6
1-2 Rə̀myɛ́ ce,
cèrhènə̀ nə́ cèrhè còrhò mɔ̀bɔ́ mə̀ wɔ́ námpwə̀lə́ nyâm Kristə shò-kwã nɛ́,
sə nə́ yẽ̌ kùr-ju kàrmɔ́ nɛ.
Bə̀ byili ába bə̀ yẽ̌nə tùntwə̃̀ə̃̀ né nyɛ̀bɛ́ nə̀ nʼê zə lò nə zhə̀l cu jàà w mɔ́ nɛ,
sʼá zhí Yi ni.
Bə̀ zɔ̀m nɛ̃̌-shaarɛ́ ǹdə́ jɛ̀sɛ́ còlò lyì bí yó w mó,
ǹdə́ cùùrí bùrhù mú,
ǹdə́ bùrsí kɔ́ dɛ̃ rɛ́ nánkwɛɛ́ rɛ́ yò ǹdʼába.
Rə̀myɛ́ ce,
nə́ bə mə̂ sə nə́ kʼá ji kùr nə́ rʼé zɔ̀m rə̀myɛ́ yò nə́ byili ába yé.
3 Yi gə pɔ sɔ́má,
nə́ bʼâ cèrhè kɔn dɛ̀bɛ́ rə̀ mə̂ ǹdə́ námpwə̀lə́ Kristə shò-kwã nɛ́.
4 Byɛ̀bɛ́ Yi pwẽ̀ dé yə̂r,
bə nə Yi pɛnɛ́ yá,
Eshirhə náàcɛ̀nɛ́ só bə̀myɛ yó,
5 bə pwírí Yi zɔ̀mɛ̀ rɛ́ nyɛ̀,
bə lwar lũ w kɔ̀bɔ́ ò bàn mɔ́ jàn dɛ́ gə́ la nɛ́ yál,
6 lyì bí bə̀myɛ́ mɔ́ kʼa zù tùntwə̃̀ə̃̀ námməlwâlsɛ wẽ́,
bə̀ kʼê wàr bɛ̀ bə̀ la ce bə pyìrhí bə̀ wun yé;
bə̀ kɔn nyɛ̌ ǹdə wɔ́ Yi Byǐ mú bə̀ kʼa kwɛrhɛ bə̀ nʼê pəpa də̀-jɔrhɔ́ yó ta,
lyì bí dwã bɛ́ zɛ̃̀ bə nə sɔ́má bə̀ nʼê tùrh mò.
7 Cɛ kɛ̀bɛ́ è nʼê nɛ dwà nɛ̃̌ pɔ́npɔ́n,
è nʼê swẽ́,
wẽ̀ dé tɛ̀bɛ́ bə̀ dù è wẽ́ mó byì rə ce byì-ècɛ̀nà è cìnə́ bé bə̀ nʼê vwàl y mɔ́ yilə,
sə Yi nʼê cĩ́ bwəl è yó.
8 Sə è gə kʼâ lyĩ sɔr ǹdə́ gɔ dúdú,
bə̀ nʼê wə̀l bʼè bə càn yé.
Yi tʼâ la dɔnɔ rə bʼe zhìlì è yò yé,
sə è yó-gurə́ y wɔ́ myǐn mə̀ la y ju.
9 Nə́ dɔwabá nántwə̂rh,
nə́ rʼé zɔ̀m èta,
nə́ jʼâ yě náàcɛ̀nɛ́ bə̀ wɔ́ sɔ́má kɛ̀bɛ́ è càn,
è la vwârh jàà w yó á ŋwɛ́nɛ́.
10 Yi wɔ́ cángá cə́bal.
Rə̀ wàr rə̀ la á gə́ só re mó,
ǹdə́ kɔn dɛ́ dɛ̀bɛ́ á nʼá wɛ̀rhɛ́ mɔ́ yò sǒ yé.
Á tó rə̀ lyì bí á yʼâ nʼá sɛ̃ shãã ga mɔ́ dɛnnɛ á byili bʼâ só re,
sə wɔ́ èta á gwẽ̌ nʼá wɛ̀rhɛ́ nɛ́ zà.
11 Sə nə́ rʼé yâl bʼâ mə̀dù gakó ce jàn nɛ́ n já ń nə́ ń wɛ̀rhɛ́ èta,
kɔn bʼe yí Cinu dɛ̃ rɛ́,
mùnì ga á nə kɔn dɛ̀bɛ́ gakó á nʼá dɛ̃̀ Cinu sõ mó.
12 Á bə̀kʼá jǐrh nə̀wàcã̀nyɛla yé.
Yálna lyì byɛ̀bɛ́ bə̀ zhí Yi ni,
bə̀ nʼê zhìlì bə̀ yala nɛ,
bə̀ lyì byɛ̀bɛ́ bə̀ nʼê wɛ̀rhɛ́ èta,
bə̀ mʼa nə cəl kɔn dɛ́ dɛ̀bɛ́ Yi bwəl rə̀ nyí mú wẽ́.
Yi yàl rə̀ nyì-bwelé y rə̀ bwəl Abəraham nɛ mɔ́ zhə̀n-cí
13 Yi gə́ bwəl nyí Abəraham nɛ mɔ́,
lò dõ yə̀ nɛ́ yàl ńmyɛ kə́ ń du Yi sə n mə n yə̀ rə̀ zhə̀n-cí yé.
Wɔ́ rə̀ cìcì rə̀ yàl rə̀ cìcì zhə̀n-cí,
14 rə̀ wò mò:
“Zhə̀n zhə̀nà,
à bʼa cĩ́ bwəl ǹ yó,
sə à bʼa pɔ̃́ dwí rə pù.”
15 Abəraham pyɛ́nɛ́ n dɛ̃̀ kɔn dɛ́ dɛ̀bɛ́ Yi bwəl mo rə̀ nyí mú,
sə ń nɔ rɛ.
16 Numbyíní gə la nyí bwəl,
wɔ́ lò mɔ̀bɔ́ ńmyɛ kə́ ń du èmyɛ́ ń nə́ ń yàl è zhə̀n-cí.
Sə rə̀myɛ́ nʼê vùr tə́tɔ̀ná è ce kwã nɛ́,
zɔ̀mɛ̀ kʼê tɛ̀nɛ́ yé.
17 Èta,
Yi myɛ gə́ yʼà nʼê yâl rə byili Abəraham dwí rí rə̀ mə̂ ǹdə́ kɔn dɛ́ dɛ̀bɛ́ rə̀ bwəl rə̀ nyí mú ni pamparɛ̃ɛ̃ bə̀ nyǐ rə̀ nyì-bwelé y tʼâ la lyə́r mó ce,
rə̀ cìcì yàl rə̀ cìcì zhə̀n-cí.
18 Nyì-bwelé kɛ̀bɛ́ è zhe zhə̀n-cí tʼâ lyə́r yé.
Yi cìcì wàr rə̀ bʼa yə̀ rə̀ nyì-bwelé y zhə̀n-cí,
e zɛ̃̀ e yə̀ kɔma yé.
Èta,
rə̀myɛ́ nʼê zal nə́ wun ní dɛ̃´dɛ̃´ nə́ yẽ̌ kɔn gakó ne,
nə́ mʼé dɛ̃̀ kɔn dɛ́ dɛ̀bɛ́ Yi bwəl nə́ba rə̀ nyí mú.
19 Kɔn dɛ́ rə̀myɛ́ mɔ́ ce nə́ bùlə̀ né zhǐ kẽkẽ jàà èdù.
Rə̀myɛ́ ce,
nə́ wɔ̌ nə́ bʼâ zù Yi jì y jàà y kɛ̀bɛ́ è càn dɛ̃´dɛ̃´ Yi gə́ jě mə̀gã̌ mɔ́ wẽ́.
20 Wɔ́ gàà Yezu tó yé n vò ń jě né nə́ yilə,
n jǐrh vwĩ̀-zwə́lnə náncɛ ǹdə Mɛlcəsədɛkɛ ta byinə nə̀ bə zhɔ̌ zhe yilə.