Zhã
sábá nə̀lyè nyân dɛ́ ń kɛ̃ mɔ́
1
Kɛ̃,
wɔ́ àmyɛ́ gùlú w yé né cə́bal mɔ́,
à nʼâ kɛ̃ sɛ́bɛ́ rɛ́ tɛ̀bɛ́ à la ǹmyɛ́ mɔ̀bɔ́ Yi cír mó ǹdə́ ǹ byâ bɛ́ ga nɛ pɔ.
À só ába zhə̀n zhə̀nà.
È də̀ àmyɛ́ dúdú à só ába yé;
lyì bí byɛ̀bɛ́ bə̀ yě zhə̀n dɛ́ gə́ wɔ́ nɛ́ mɔ́ myɛ só ába.
2 Wɔ́ zhə̀n dɛ́ tɛ̀bɛ́ rə̀ ŋwɛ́nɛ́ nə́ wẽ́ mó rə̀ ce nə́ só ába,
sə rə̀ bʼa jʼâ ŋwɛ́nɛ́ ǹdə́ nə́ba twéé twéé.
3 Nə́ Da Yi ǹdə́ ń Byǐ Yezu Kristə bʼa cĩ́ bwəl nə́ yó,
bə pə nə́ba sǔbri ǹdə́ yə̀-zùlə́ zhə̀n ǹdə́ sónó wẽ́!
4 À pwírí ǹ byâ bɛ́ jàlà ŋwɛ́nɛ́ zhə̀n sɔ́má yó ǹdə nə́ Da mɔ́ gə́ pɔ nə́ba nyí ní.
Rə̀myɛ́ ce à wu nyɛ̀ dɛ̃´dɛ̃´.
5 Sə èlâsɛ̃´,
à nʼâ lwə̀l mó bə̀:
swénénə nə́ swéné dwã.
Rə̀myɛ́ də̀ nyí nándùl à nʼâ kɛ̃ à la ába pɔ yé.
Wɔ́ nyí rí nándwə́l lé nə́ nɔ kùr-ju yi ní ga mɔ́.
6 Nyí rí tɛ̀bɛ́ á nyɛ̀ɛ̀ kùr-ju yi ní ga mɔ́ nʼê wə̀lə̀:
“Swénénə dwã.”
E zɛ̃̀ á gə só dwã,
wɔ́ Yi nyə́ né á nʼá zwẽ.
7 Lyì sú lũ w wẽ́,
bə̀ tʼâ zwẽ nyí bə̀ Yezu Kristə jǐrh numbyíní zhə̀n ga yé,
sə lyì bí bə̀myɛ́ mɔ́ wɔ́ kɔ̀mdɛ̀,
bə jʼà wɔ́ Kristə zwə̀.
8 Dɛ̃̌na á cìnə̀,
á bə̀kʼá ce nə́ tum dí yə̀ tùm-fóó yé,
mùnì á nə á kwândɛ́ gakó.
9 Lò mɔ̀bɔ́ ǹ tá ǹ yâl ń zhì nà èdù yó Kristə kàrmɔ́ wẽ́,
ń zɛ̃̀ ǹ nə́ ǹ súlí kɔn dõ né,
Yi tɛ̀nɛ́ ǹ wẽ́ yé.
Sə lò mɔ̀bɔ́ ǹ zhǐ nà èdù yó Kristə kàrmɔ́ wẽ́,
Da mɔ́ ǹdə́ Byǐ mú ga ŋwɛ́nɛ́ ǹ wẽ́.
10 Lò gə bàn á sõ,
e jʼà də̀ kàrmɔ́ mə̀myɛ́ ń mə́ ń bànà,
sʼá bə̀kʼá zwẽ ń zhəəle yé,
á bə̀kʼá ce mo náàcɛ̀nɛ́ myɛ cìcì yé.
11 Lò ǹ gə co mo náàcɛ̀nɛ́,
ǹ twə́r ŋwɛ́nɛ́ ń lwɛlɛ rɛ́ wẽ́.
12 Ywẽ̀ nánzhəzhɔ̌ gwẽ̌ ŋwɛ́nɛ́ à la ába byilu,
sə à tʼâ yâl a kɛ̃ nɛ sɛ́bɛ́ wẽ́ a pə ába yé.
À nʼâ bùl bʼà mʼa bə̀ á sõ,
nə́ jòm tɛ̃´ nə́ zɔ̀m,
mùnì ga nə́ wun yə̀ nyɛ̀n námpúm.
13 Ǹ ná-bə̀kɔ́ mɔ́ Yi cír mó byâ bɛ́ nʼê ce mó.