Pwəə sɛ́bɛ́ rɛ́ ń kɛ̃ n pə
Shəlamɔ
nɛ mɔ́
Pwəə nə́ ń ce Shəlamɔ
1
Àmyɛ́ Pwəə,
bə̀ co ne byə̀nə́-jù w à gə́ nʼâ twĩ̀ Yezu Kristə tum dí mú yilə.
Shəlamɔ,
wɔ́ àmyɛ́ ǹdə́ nə́ da-byǐ Timote nə́ kɛ̃ sɛ́bɛ́ rɛ́ tɛ̀bɛ́ nə́ rʼé pɛ ǹmyɛ́ mɔ̀bɔ́ nə́ só dɛ̃´dɛ̃´ ǹ nə́ ǹ tó nə́ba ǹ twĩ̀ mú,
2 ǹdə́ nə́ nəkɔ́ Apya,
ǹdə́ Arəcipi mú ń nə́ ń tó nə́ba ń nwɛ̀nɛ̀ mɔ́,
ǹdə́ Kristə gùlú w lyì bí bə̀ nʼê twí bə̀ gùlí dwã ǹ sõ kɛ̀lɛ́ w mɔ́ nɛ.
3 Nə́ Da Yi ǹdə́ nə́ Cinu Yezu Kristə bʼa cĩ́ bwəl á yó,
sə bə pə ába yə̀-zùlə́!
Pwəə nə́ ń ce Yi nə̀bán Shəlamɔ yilə
4 Shəlamɔ,
à gə nʼâ lwə̀l à Yi rí gakó,
à tʼâ swě ǹ yò yé.
À nʼâ ce rə̀ nə̀bán ǹ yilə.
5 Ǹ gə́ zhí Cinu Yezu ni ní mú,
ǹdə́ ǹ gə́ só byɛ̀bɛ́ gakó bə̀ wɔ́ Yi lyì bí ní mú,
lyì bí nʼê zɔ̀m rə̀myɛ́ gakó yò à nyɛ̀ɛ̀.
6 À nʼâ lwə̀l Yi ni,
mùnì ga àmyɛ́ ǹdə́ ǹmyɛ́ ga gə́ zhí Kristə ne nyì-dwìì wẽ́ mó sɛ̃ mɔ́ ń lwar cɛ̀nɛ̀ tɛ̀bɛ́ gakó nə́ nɔ Kristə jàn yil mó.
7 Da-byǐ,
ǹ gə́ só byɛ̀bɛ́ bə̀ wɔ́ Yi lyì bí mú swẽ́ à wu ni,
e ce à wu nyɛ̀ dɛ̃´dɛ̃´,
bə̀ ǹ pɔ bɛ wu-jɔ̀.
Pwəə nə́ ń lwə̀l Shəlamɔ nɛ bə̀ ń ká n zwẽ Oneshim ǹdə́ sónó
8 Rə̀myɛ́ ce,
à yě bʼà zhe sɔ́má Kristə wẽ́ à mʼa byili mú tɛ̀bɛ́ ǹ mə̂ sə́ wɛ̀rhɛ́ mɔ́,
9 sə à só sʼe yə̀ lwə́l à nʼâ lwə̀l mó ǹdə́ sónó.
Zhə̀nà,
àmyɛ́ Pwəə,
à wɔ́ náncɛ,
e jà kɔn súlí myɛ,
à ŋwɛ́nɛ́ byə̀nə́-jù w èlâsɛ̃´ Yezu Kristə tum dí à nʼâ twĩ̀ mú yilə.
10 Wɔ́ Oneshim yil à nʼâ lwə̀l mó,
bə̀ ń jǐrh à byǐ Yezu Kristə wẽ́ byə̀nə́-jù w nyɔ̀nɔ̀.
11 Ń yà ń tá ń sɛ̃ mɔ́ shãã ga yé,
sə èlâsɛ̃´,
ń mà n sɛ̃ mɔ́ ǹdə ń gə́ sɛ̃ àmyɛ nɛ nɛ́.
12 Ń wɔ́ à wu byǐ,
sə à ce ń ká ń bàn ǹ sõ.
13 À gə́ ŋwɛ́nɛ́ byə̀nə́-jù w yò-ècɔ̀nɔ̀ nyí rí à nʼâ bwə̀l mó yil mó,
à yʼà nʼâ yâl a cə̀r mò n sɛ̃ nɛ ǹ yilə,
14 sə à bə só sʼa wɛ̀rhɛ́ èta ǹdə́ à yə̀ ǹmyɛ́ nyí nɛ yé.
À tʼâ yâl a nyɛ́ɛ́ mɔ́ ń bə́ wɛ̀rhɛ́ cɛ̀nɛ̀ rɛ́ rə̀myɛ́ mɔ́ yé.
À nʼâ yâl bə̀ ǹ wɛ̀rhɛ́ rɛ ǹdə́ ǹ sə̀pwà pùbùlə̀.
15 Dɛ̀ga Oneshim gə́ zhǐr ǹ sõ mó wɔ́ dwã màngɛlɛ́ yilə,
mùnì ga n ká n bə̀ n já ń ŋwɛ́nɛ́ ǹ sõ.
16 Ń kə́ ń də̀ yóm dúdú yé.
Ń wɔ́ da-byǐ nántwə̂ èlâsɛ̃´.
À só mo dɛ̃´dɛ̃´,
sə ǹmyɛ́ mə̂ sə́ swéné mo dɛ̃´dɛ̃´ du,
bə̀ ń wɔ́ numbyíní,
n jà ń wɔ́ Kristə-lò.
17 Rə̀myɛ́ ce,
ǹ gə nə́ ǹ nyǐ ni ǹdə ǹ dɔwa ta,
sə́ zwẽ mo ǹdə wɔ́ àmyɛ́ cìcì ǹ nə́ ǹ zwẽ ta.
18 Ń gə dó mó,
ráá ń gə zhe ǹ jim,
sə́ cĩ́ rə̀myɛ́ gakó àmyɛ́ yó wə.
19 Wɔ́ àmyɛ́ Pwəə cìcì jɛ̃̀ è kɛ̃ zɔ̀mà nɛ́ nyɛ̀bɛ́ à mʼâ byili mú bə̀ nyǐ à bʼa kwɛ̃̌ dɛ.
Sə à tʼâ yâl a lyǐrh mó bə̀ nyǐ ǹmyɛ zhe àmyɛ́ jim yé,
sə jim dí rə̀myɛ́ mɔ́,
wɔ́ ǹ cìcì nándâ yá.
20 Zhə̀nà,
da-byǐ,
à nʼâ lwə̀l mó,
sə́ wɛ̀rhɛ́ nɛ cɛ̀nɛ̀ rɛ́ rə̀myɛ́ Cinu yilə:
zə à wu ni Kristə wẽ́.
21 À yě pamparɛ̃ɛ̃ bə̀ ǹ bʼâ wɛ̀rhɛ́ kɔn dɛ́ dɛ̀bɛ́ à nʼâ lwə̀l mó mó,
sə à yě bə̀ ǹ bʼâ wɛ̀rhɛ́ rɛ kɔn dwini.
Wɔ́ rə̀myɛ́ è ce,
à kɛ̃ sɛ́bɛ́ rɛ́ tɛ̀bɛ́ à la mɔ́ pɔ.
22 Kɔn súlí myɛ,
sə́ pyà jàà ń cĩ́ ni,
bʼà nʼâ bùl bə̀ Yi gə zwẽ á lwə̂l,
à mʼa kʼa bə̀ á sõ.
Pwəə nə́ ń ce Shəlamɔ ń mə́ ń gwi ń sɛ́bɛ́ rɛ́ yó
23 Epafəraasɛ mɔ́ ń tó ne ń ŋwɛ́nɛ́ byə̀nə́-jù w Yezu Kristə tum dí yil mó nə́ ń ce mó.
24 Markɛ ǹdə́ Arəsətarkɛ,
ǹdə́ Dɛmaasɛ ǹdə́ Lwiki mú bə̀ nʼê tó ne bə̀ twĩ̀ mú myɛ nʼê ce mó.
25 Cinu Yezu Kristə mà n cĩ́ bwəl á yó!