Kana bɛ́ ǹdə́ bə̀ byə́nə́ bé gə́ mə̂ sə bə jòm ǹdə́ dwã nɛ́
3
Kana,
ámyɛ zwẽnə á byə́nə́ bé nyí ni.
Èta,
bá bə̀ jàlà gə gwẽ̌ tʼâ zwẽ Yi zɔ̀mɛ̀ rɛ́ myɛ,
á tùntwə̃̀ə̃̀ né bʼa ce bə zwẽ nyí ǹdʼá yə̀ á nyí púr yé,
2 bə̀ bə̀ mʼa pwírí á zhe á cìn cɛ̀nɛ̀,
á nʼá nyàm bɛ̀,
á tʼá wɛ̀rhɛ́ yààyàà yé.
3 Á bə̀kʼá pyà gàndɛ̀ tɛ̀bɛ́ rə̀ càn zú,
á bə á ywẽ́,
á ce sánə́má cìbyǔr,
á kwɛrhɛ á yala nɛ́.
E yə̀ rə̀myɛ́ dúdú á la mʼá byili á cɛ̀nɛ̀ yé.
4 Á cɛ̀nɛ̀ rɛ́ mə̂ sə rə yə̀ á wun ní wẽ́ rə̀ ŋwɛ́nɛ́,
sʼá zə wu-bɔ̀nɔ̀,
á yə̀ kana byɛ̀bɛ́ bə̀ nyɛ̌ shɛ́shɛ́.
Cɛ̀nɛ̀ rɛ́ rə̀myɛ́ mɔ́ tʼâ lyɛ̃ yé,
e jʼà wɔ́ rə̀myɛ́ dwí rí Yi nʼê yàlá.
5 Wɔ́ èta shãã ga kana bɛ́ byɛ̀bɛ́ bə̀ yʼà zhí Yi ni bə̀ nʼê dɛ̃̀ rə̀ nyì-bwelé y pyǐrh mó yʼà nʼê wɛ̀rhɛ́ nɛ́,
bə̀ mʼê byili bə̀ bə̀ càn,
bə̀ gə́ yʼà nʼê zwẽ bə̀ byə́nə́ bé nyí ni mú yilə.
6 Wɛ̀rhɛ́na ǹdə Sara ta.
Ń gə́ yà ń nə́ ń zwẽ Abəraham nyí ni mú ce,
ń yà ń nə́ ń byẽ̀ mò bə̀ ń yó-cə́bal.
Ámyɛ gə nʼá twĩ̀ cɛ̀nɛ̀,
á tʼá dùr kaka ywẽ,
sə́ nyǐ á wɔ́ Sara bə̀kwá.
7 Bala,
ámyɛ mə̂ sʼá jòm ǹdʼá kana bɛ́ cɛ̀nɛ̀,
á nyǐ bə̀ yò.
Á mə̂ sʼá lwar bə̀ bə̀ wɔ́ kana,
bə̀ jàn dɛ́ bə já yé.
Zəna bɛ ǹdə́ nyɔ̀mɔ̀,
bʼâmyɛ̌ ǹdə́ bə̀myɛ́ ga mə̂ sʼá tó dwã á nə nyǔ mə̀ tʼâ la zhɔ̌ pɛnɛ́ y Yi sõ.
Á gə wɛ̀rhɛ́ èta,
kaka tʼâ la á yé ne cə̂r á Yi-co wẽ́ yé.
Nə́ mə̂ sə nə́ jòm ǹdə́ dwã ǹdə́ yə̀-zùlə́ kɔn gakó wẽ́
8 Tɛ̀bɛ́ rə̀ dàl mɔ́,
cenə á gakó bùlə̀ né yə̀ rə̀dù,
sʼá surhə né myɛ yə̀ rə̀dù.
Swénénə dwã ǹdə da-byâ ta.
Zəna nɔ̀nɔ̀-dǔr ǹdə́ cìn-lwəl ǹdə́ dwã.
9 Lò gə wɛ̀rhɛ́ mɔ́ lwɛlɛ,
sə ǹ bə̀ká wɛ̀rhɛ́ mɔ lwɛlɛ yé.
Lò gə tùrh mó,
sə ǹ bə̀ká tùrh mò yé.
Ǹ gaga mɔ́ wál bə̀ Yi bʼa cĩ́ bwəl ń yó,
bə̀ Yi gə́ byẽ̀ ába mó,
rə̀ bwəl nyí bə̀ rə̀ bʼa cĩ́ bwəl á yó.
10 Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀:
“Lò mɔ̀bɔ́ ǹ nə́ ǹ yâl ń swéné ǹ cìnə̀,
sə ǹ wu myɛ jʼa yə̀ nyɛ̀n;
sə ǹ bə̀ká shɛ̀nɛ́ ǹ mə̀jòlò w púr lwɛlɛ gaga yé;
sə ǹ bə̀ká shɛ̀nɛ́ kɔma myɛ shí ǹ nyú w yé.
11 Ǹ mə̂ sə́ cẽ lwɛlɛ wɔ̀rhɔ́ yò,
sə́ wɛ̀rhɛ́ cɛ̀nɛ̀;
sə́ pyà bə̀ yə̀-zùlə́ yál nɛ́ twéé twéé.
12 Zhə̀nà,
Cinu yírhə́ pyâ wu-cángá cìnə́ yó,
ń nə́ ń zwẽ bə̀ lwə̂l,
sə ń bə lyì bí byɛ̀bɛ́ bə̀ nʼê wɛ̀rhɛ́ lwɛlɛ mɔ́ só yé.”
13 Á gə nʼá ce yə̀wâl nɛ́ ǹdə́ cɛ̀nɛ̀ wɔ̀rhɔ́,
mɔ̌ ń mà n wɛ̀rhɛ́ ába lwɛlɛ?
14 Á gə nʼá wɛ̀rhɛ́ cɛ̀nɛ̀,
bá á gə nʼá nwɛ̀nɛ̀ rə̀myɛ́ yil myɛ,
á bʼâ nə wu-nyɔ̃̀.
Á bə̀kʼá dùr numbyínsí ywẽ yé,
sʼá bə̀kʼá cĩ́ twə́lə́ á wẽ́ yé.
15 Nyámna Kristə á wun ní wẽ́,
bə̀ wɔ́ ńmyɛ̌ ń cǐ ába,
sʼá tɛnɛ,
lò gə tú ń nə́ ń bwə̀rh ába kɔn dɛ̀bɛ́ rə̀ ce á nʼá dɛ̃̀ kɔn Kristə sõ mó,
sʼá ŋwɛ̀nɛ́ á lyár mɔ,
16 sʼe yə̀ ǹdə́ wu-bɔ̀nɔ̀ ǹdə́ cìn-lwəl.
Cenə jàn nɛ́ á yə̀ lyì byɛ̀bɛ́ bə̀ nʼê nyàm Yi ǹdə́ wu-põ námpúm.
Twĩ̌nə á tùm-ècɛ̀nà nɛ́ Kristə jàn yil mó ǹdə́ wu òdù,
mùnì ga lyì bí byɛ̀bɛ́ bə̀ nʼê zɔ̀m á yil námməlwɛ̀lɛ́ mɔ́ jí cìzhìlə̀.
17 Á nɔ̀nɔ̀ w á tùm-ècɛ̀nà nɛ́ yil mó gə wɔ́ Yi pùbùlə̀,
rə̀myɛ́ cɔ̃̀ á gə nʼá nwɛ̀nɛ̀ tùm-bəlwâlsɛ yilə.
18 Kristə myɛ cìcì nwɛ̀nɛ̀,
n cì numbyínə́ bé yə̀-bəlwàálɛ́ yil twər rə̀dù sá,
twéé gakó yilə.
Ń yà ń bə dóó zhe yé,
sə ń cù lyì-bəlwâlsɛ yilə,
mùnì n zə ába n vò Yi sõ.
Bə̀ gu mu ń gə́ wɔ́ numbyíní mú yilə,
sə Eshirhə náàcɛ̀nɛ́ kʼa bwìrhì mù.
19 Eshirhə y èmyɛ́ èdù y jàn yil ń zhə̀l byɛ̀bɛ́ bə̀ cù ǹdə́ bə̀ yə̀ cìn-cìnú nɛ mɔ́ sõ,
n bwə̀l Yi zɔ̀mɛ̀ rɛ́ n byili bi.
20 Wɔ́ byɛ̀bɛ́ bə̀ cẽ Yi nyí ni shãã ga,
Nəwee gə́ yà ń nə́ ń fwar kùlkṍ w yi ní mú.
Yi zhìlì rə̀ yala nɛ rə dɛ̃̀ dɛ̃̀ bɛ̀ rə ga.
Lyì bí byɛ̀bɛ́ bə̀ zù ò wẽ́ mó yʼà wɔ́ lyì màngɛlɛ́,
nunə lyɛlɛ sásá.
Bə̀myɛ́ dúdú bə̀ zwẽ bə̀ cìn nɛ̃̌ mɔ́ wa.
21 Sə rə̀myɛ́ wɔ́ nɛ̃̌-shɔ mɔ́ Yi nʼê tó mə̀ dɛnnɛ rə vwârh ába zà zà mɔ́ nyɔrhɔ.
Nɛ̃̌-shɔ mɔ́ tʼâ shàrh yala jìmdì yé.
Sə ǹ nə́ ǹ tó mə̀ dɛnnɛ ǹ pɛ ǹ cìn námpúm Yi ni ǹdə́ ǹ wu gakó,
Yezu Kristə gə́ cù n ká n bwìrhì mú jàn yilə.
22 Ń zhə̀l ń jě Yi jə̀jĩ́ ni,
ń nə́ ń jí pyɛ̀lɛ̀ màlɛ́kabá ǹdə́ dɛ̃̌ jàn cìnə́ bé dwã bɛ́ yó w Arəzana wa.