Zhã
sábá nə̀tɔ̀ nyân dɛ́ ń kɛ̃ mɔ́
1
À dɔwa nántwə̂ Gəyuusi,
à só mó zhə̀n zhə̀nà,
wɔ́ àmyɛ́ gùlú w yé né cə́bal mɔ́ à nʼâ kɛ̃ sɛ́bɛ́ rɛ́ tɛ̀bɛ́ à la mɔ́ pɔ.
2 Dɔwa nántwə̂,
à nʼâ lwə̀l Yi ni bə̀ rə̀ ce kɔn gakó yə̀ náàcɛ̀nɛ́ ǹ sõ,
sə rə pə ǹ yala nɛ́ bəsàzùlí ǹdə ǹ tùntwə̃̀ə̃̀ né gə́ càn Yi yírh w né.
3 Lyì tú bə wɔ̀ nɛ̀ bə̀ ǹ zhǐ zhə̀n dɛ́ sɔ́má y yó kẽkẽ,
ǹ nə́ ǹ wɛ̀rhɛ́ ǹdə rə̀ gə́ nʼê byili ní.
Rə̀myɛ́ ce,
à wu nyɛ̀ dɛ̃´dɛ̃´.
4 À gə nyɛ̀ɛ̀ bʼà byâ bɛ́ ŋwɛ́nɛ́ zhə̀n sɔ́má yó,
rə̀myɛ́ nʼê pɛ nɛ wu-nyɔ̃̀ dɛ̃´dɛ̃´ du.
5 Dɔwa nántwə̂,
ǹ nə́ ǹ nyǐ Kristə-lyì bí yò ǹdə Kristə-lò gə́ mə̂ sə n wɛ̀rhɛ́ nɛ́,
ǹdə́ bə̀ wɔ́ zhələ ga.
6 Bə̀ byili ǹ sónó w yò Kristə-lyì gùlú w yé né.
Sɛ̃ bɛ ǹdə Yi gə́ nʼê yâl nɛ́ bə bʼe kwè bə̀ sɔ́má yá,
7 bə̀ wɔ́ Kristə yil lé yil bə̀ ŋwɛ́nɛ́ sɔ́má y yó.
Sə bə̀ yə̀ shɛ̀nɛ́ bə zwẽ lyì byɛ̀bɛ́ bə̀ yə̀l Yi rí tɛ̀bɛ́ rə̀ wɔ́ zhə̀n mɔ́ pár jɛ̃̀-kɔn yé.
8 Nə́myɛ̌ mə̂ sə nə́ sɛ̃ lyì bí bə̀myɛ́ mɔ́ dwí rí ni nə́ twĩ̀ zhə̀n dɛ́ byilu yilə.
9 À kɛ̃ zɔ̀mà màngɛlɛ́ a pə Kristə-lyì gùlú w lyì bí ni,
sə Jətərəfu nə́ ń yâl n yə̀ á gùlú w yé né cə́bal mɔ́.
Ń tá ń yâl n shɛ̀nɛ́ n zwẽ kɔn dɛ́ dɛ̀bɛ́ à byili mú yé.
10 Rə̀myɛ́ ce,
à gə túwə́,
à bʼa zɔ̀m kɔn dɛ̀bɛ́ gakó ń nə́ ń wɛ̀rhɛ́ mɔ́ yò.
Ń nə́ ń tó dɛ̃̌ ń zhìlì nə́ yilə.
Rə̀myɛ́ yə̀ ń yírh swí yé.
Ń bə shɛ̀ Kristə-lyì bí dwã bɛ́ zhəəle zõ,
n jà ń bə shɛ̀ bə̀ lò dõ myɛ zwẽ bə̀ zhəəle yé,
n jà ń nə́ ń jì bì gùlú w myɛ wẽ́.
11 Dɔwa nántwə̂,
bə̀ká kwè lwɛlɛ sɔ́má yé.
Kwě cɛ̀nɛ̀ sɔ́má,
bə̀ lò mɔ̀bɔ́ ń nə́ ń wɛ̀rhɛ́ cɛ̀nɛ̀,
rə̀-ná-cí wɔ́ Yi lò,
sə lò mɔ̀bɔ́ ń nə́ ń wɛ̀rhɛ́ lwɛlɛ,
rə̀-ná-cí yə̀l Yi pár yé.
12 Lyì bí gakó nʼê zɔ̀m Dəmətərəyuusi yil náàcɛ̀nɛ́,
bə̀ ń nə́ ń wɛ̀rhɛ́ ǹdə zhə̀n dɛ́ gə́ nʼê byili ní.
Nə́myɛ cìcì mú nʼé zɔ̀m ń yil náàcɛ̀nɛ́.
E jà ǹ yě bə̀ kɔn dɛ́ dɛ̀bɛ́ nə́ rʼé byili mú wɔ́ zhə̀nà.
13 Ywẽ̀ nánzhəzhɔ̌ gwẽ̌ ŋwɛ́nɛ́ à la mɔ́ byilu,
sə à tʼâ yâl a kɛ̃ nɛ sɛ́bɛ́ wẽ́ a pɔ̃́ yé.
14 À cìcì nʼâ yâl a bə̀ á sõ làlà,
nə́ jòm tɛ̃´ nə́ zɔ̀m.
15 Yi mʼa pɔ̃́ yə̀-zùlə́!
Ǹ dɔwabá gakó nʼê ce mó.
Ce nə́myɛ dɔwabá byɛ̀bɛ́ bə̀ ŋwɛ́nɛ́ á sõ mó mə̀dù mə̀dù gakó ń pə nə́ba.