne ényíse ne imbuke buunyi ne ínyíse a atúalɔ́ anyía wá caŋá ká yáambaka e cinyíménú ɔ ɔkɔɔ́háma ayɛ́ u ké ciíci bɔ́ŋɔ e ?
5 Ekúlú ayɛ́ u keé ciíci bɔ́ŋɔ,
u ŋeé ciíci bɛ́tála a bɛfaka ne obíléne ɔ ɔtɛ́má,
yó ciíci eélúéne ;
6 wá kaáháma o ooki,
yɔ́ lɔ́ŋɔ́kɔ na baláayɛ́ na baacɔ a bá bɔ́ŋa hoóhi ne wuúci,
mbá ɔsɛ náábɔ́ :
“Ánɔ faákɔ́na,
túé bílénéke anyía ɛ́ maá mɛ bɔ́ŋɔ cíámɛ́ ɛtɔ́mbá a cɛ ŋaá bá inyíménú !”
7 Ɛ ŋa mɛ́ banɔ́ láana anyía híáná obíléne weéŋí káá bá ɔ Ɔmuaná a asana na mɔkɛla maabɛ́ mɔmɔtɛ́ a mú á bɛ́kákálákɛ́na búáyɛ́ bɔɔbɛ́,
mbá mu sɔ́mba ɔkɔlɔ́ eé buúbu ɔ ɔhɔla bɛtálɛ́mánánɔ́ bɛ́ baacɔ etíne ényíse ne imbuke buunyi ne ínyíse abɛ́ nyɛbɛ́kákálɛ́na nyɛ́ bɔɔbɛ́ ti ŋée beébe bɛ́ámbɛ́na. »
Ɛnjaba ci eléŋú yɛ́ mɔɔnyɛ́ e yí ŋee nyíme
8 « Ta anyía túá kɔɔ́na anyía oónjú a wɔmɔtɛ́ áŋa ne biléŋú bɛ́ mɔɔnyɛ́ bíɔ́hátá ;
weé nyímísi yiíyi ɔ́mɔtɛ́,
tɛ́ka u káá cia *lámba,
u húle sɔ́ɔnɔkɔ ciíbe ikime ɔ ɔwaamba ɔ ɔkɔɔ́háma ayɛ́ u kéé yiíyi bɔ́ŋɔ e ? ª
9 Ekúlú eyí weé yiíyi bɔ́ŋɔ,
mbá u lɔŋɔ́kɔ na baláayɛ́ na baacɔ a bá bɔ́ŋa hoóhi ne wuúci,
mbá ɔsɛ náábɔ́ :
“Ánɔ faákɔ́na,
túé bílénéke anyía ɛ́ maá mɛ bɔ́ŋɔ eléŋú yɛ́ mɔɔnyɛ́ e yí ŋeé mi nyímíné !”
10 Ɛ ŋa mɛ́ banɔ́ láana anyía híáná obíléne weéŋí áŋa haála ahá *bililé bɛ́ masɔ́ma bɛ́ Bandɔ́mɛsɛ́ áŋa ekúlú ayɛ́ mɔkɛla maabɛ́ mɔmɔtɛ́ a mú á bɛ́kákálákɛ́na búáyɛ́ bɔɔbɛ́,
mbá mu sɔ́mba ɔkɔlɔ́ eé buúbu. »
Ɛnjaba cɛ ɔɔ́nɔ́ ewú u ŋeé nyíme
11 Mbá Yésus ŋa háná beébe laana ɔsɛ :
« Ɔɔcɔ a wɔmɔtɛ́ ŋaá bá na baáná banɔ́mɔcɔ́ béfendí.
12 Ekuke yɛ́ ɔɔ́nɔ́ ŋá laana síkíne eebu buɔ́sɛ́ ɔsɛ :
“Taatá,
mi iínjie núámɛ nuafa nɔ́ bɔnɔ́mɛ a nɔ́ á mɛ nyɛmána.”
Síkíne ŋá aafákɛ́na bááyɛ́ baáná bɔnɔ́mɛ.
13 Mɔɔ́sɛ́ tɛ́ka ɔ ɔhɔla meéŋí,
ekuke ŋá bándáka búáyɛ́ bɔnɔ́mɛ bukime,
u ŋé súéte a bunɔŋɔ bɔ́ haaca.
U ŋgeé buúbu cáŋgɛ́na a aabɛ́ yí olíhe.
14 Ɛ́makɛ́la wá mana ɔcaŋɛna,
ɔmbɔ́ta ú ɛcaná ŋá háma a haála hekime etéehe ;
ɔsɔ́ka ŋé wuúci hatɛ́na.
15 U ŋá cɔba ɔ ɔkɔnyíɔnɔ ɔɔcɔ a wɔmɔtɛ́ u bunɔŋɔ eébú ;
ɔɔcɔ oócí ŋé wuúci tɔ́ma o okotétényi ɛŋɔnáfá a bíáyɛ́ bisíéné.
16 Ɛcaná ŋaá bá cíé wuúci nuakɛna buéŋí,
a nyɛnamá anyía u ŋaá bá weé lénéke ɔnyíá bɛnyɛ́ma abɛ́ ɛŋɔnáfá ŋaá bá cíá nyíáka,
mbá ta ɔɔcɔ ŋaá bá u ti é wuúci iínjie.
17 Ɛ́ɛhɛ́ ú ŋe túmé obílúmínyi mbá ɔsɛ :
“Bɔnyiɔnɔ bekime bá ciamɛ́ síkíne á bɔ́ŋa na bɛnyɛ́ma biéŋí e bí ŋeé beébe yáka ɔnyíá,
mbá yaŋɔ́ aáhá,
i ŋeé mi wé ɛcaná !
18 Ɛ ŋa mɛ́ cɔba ɔ ɔhatɔna,
míɔ hálɔ́mɔ́na ná ciamɛ́ síkíne,
mío wuúci laana anyía :
Taatá,
ya mɛ́ŋa ɔkɛlákánɔ́ na Bandɔ́mɛsɛ́ na kuɔŋɔ́ bɔɔbɛ́ ;
19 ɛ tɛ ámɛ bá wu ɔ háná bɛ́lɔ́ŋɛ́ta anyía uuwe ɔɔ́nɔ́.
Mi hiíte aná háyɛ munyiɔnɔ a mumɔtɛ́ a bɔ́ɔ́wɔ bɔnyiɔnɔ.”
20 U ŋá hatɔ́na,
u ŋá hálɔ́mɔ́na né síkíne.
U ŋaá bá wa yánaŋa haaca ekúlú eyí síkíne ŋeé wuúci lɛcá,
u ŋé wuúci bɛ́cáma mahana ;
ɛ́ɛhɛ́ u ŋɔ sɔ́mɔ́ ɔtɛ́tá o okoó wuúci káha,
u ŋé wuúci bɛ́áhɛ́nɛ́na a cɛɛ́tɔ,
u ŋé wuúci bíémbi.
21 Mbá ɔɔ́nɔ́ ɔsɛ :
“Taatá,
ya mɛ́ŋa ɔkɛlákánɔ́ na Bandɔ́mɛsɛ́ na kuɔŋɔ́ bɔɔbɛ́ ;
ɛ tɛ ámɛ bá wu ɔ háná bɛ́lɔ́ŋɛ́ta anyía uuwe ɔɔ́nɔ́.”
22 Mbá síkíne ŋaá laana bááyɛ́ bɔnyiɔnɔ ɔsɛ :
“Énu tényí héléne ambányɛ́kɛ́ yɛ́ bɔlaka,
énu wuúci laŋá ;
énu wuúci háya tɔ́na na nɔbánda a hɛnɔɔ́nɔ́ na bɛkandɛ́na a akɔlɔ́.
23 Énu héléne ɔɔ́nɔ́ u káwɔ a wɔtɔ́lɔ́kɔ́nɔ́,
ánɔ ɔ́ɔ́nɔ ;
túé bílénéke,
túá nyíáka,
24 anyía uumí ɔɔ́nɔ́ ooci ŋeé wé,
ú ma háányua ;
u ŋeé nyímé,
ú mɔɔ́ bɔ́ŋɛ́a.”
Bé ŋé túme obíléne.
25 Ekúlú eéyé,
ɔɔ́nɔ́ a waáŋá ŋaá bá wa yánaŋa e esíéné.
O okowéélúéke,
wa yáaŋa hoóhi ne ooki,
u ŋá lɔ́kɔ́ma bé súbéke bikembí,
bé bínéke.
26 U ŋɔ́ lɔ́ŋɛ́ta munyiɔnɔ a mumɔtɛ́,
ɔsɛ nááyá :
“Aátɛ́ yááŋa aáhá e ?”
27 Mbá munyiɔnɔ ɔsɛ :
“Ɔnɔ́ɔnyia mé ké yeélue,
ɔɔtɛ́ mɔ yɔ́ɔnɔ ɔɔ́nɔ́ u káwɔ a wɔtɔ́lɔ́kɔ́nɔ́,
anyía uuyé ɔɔ́nɔ́ maá ka hálɔ́mɔ́na ɔmbányɛ aá cɛɛ́tɔ.”
28 Hilóbi ŋé tímbíé ɔɔ́nɔ́ a waáŋá,
u ŋé kine owoofine eé ciíbe.
Aáná síkíne ŋaá hámá a nɔháatɛ́ o okoó wuúci bɛ́cɔ́kɔ́lɛ́na anyía wé oofíne.
29 Mbá ɔɔ́nɔ́ ɔsɛ nááyá :
“Ɔ́ɔ lɛcá !
Tuɔŋɔ a yáaŋa tuéŋí atɔ́ ɛ́ ŋɔ mɛ́ ɔ nyiɔnɔ buólí,
ɛ kɛlaka bɔkɔ bukime abɔ́ ɔ ŋɔ mɛ́ laana anyía yámɛ́ kɛláka.
Ta híáná,
ó ti ŋóo mi iínjie te hibébíbébí anyía túésú bílénéke na baláamɛ.
30 Mbá,
ekúlú eyí uuwe ɔɔ́nɔ́ ooci maá ka hálɔ́mɔ́na,
wuúci awɔ́ u ŋa cáŋgɛna búɔ́wɔ bɔnɔ́mɛ bukime o olíhe na bɛɛbɛ́ bí beénjú,
ó moó wuúci ɔɔ́nɛ́na ɔɔ́nɔ́ u káwɔ a wɔtɔ́lɔ́kɔ́nɔ́ !”
31 Aáná síkíne ŋeé wuúci laána ɔsɛ :
“Ɔɔ́nɔ́,
tua sɔ́ŋa na kuɔŋɔ́ aaha bikúlú bikime,
bíámɛ bɛnyɛ́ma bikime áŋa bíɔ́wɔ.
32 Mbá tu ŋá sɔ́ nyɛmána tú ɔlɔ́kɔ́máka bɔmbányɛ,
tu bílénéke,
anyía ɔnɔ́ɔnyia ooci awɔ́ ɔ ŋɔɔ́ lɛca ŋeé wé,
ú ma háányua ;
u ŋeé nyíme,
ú mɔɔ́ bɔ́ŋɛ́a.” »