2
Rə̀myɛ́ ce,
è gə wɔ́ wu-bárhɛ́,
ǹdə́ dwã myìnù,
ǹdə́ kɔma,
ǹdə́ bwɛ̃̌-dǔr,
ǹdə́ dwã tùùrhì,
yẽ̌nə rə̀myɛ́ mɔ́ dwí rí gakó ne.
2 Yálna ǹdə byì-shɛ̌msɛ ta,
á swéné Yi zɔ̀mɛ̀ rɛ́ rə̀ wɔ́ ǹdə yil mɔ̀bɔ́ mə̀ yə̀ kaka gùlí ta mɔ́,
mùnì ga á byì,
á nə vwârh,
3 bʼâ pwírí Cinu nyɛ̀ dɛ̃´dɛ̃´,
ǹdə bə̀ gə́ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ né.
Nə́ wɔ́ dwí tɛ̀bɛ́ Yi cír
4 Bwəlsenə Cinu Yezu ni.
Wɔ́ ńmyɛ̌ ń wɔ́ nə́kulu w nã́nyì y cìcì numbyínə́ bé vùr bə dwĩ̀ kwã nɛ́ mɔ́.
E jʼà wɔ́ òmyɛ́ ò sú Yi yírh rə cír.
5 Ámyɛ wɔ́ ǹdə nə́kuuli nã́nyìrh ta.
Rə̀myɛ́ ce,
bwəlsenə Cinu ni,
bə zə ába bə lù Eshirhə náàcɛ̀nɛ́ jì,
mùnì ga á yə̀ Yi vwĩ̀-zwə́lnə byɛ̀bɛ́ bə̀ wɔ́ wu-põ cìnə́ gùlú,
á nʼá zwə́l vwə̃̀ nyɛ̀bɛ́ nə̀ wɔ́ Eshirhə náàcɛ̀nɛ́ nyə̀ná,
sə Yi bʼa zwẽ ne Yezu Kristə yilə.
6 Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə̀ Yi wòwə̀:
“Nyǐnə à cír nə́kulu kɔ̀bɔ́ ò càn,
a cĩ́ Səyɔ̃ nɛ́.
Wɔ́ òmyɛ́ ò wɔ́ jì-byòló w nə́kulu wə́.
Lò mɔ̀bɔ́ ǹ zhí nə́kulu w òmyɛ́ nɛ,
cìzhìl tʼâ la mɔ́ jú yé.”
7 Nə́kulu w òmyɛ́ càn ámyɛ̌ byɛ̀bɛ́ á zhí w mú yilə.
Sə byɛ̀bɛ́ bə̀ yə̀ w zhí mú,
bə̀ mə̂ sə bə lwar bə̀:
“Nə́kulu w kɔ̀bɔ́ jì-lùrnə̀ bé vùr bə dwĩ̀ kwã nɛ́ mɔ́,
wɔ́ òmyɛ́ ò jǐrh jì y jì-byòló w nə́kulu wə́.”
8 Bə̀ kɛ̃ jàà dõ wẽ́ bə̀ “Wɔ́ òmyɛ́ nɛ lyì nʼê mà bə̀ nə̀rh né bə̀ lwé tɛ̃´.”
Ò nʼô lwé be tɛ̃´,
bə̀ gə́ yə̀ shɛ̀nɛ́ bə zwẽ Yi zɔ̀mɛ̀ rɛ́ mɔ́ yilə.
Wɔ́ rə̀myɛ́ rə̀ wɔ́ bə̀myɛ cəl.
9 Sə ámyɛ̌ wɔ́ dwí tɛ̀bɛ́ Yi cír.
Á wɔ́ pyɔ̌ mɔ́ vwĩ̀-zwə́lnə gùlú.
Á wɔ́ Yi lyì-ècɛ̀nà dwí.
Yi cír ába mùnì ga á bwə̀l tumə nánfwààlɛ́ tɛ̀bɛ́ rə̀ wɛ̀rhɛ́ mɔ́.
Rə̀ byẽ̀ ába rə ce á du cə-byín wẽ́ á bə̀ rə̀ pwẽ̀ dé nánfɔ̀lɔ̀ w wa.
10 Shãã ga,
á yʼâ də̀ Yi lyì yé;
sə èlâsɛ̃´,
á wɔ́ rə̀ lyì.
Shãã ga,
rə̀ yʼà gwẽ̌ tʼâ dùr á nɔ̀nɔ̀ yé;
sə èlâsɛ̃´,
rə̀ nʼê dùr á nɔ̀nɔ̀.
Nə́ wɔ́ ǹdə zhələ ta cɛ yó
11 À dɔwabá nántwə̂rh,
á wɔ́ ǹdə zhələ ta cɛ yó;
á la lyãɔ̃.
À nʼâ lwə̀l ába:
á bə̀kʼá shɛ̀nɛ́ yala nɛ́ shilə námməlwâlsɛ́ sə̀ nʼê bwí ǹdʼá wun ní nyə̀ná nɛ́ mɔ́ nyí ni yé.
12 Zəna á cìn náàcɛ̀nɛ́ lyì bí byɛ̀bɛ́ bə̀ yə̀l Yi pár mɔ́ wẽ́,
mùnì bá bə̀ gə nʼê ce cə̀rh á nyí ni bʼâ nʼá wɛ̀rhɛ́ lwɛlɛ myɛ,
dɛ̃ rɛ́ tɛ̀bɛ́ Yi bàn nə́ba gwãɔ̃ mɔ́,
bə̀ yírhə́ bʼa nə á tùm-ècɛ̀nà nɛ́,
bə cèrhé re.
13 Zwẽnə lyì bí byɛ̀bɛ́ bə̀ wɔ́ yó-cìnə́ cɛ yó mó nyí ni Cinu yilə.
Zwẽnə pyɔ̌ mɔ́ nyí ni,
bə̀ wɔ́ ńmyɛ̌ ń cǐ lyì bí gakó,
14 sʼá zwẽ ń kwã-lyì bí ń nə́ ń twĩ̀ mú myɛ nyí ni.
Ń nə́ ń twĩ̀ bì bə̀ bə̀ pə còrhò-tum byɛ̀bɛ́ bə̀ nʼê twĩ̀ lwɛlɛ mɔ́ nɛ,
sə bə cèrhé byɛ̀bɛ́ bə̀ nʼê twĩ̀ cɛ̀nɛ̀ mɔ́.
15 Yi nʼê yâl bʼâ twĩ̌ tùm-ècɛ̀nà,
mùnì zɔ̀m-bəywààlɛ́ cìnə́ bé bə̀ yə̀l nə̀ kùrə̀ mó nyə́ cɛrhɛ,
bə pyà pyà bə̀ gə́ bʼa lyár nɛ́ bə ga.
16 Twĩ̌nə á tùntwə̃̀ə̃̀ né ǹdə lyì byɛ̀bɛ́ bə̀ cǐ bə̀ cìn ta,
sə cìn-cìnú mú mə̀myɛ́ bə̀kʼa yə̀ tùntùm-bəlwâlsɛ yó ne á la bʼá pyi ní yé.
Zəna á cìn ǹdə Yi tùntùnnə̀ ta.
17 Nyámna lyì bí gakó.
Swénénə á da-byâ Kristə-lyì bí.
Dǔrnə Yi,
sʼá nyə̀ pyɔ̌ mɔ́.
Kristə nwɛ̀nɛ̀ nə́ yilə, n pə nə́ba myɔrhɔ nántwə̂, mùnì nə́ kwè ń nà
18 Ámyɛ̌ byɛ̀bɛ́ á ŋwɛ́nɛ́ yó-cìnə́ sõ á nʼá twĩ̀ mú,
zwẽnə á yó-cìnə́ bé nyí ni ǹdə́ nyɔ̀mɔ̀,
sə è bə̀kʼa yə̀ byɛ̀bɛ́ bə̀ wɔ́ lyì-twə̂rh bə̀ bə zum mú dúdú sõ yé.
Zwẽnə byɛ̀bɛ́ bə̀ zum mú myɛ nyí ni.
19 Lò gə shɛ̀nɛ́ ǹ nwɛ̀nɛ̀ Yi nyɔ̀mɔ̀ yilə,
nɔ̀nɔ̀ w òmyɛ́ jʼà də̀ ǹmyɛ́ ǹ pyà wà,
rə̀myɛ́ wɔ́ kɔn dɛ̀bɛ́ rə̀ càn.
20 Sə ǹ gə dówə́,
ń zɛ̃̀ ń shɛ̀nɛ́ bə nwɛ̀nɛ̀ mɔ́ ǹ dóó w yilə,
ǹ nɔ̀nɔ̀ w bə kùr zhe yé.
Sə á gə twĩ̀ tùm-ècɛ̀nà,
á zɛ̃̀ á shɛ̀nɛ́ á nwɛ̀nɛ̀ rə̀myɛ́ yil ǹdə́ wu-bɔ̀nɔ̀,
rə̀myɛ́ wɔ́ kɔn dɛ̀bɛ́ rə̀ càn Yi yírh wə.
21 Wɔ́ rə̀myɛ́ yil Yi byẽ̀ ába,
bə̀ Kristə cìcì nwɛ̀nɛ̀ á yilə,
n pə ába myɔrhɔ nántwə̂,
mùnì á kwè ń nà.
22 Ń yə̀ lwɛlɛ wɛ̀rhɛ́ yé.
Kɔma də́-byǐ yə̀ ń nyú w shí yé.
23 Bə̀ tùrh mò,
sə ń yə̀ tó n tùrh yé.
Bə̀ nwɛ̀nɛ̀ mɔ̀,
sə ń yə̀ lwɛlɛ bwəl n pə yé.
Ń yẽ̌ rə̀myɛ́ gakó ne n ce mɔ̀bɔ́ ń nə́ ń bùr bùrsì cángá mɔ́ jɔ̃̀ wà.
24 Ń cìcì zwẽ nə́ yə̀-bəlwàálɛ́ n mə n cì də̀-jɔrhɔ́ w yó,
mùnì ga nə́ yə̀ ǹdə wɔ́ cú nə́ cù nə́ yẽ̌ nə́ yə̀-bəlwàálɛ́ nɛ ta,
nə́ zɛ̃̀ nə́ jǐrh cángá.
Wɔ́ ńmyɛ̌ cɔ̀mɔ̀ mɔ́ mə̀ zhɛ̀ á címsí.
25 Á yʼâ nyɛ̌ ǹdə pyììsì shɛ̀bɛ́ sə̀ jé ta,
sə èlâsɛ̃´,
á kʼá bə̀ á nə̀nɔ̀n mɔ́ nántwə̂ y ń nə́ ń yìlì ába mó sono.