Zhərəzalɛm Kristə-lyì gùlú w yé né cìnə́ bé byili bə̀ bə̀myɛ́ ǹdə́ Pwəə ga nyí wɔ́ rə̀dù
2
Byinə shí ǹdə́ nə̀na rə̀myɛ́ kwã nɛ́,
à kʼa kwɛ̃̀ a vò Zhərəzalɛm,
àmyɛ́ ǹdə́ Barnabaasɛ.
A zə Titi a mʼa súlí.
2 Wɔ́ Yi rə̀ byili ni rə̀myɛ́,
sə à zhə̀l a nə Kristə-lyì bí gùlú w yé né cìnə́ bé bə̀ dúdú,
a byili bi yò-ècɔ̀nɔ̀ nyí rí à nʼâ bwə̀l à byili byɛ̀bɛ́ bə̀ də̀ Zhwifubá ne mó.
À yʼà tʼâ yâl bʼà tum dí à twĩ̀ mú ǹdə́ tɛ̀bɛ́ à gwẽ̌ nʼâ twĩ̀ mú yál kɔn nánfò yé.
3 Titi mú ń yà ń tó ne mó wɔ́ Gərɛkɛ.
Sə ǹdə́ rə̀myɛ́ ga,
bə̀ yə̀ mɔ nyɛ́ɛ́ bə ce góm mó wẽ́ yé.
4 Sə lyì jàlà bə̀ wɔ́ surhə námməlwâlsɛ cìnə́ yʼà tú bə zù nə́ wẽ́ ǹdə lyì-twə̂rh ta,
bə̀ nʼê gòm kɔma bə̀ bə̀ wɔ́ nə́ da-byâ,
e jʼà wɔ́ nə́ yǔr yil bə̀ yʼà túwə́.
Bə̀myɛ́ mɔ́ yʼà nʼê yâl bə̀ ń góm.
Bə̀ yʼà nʼê yâl bə ce nə́ jǐrh ǹdə yómə́ ta,
e jʼà cìn-cìnú mú mɔ̀bɔ́ nə́ zhe mó wɔ́ Yezu Kristə sõ mə̀ shí ní.
5 Sə nə́ yə̀ shɛ̀nɛ́ nə́ zwẽ bə̀ nyə̀ná nɛ́ námpɔ́lɛ́ myɛ cìcì yé,
bə̀ nə́ yʼâ nʼé yâl bʼâ mɛ̃ Kristə yò-ècɔ̀nɔ̀ nyí rí zhə̀n dɛ́ wẽ́.
6 È gə wɔ́ byɛ̀bɛ́ Kristə-lyì bí nʼê nyǐ ǹdə bə̀ gùlú w yé né cìnə́ bé ta mɔ́ yilə,
bə̀ yə̀ nɛ nyɛ́ɛ́ bʼà wɛ̀rhɛ́ kɔn dõ a súlí yé.
(Bə̀ gə́ yʼà wɔ́ nɛ́ mɔ́ də̀ kaka àmyɛ́ yil yé,
bə̀ è gə wɔ́ Yi yilə,
lyì bí gakó wɔ́ kɔn rə̀dù.)
7 Yé né cìnə́ bé bə̀myɛ́ mɔ́ lwar bə̀ wɔ́ Yi rə̀ pɔ nɛ nyí bʼà bwə̂l yò-ècɔ̀nɔ̀ nyí rí a byili byɛ̀bɛ́ bə̀ də̀ Zhwifubá mó ne,
ǹdə rə̀ gə́ pɔ nyí Pyɛɛrɛ myɛ nɛ bə̀ ń bwə̂l yò-ècɔ̀nɔ̀ nyí rí n byili Zhwifubá ne né.
8 Yi ce Pyɛɛrɛ jǐrh rə̀ tùntúm Zhwifubá yilə,
rə ce àmyɛ́ jǐrh rə̀ tùntúm byɛ̀bɛ́ bə̀ də̀ Zhwifubá mó yilə.
9 Kristə-lyì bí yʼà nʼê nyǐ Zhakɛ ǹdə́ Pyɛɛrɛ ǹdə́ Zhã ǹdə bə̀ gùlú w yé né cìnə́ ta,
sə bə̀myɛ lwar bə̀ wɔ́ Yi rə̀ pɔ nɛ tum dí rə̀myɛ́ mɔ́ rə̀ sónó w yilə.
Bə zɛ̃̀ bə ce jɛ̃̀ àmyɛ́ ǹdə́ Barnabaasɛ jɔ̃̀ wà,
bə mʼe byili bə̀ nə́myɛ̌ ǹdə́ bə̀myɛ́ ga nyí wɔ́ rə̀dù,
bə̀ nə́myɛ̌ mə̂ sə nə́ vò byɛ̀bɛ́ bə̀ də̀ Zhwifubá mó sono,
sə bə̀myɛ́ vò Zhwifubá sono.
10 Sə tɛ̀bɛ́ bə̀ lwə̀l nə́ba bə̀ nə́ wɛ̀rhɛ́ mɔ́,
wɔ́ nə́ lyǐrh Zhərəzalɛm gùlú w nə̀mwà bɛ́ yò,
sə à yʼà nʼâ yâl a wɛ̀rhɛ́ rə̀myɛ́ ǹdə́ à wu gakó.
Lò mɔ̀bɔ́ ǹ zhí Kristə ne, ǹ gə wɔ́ Zhwifu, ǹ gə də̀ Zhwifu myɛ, ǹ bʼâ nə vwârh
11 Sə Pyɛɛrɛ gə́ tú n yí Ancɔɔsɛ,
à bú mu lyì bí gakó yé né,
bə̀ ń yà ń dówə́.
12 Ń yà ń ju kùr ń nə́ ń tó Kristə-lyì bí byɛ̀bɛ́ bə̀ də̀ Zhwifubá mó ne ń jí.
Rə̀myɛ́ kwã nɛ́,
lyì dwã zɛ̃̀ bə shí Zhakɛ sono bə bà.
Ywẽ zɛ̃̀ rə̀ zhe mo,
ń kə́ ń bə shɛ̀ Kristə-lyì bí byɛ̀bɛ́ bə̀ də̀ Zhwifubá mó ne tó n jí yé,
bə̀ byɛ̀bɛ́ bə̀ yʼà shí Zhakɛ sõ mó yʼà nʼê nyɛ́ɛ́ byɛ̀bɛ́ bə̀ də̀ Zhwifubá mó bə̀ bə̀ góm.
13 Kristə-lyì bí dwã bɛ́ byɛ̀bɛ́ bə̀ wɔ́ Zhwifubá mó gakó zɛ̃̀ bə̀myɛ tó bə zù tùntwə̃̀ə̃̀ né nyɛ̀bɛ́ nə̀ yə̀ tó ǹdə́ kɔn dɛ̀bɛ́ bə̀ yě bə̀ rə̀ wɔ́ zhə̀n mɔ́ nɛ yé.
Rə̀myɛ́ ce Barnabaasɛ myɛ tó n zù bə̀ nyə̀ná nɛ́.
14 À gə́ pwírí bə̀ tʼâ zhə̀l zhə̀n sɔ́má y yó ǹdə yò-ècɔ̀nɔ̀ nyí rí gə́ nʼê byili ní mú,
à wò Pyɛɛrɛ nɛ lyì bí gakó yé né:
“Ǹmyɛ́ wɔ́ Zhwifu,
sə ǹ jòm nyɔ̀nɔ̀ ǹdə lò mɔ̀bɔ́ ń də̀ Zhwifu ta.
Ǹ yə̀ wɛ̀rhɛ́ ǹdə Zhwifubá ta yé.
Bə̀kɔ́n yil ǹ nə zɛ̃̀ ǹ nə́ ǹ yâl ń nyɛ́ɛ́ byɛ̀bɛ́ bə̀ də̀ Zhwifubá mó bə wɛ̀rhɛ́ ǹdə Zhwifubá ta?”
15 Nə́myɛ̌ wɔ́ Zhwifubá;
nə́ də̀ ǹdə lyì bí dwã bɛ́ byɛ̀bɛ́ bə̀ yə̀l Yi nyə́ né mó ta yé.
16 Sə ǹdə́ rə̀myɛ́ ga,
nə́ yě bʼè də̀ Muyiisi nyə́ né zõ mó è bʼa ce numbyíní cẽ dóó zal yé.
Wɔ́ ǹ gə zhí Yezu Kristə ne dúdú,
fòró Yi ce ǹ kə́ ǹ bə dóó zhe yé.
Wɔ́ rə̀myɛ́ è ce,
nə́myɛ zù Yezu Kristə,
mùnì ga nə́ gə́ zhí mu,
sə Yi ce nə́ bə̀kʼá kʼé zə dwə́ə́re yé;
sə è də̀ Muyiisi nyə́ né zõ è bʼa ce yé,
bə̀ nyə́ né nə̀myɛ́ zõ mó wàr è bʼa ce lò cẽ dóó zal yé.
17 Nə́myɛ̌ byɛ̀bɛ́ nə́ wɔ́ Zhwifubá,
nə́ rʼé pyà sə Yi ce nə́ bə̀kʼá kʼé zə dwə́ə́re Kristə jàn yil mó,
lyì bí gə tə̀ rə̀myɛ́ yil bə̀ nʼê nyǐ nə́myɛ ǹdə yə̀-bəlwàálɛ cìnə́ ta,
è nə zɛ̃̀ wɔ́ Kristə ń ce nə́ jǐrh yə̀-bəlwàálɛ cìnə́?
Rə̀myɛ́ də̀ zhə̀n yé.
18 À gə zɛ̃̀ à kʼâ zwẽ Muyiisi nyə́ né à zhɔ̃̀ mɔ́,
wɔ́ àmyɛ́ à nʼâ cĩ́ dóó à cìcì yó wə.
19 Wɔ́ Muyiisi nyə́ né cìcì nə̀ ce a jǐrh ǹdə wɔ́ cú à cù ta,
a du nə̀ wẽ́.
Kɔn yàl èta,
mùnì ga a yə̀ nɛ́ Yi yilə.
À tó Kristə ne a cì də̀-jɔrhɔ́ yó.
20 Àmyɛ́ cìcì mú kʼâ tɛ̀nɛ́ yé.
Wɔ́ Kristə ń ŋwɛ́nɛ́ à wẽ́.
À gə́ ŋwɛ́nɛ́ cɛ yó èlâsɛ̃´ mɔ́,
wɔ́ Yi Byǐ mú ń swéné ne n pə ń myə̂l à yil mó ne à zhí.
21 À tʼâ yâl a zhɛ̃̀ Yi sónó w yé.
Zhə̀nà,
Muyiisi nyə́ né zõ mó gə yʼà wɔ̌ è ce lò cẽ dóó zal,
sə́ nyǐ Kristə cu mú wɔ́ nánfò,
mə̀ bə kùr zhe yé.