Pwəə nə́ ń yâl n zhẽ̌ ń cìn dɛ̃̌ ń bə-jàn-zhəəre yilə
12
À mə̂ sʼa zhẽ̌ à cìn dɛ̃̌,
sə rə̀myɛ́ bə kùr zhe yé.
E jà ǹdə́ rə̀myɛ́ ga,
à mʼa byili ába kɔn dɛ̀bɛ́ Cinu byili ni,
n jà n ce a lwar rə̀ pár mɔ́.
2 À yě Kristə-lò mə̀dù párá.
Yi kwè mò rə mʼe vò dɛ̃̌ dɛ̃̌ è zhe byinə shí ǹdə́ nə̀na.
È gə wɔ́ zhə̀n zhə̀n ga Yi kwè mò rə mʼe vò dɛ̃̌,
ráá wɔ́ ǹdə dàrhà ta,
à yə̀l yé.
Wɔ́ Yi dúdú rə̀ yě.
3 Zhə̀nà,
à yě bə̀ Yi kwè bal mɔ́ ńmyɛ̌ rə mʼe vò dɛ̃̌.
Sə à nʼâ byili gwẽ̌,
è gə wɔ́ zhə̀n zhə̀n ga Yi kwè mò rə mʼe vò,
ráá wɔ́ ǹdə dàrhà ta,
à yə̀l rə̀myɛ́ yé.
Wɔ́ Yi dúdú rə̀ yě.
4 Ń nyɛ̀ɛ̀ zɔ̀mà gàà,
sə nə̀ də̀ kɔn dɛ̀bɛ́ numbyíní wɔ̌ è mʼa byili yé.
E jʼà bə sɔ́má myɛ zhe è zɔ̀m nɛ̀ yé.
5 È gə wɔ́ bal mɔ́ ńmyɛ̌ yilə,
à mʼa zhẽ̌ à cìnə̀.
Sə à tʼâ la à cìn zhõ̌ à cìcì yil yé.
Ǹdə́ à gə la à cìn zhõ̌,
wɔ́ à bə-jàn-zhəəré yilə.
6 Bá à gə la à cìn dɛ̃̌ zhõ̌ myɛ,
rə̀myɛ́ də̀ tum dɛ̀bɛ́ à nʼâ twĩ̀ à yə̀l rə̀ kùr yé,
bə̀ wɔ́ zhə̀n à nʼâ zɔ̀mà.
Sə à nʼâ dɛ̃̀ à cìn ǹdə́ cìn dɛ̃̌ zhõ̌ mó,
bʼà tʼâ yâl sə lyì bí tó à tumə né ǹdə́ à zɔ̀mà nɛ́ dɛnnɛ bə bù bʼà du bi yé.
7 Kɔn zù à yala nɛ́ wẽ́ rə̀ nʼê yì nì.
Kɔn wɔ́ ǹdə wɔ́ Shətana è nʼê mà nɛ̀ ta.
Kɔn dɛ́ dɛ̀bɛ́ Cinu byili ni mú zhe kùr dɛ̃´dɛ̃´.
Wɔ́ rə̀myɛ́ è ce n yẽ̌ nɔ̀nɔ̀ w òmyɛ́ yí ni,
mùnì ga à bə̀kʼa zhẽ̌ à cìn dɛ̃̌ kɔn dɛ́ rə̀myɛ́ yil yé.
8 À lwə̀l mò,
twər rə̀tɔ̀ gakó,
sə n vùr nɔ̀nɔ̀ w òmyɛ́ à yala nɛ.
9 Sə ń wò nè:
“À gə́ só mó mó myɛ dúdú já.
Wɔ́ ǹ bə-jàn-zhəəre yi ní à nʼâ ce à jàn dɛ́ yàl nɛ́ ǹdə́ mɔ́ dɛ̃´dɛ̃´.”
Wɔ́ rə̀myɛ́ è ce à bʼa zhẽ̌ à cìn dɛ̃̌ à bə-jàn-zhəəre yilə,
mùnì ga Kristə jàn dɛ́ yìlì nì.
10 Wɔ́ rə̀myɛ́ è ce,
bə-jàn-zhəəre ga,
tùùrhì ga,
yò-cə̀ə̀lè ga,
lyì bí gə́ nʼê nwɛ̀nɛ̀ nɛ̀ mɔ́ ga,
twə́lə́ né ga;
à gə nʼâ nɛ rə̀myɛ́ gakó Kristə yilə,
à wu nyɛ̀.
Zhə̀nà,
wɔ́ à bə-jàn-zhəəre yi ní à nʼâ nɛ jàn nɛ́.
Pwəə nə́ ń byili bə̀ ń nə́ ń yâl n ká n vò n byɛ́lɛ́ Kɔrɛ̃tɛ Kristə-lyì bí ni
11 À gə zɛ̃̀ à nʼâ zɔ̀m ǹdə nyə̀nyà ta,
wɔ́ ámyɛ̌ á ce à nʼâ wɛ̀rhɛ́ èta.
Bə̀ wɔ́ ámyɛ̌ á yʼâ mə̂ sʼá zwẽ à nyí ni.
Bá àmyɛ́ gə də̀ kaka myɛ,
byɛ̀bɛ́ á nʼá bùl bə̀ bə̀ wɔ́ Kristə tùntúmə́ nánfwààlɛ̀ mɔ́ myɛ bə nɛ du yé.
12 À wɛ̀rhɛ́ kɔn dɛ̀bɛ́ rə̀ bʼa ce á lwar bʼà wɔ́ Kristə tùntúm mú á yírhə́ na.
À zhìlì à yala nɛ dɛ̃´dɛ̃´.
Wò-jààrɛ̀ ǹdə́ màmyaarhɛ ǹdə́ tùm-fwààlɛ̀ gakó wɛ̀rhɛ́ á sõ.
13 Wɔ́ bə̀kɔ́n à wɛ̀rhɛ́ Kristə-lyì gùúlí dwã bɛ́ nɛ du ámyɛ̌?
Kɔn rə̀dù à yě:
à yə̀ á yó w nyǐ yé.
E zɛ̃̀ wɔ́ rə̀myɛ́ á pwírí rə̀ bə càn ná etəra?
È gə wɔ́ èta,
sə́ nyǐ à nʼâ lwə̀l ába sǔbri.
14 Nyǐnə à nʼâ tɛnɛ à bàn á sõ.
Rə̀myɛ́ bʼa ce né wɔ́ twər rə̀tɔ̀ à gə́ nʼâ twí á sõ né.
Sə kɔn bʼa yə̀ ǹdə twéé twéé mó ta,
à tʼâ la ába lyɔ̀ɔ̀ ǹdə́ kɔn dɛ̀bɛ́ à zhe rə̀ tum yé.
È də̀ á kɔn à nʼâ yâl yé.
Wɔ́ á cìcì mú à nʼâ yàlá.
È də̀ bə̀sɔ́bwɛ̀lɛ́ námpɔ́lɛ́ è nʼê pyà è pɛ è da nɛ́ yé.
Wɔ́ da ń ya n pyà n pə ń bə̀sɔ́bwɛ̀lɛ́ námpɔ́lɛ́ nɛ.
15 È gə wɔ́ àmyɛ́ yilə,
à bʼa pə ába kɔn dɛ̀bɛ́ à zhe,
e súlí à cìcì námpúm.
E zɛ̃̀ wɔ́ à gə́ só ába dɛ̃´dɛ̃´ mɔ́ yilə,
á sónó w nʼê bɔ̀ ǹdə́ nɛ?
16 Dɛ̀ga lyì jàlà nʼê zɔ̀m bʼà də̀ cángá yé,
bə̀ wɔ́ kɔma à gòm a mʼa jə́jɛ̀rɛ́ ába.
A jʼà yə̀ ába lyɛ̀ɛ̀ ǹdə́ kɔn dɛ̀bɛ́ à zhe rə̀ tum yé.
17 Á gə nʼá yâl sʼá nyǐ lyì bí byɛ̀bɛ́ à twĩ̀ á sõ mó,
à yə̀ ce mə̀dù ga yǔr ába n zwẽ á kɔn n bə̀ n pɛ̃ yé.
18 À lwə̀l Titi a twĩ̀ ńmyɛ̌ ǹdə́ nə́ da-byǐ mú á yě ń pár mɔ́ á sõ.
Bə̀ nə gə́ tú mú,
Titi yǔr ába n zwẽ á kɔn nà?
Á nʼá bùl bʼàmyɛ́ ǹdə́ ńmyɛ̌ tùntwĩ̀ĩ̀ rí yə̀ rə̀dù yàl,
ráá nə́ bùlə̀ né nə̀ yə̀ rə̀dù yàl?
19 Dɛ̀ga á ju kùr shãã shãã ga á nʼá bùl á wẽ́ bə̀ wɔ́ bwìrì nə́ rʼé pyà á sõ?
E jʼà də̀ èta yé.
Nə́ rʼé zɔ̀m Yi yé né ǹdə Kristə gə́ nə́ ń yâl nɛ́.
Dɔwabá nántwə̂rh,
nə́ rʼé zɔ̀m rə̀myɛ́ gakó ámyɛ̌ sãɔ̃ yilə,
mùnì ga á kwɛrhɛ á zhí Yi ni.
20 Ywẽ zhe ne,
dɛ̀ga à gə́ mʼa bə̀ á sõ,
a pwírí á də̀ ǹdə à gə́ nʼâ yâl nɛ́ yé,
dɛ̀ga ámyɛ pwírí àmyɛ də̀ ǹdə á gə́ nʼá yâl nɛ́ yé.
Kɔn súlí myɛ,
ywẽ zhe ne,
ǹ gə só a mʼa pwírí nyə̀-pâr ǹdə́ bwɛ̃̌-dǔr,
ǹdə́ lyim,
ǹdə́ búlə́,
ǹdə́ dwã yil zhìlù,
ǹdə́ wu-bárhɛ́ zɔ̀mà,
ǹdə́ cìn-byilu,
ǹdə́ yààyàà tumə ŋwɛ́nɛ́ á cəcəl wə.
21 Ywẽ zhe ne myɛ,
à gə́ mʼa kʼa bə̀ á sõ,
a zɛ̃̀ à la cìzhìl nɔ Yi yé né á yilə.
Dɛ̀ga lyì jàlà ŋwɛ́nɛ́ bə̀ gwẽ̌ nʼê fwə̀lə́,
bə̀ nʼê wɛ̀rhɛ́ lwɛlɛ,
bə̀ nʼê wɛ̀rhɛ́ yààyàà ǹdə bə̀ shãã ga mɔ́ ta,
bə̀ yə̀ shɛ̀nɛ́ bə pyìrhí bə̀ wun yé.
Rə̀myɛ́ zɛ̃̀ rə̀ la à wu ni zhìlù.